ମୁମ୍ୱାଇ ୦୫/୦୪: ଶାନ୍ତ ସ୍ୱଭାବର ମନୋଜ କୁମାର। ବଲିଉଡ୍ ବାଦଶାହ ଶାହରୁଖ ଖାନ୍ଙ୍କ ଉପରେ ରାଗିଥିଲେ ଖୁବ୍ । ମାମଲା ୨୦୦୭ର ଫିଲ୍ମ ‘ଓମ୍ ଶାନ୍ତି ଓମ୍’ ସହ ଜଡ଼ିତ । ଫିଲ୍ମର ନିର୍ଦ୍ଦେଶିକା ଫରାହ ଖାନ୍ ଓ ଶାହରୁଖ୍ଙ୍କ ବିରୋଧରେ ମାନହାନି ମକଦ୍ଦମା କରିଥିଲେ ଭେଟେରାନ ଅଭିନେତା ମନୋଜ ।
ଫିଲ୍ମର ଗୋଟିଏ ସିନ୍ରେ ଶାହରୁଖଙ୍କ ଚରିତ୍ର ଓମ୍ ପ୍ରକାଶ ମଖିଜା ମନୋଜଙ୍କ ପାସ୍ ନେଇ ଏକ ଫିଲ୍ମ ପ୍ରିମିୟର୍ରେ ଏଣ୍ଟ୍ରି କରୁଥିବା ନଜର ଆସିଥିଲେ । ମନୋଜଙ୍କ ମୁହଁରେ ହାତ ରଖିବାର ଆଇକନିକ୍ ଅନ୍ଦାଜ୍କୁ ସେ ନକଲ କରିଥିବାରୁ ପୋଲିସ ତାଙ୍କୁ ଚିହ୍ନି ପାରିଲା ନଥିଲା । ପରେ ସୁରକ୍ଷାକର୍ମୀ ତାଙ୍କ ଉପରେ ଲାଠି ଚାର୍ଜ କରି ତାଙ୍କୁ ସେଠାରୁ ଘଉଡ଼େଇଦେଲେ । ଏଥିରେ ଗଭୀର ଭାବେ ମର୍ମାହତ ହୋଇଥିଲେ ମନୋଜ କୁମାର ।
ତାଙ୍କୁ ଅପମାନିତ ଓ ଉପହାସ କରିବାର ଏହା ଏକ ଷଡ଼ଯନ୍ତ୍ର । ଫିଲ୍ମ ଦୁନିଆକୁ ଦୀର୍ଘ ୫୦ ବର୍ଷର ତାଙ୍କ ସମର୍ପଣ ଭାବ ଅପମାନିତ ହୋଇଛି ବୋଲି ସେ କହିଲେ । ଫିଲ୍ମରୁ ଉକ୍ତ ଦୃଶ୍ୟକୁ ହଟାଇବାକୁ ଅନୁରୋଧ କଲେ । ଫିଲ୍ମ ନିର୍ମାତା ଏଥିରେ ରାଜି ହେଲେ । ଶାହରୁଖ ମଧ୍ୟ ଏହି ବର୍ଷୀୟାନ ଅଭିନେତାଙ୍କୁ କ୍ଷମା ପ୍ରାର୍ଥନା କଲେ ।
କିନ୍ତୁ ୨୦୧୩ରେ ‘ଓମ୍ ଶାନ୍ତି ଓମ୍’ ଜାପାନରେ ପୁନଃ ମୁକ୍ତିଲାଭ କରିବା ପରେ ମାମଲା ପୁଣି ଚର୍ଚ୍ଚାକୁ ଆସିଲା । ଫିଲ୍ମରେ ବିବାଦୀୟ ଦୃଶ୍ୟ ପୁନଃ ପ୍ରଦର୍ଶିତ ହେବାରୁ ମନୋଜ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କଲେ । ପ୍ରଡକ୍ସନ୍ ହାଉସ୍ ଇରୋଜ୍ ଇଣ୍ଟର୍ନ୍ୟାସନାଲ ଓ ଶାହରୁଖଙ୍କଠୁ ସେ ୧୦୦ କୋଟି କ୍ଷତିପୂରଣ ଦାବି କଲେ । ତେବେ ପରେ ମାମଲା ପ୍ରତ୍ୟାହାର କରିନେଲେ । ଚର୍ଚ୍ଚା ଏଥିପାଇଁ ହୁଏ କି, ଦିନେ ଶାହାରୁଖ୍ଙ୍କ ନାଁରେ କେସ୍ କରିବାକୁ ବି ପଛାଇନଥିଲେ ।
