ନୂଆଦିଲ୍ଲୀ: ଜର୍ମାନୀରେ ଆଶ୍ଚର୍ଯ୍ୟ କଲା ଭଳି ଘଟଣା । ପାଞ୍ଚ ଘଣ୍ଟା ତଦନ୍ତ ପରେ ବୋକା ବନିଗଲା ପୋଲିସ । ହାଇ-ପ୍ରୋଫାଇଲ୍ ମର୍ଡର କେସ୍ ଭାବି ଚଳାଇଥିଲା ଯାଞ୍ଚ, ମାତ୍ର ଶେଷରେ ଘଟିଲା ଚମତ୍କାର ଘଟଣା । ମହିଳାଙ୍କ ଅଧା ଜଳା ମୃତଦେହ ବଦଳରେ ପୋଲିସ ହାତରେ ଲାଗିଥିଲା ଏକ ଖେଳଣା । ପରେ ଏହା ଏକ ‘ସେକ୍ସ ଡଲ’ ବୋଲି ତଦନ୍ତକାରୀ ଟିମ୍ ଜାଣିବାକୁ ପାଇଥିଲା ।
ସୂଚନା ଅନୁଯାୟୀ, ଜର୍ମାନୀ ରୋଷ୍ଟାସରେ ଏଭଳି ଘଟଣା ସାମ୍ନାକୁ ଆସିଛି । ଶନିବାର ସଂଧ୍ୟାରେ ଜଣେ ବ୍ୟକ୍ତି ନିଜ ପୋଷା କୁକୁରକୁ ବୁଲାଇବାକୁ ଜଙ୍ଗଲକୁ ନେଇଥିଲେ । ଏହି ସମୟରେ ସେ ଏକ ମୃତଦେହ ଦେଖି ଡରି ଯାଇଥିଲେ ଏବଂ ଏବାବଦରେ ତୁରନ୍ତ ପୋଲିସକୁ ଖବର ଦେଇଥିଲେ । ଏହା ଏକ ହାଇ-ପ୍ରୋଫାଇଲ୍ ମର୍ଡର କେସ୍ ଭାବି ପୋଲିସ ଏକ ସ୍ବତନ୍ତ୍ର ତଦନ୍ତକାରୀ ଟିମ୍ ଗଠନ କରିଥିଲା । ଏଥିରେ ଡଗ୍ସ୍କ୍ବାଡ୍, ଫରେସନ୍ସିକ୍ ଟିମ୍, ସ୍ବତନ୍ତ୍ର ତଦନ୍ତକାରୀ ଅଫିସର, ଡ୍ରୋନ୍ କ୍ୟାମେରା ଏବଂ ଥ୍ରୀଡି ସ୍କାନର ସାମିଲ୍ କରାଯାଇଥିଲା । ସ୍ବତନ୍ତ୍ର ତଦନ୍ତକାରୀ ଟିମ୍ ଘଟଣାସ୍ଥଳରେ ପହଞ୍ଚି ପ୍ରଥମେ ସ୍ଥାନୀୟ ଅଞ୍ଚଳକୁ ସିଲ୍ କରିଥିଲା । ପରେ ଫରେନ୍ସିକ୍ ଟିମ୍ ବିଭିନ୍ନ କୋଣରୁ ତଥ୍ୟ ସହ ଫଟୋ ସଂଗ୍ରହ କରିଥିଲା । ପାଞ୍ଚ ଘଣ୍ଟାର ଯାଞ୍ଚ ପରେ, ଜଣେ ଅଧିକାରୀ ଅଚାନକ ମୃତଦେହକୁ ଛୁଇଁଥିଲେ । ଏହାପରେ ସତ ସାମ୍ନାକୁ ଆସିଥିଲା ।
ଜର୍ମାନୀ ଜଙ୍ଗଲରେ ମିଳିଥିବା ମୃତଦେହ ମହିଳା ନୁହେଁ ବରଂ ମଣିଷ ଭଳି ଅବିକଳ ଦିଶୁଥିବା ଏକ ‘ସେକ୍ସ ଡଲ’ ଥିଲା । ଏହାକୁ ଏକ ମହିଳା ଭଳି ତିଆରି କରାଯାଇଥିଲା । ଏହାର କିଛି ଅଂଶ ପୋଡ଼ିବା ପରେ ଏକ ନୀଳ ବ୍ୟାଗରେ ଭର୍ତ୍ତି କରି କେହି ଜଙ୍ଗଲରେ ଭିଙ୍ଗି ଦେଇଥିଲେ । ଜର୍ମାନୀ ସମାଚାର ପତ୍ର ନାର୍ଡକୁରିୟର ଅନୁଯାୟୀ, ପୋଲିସ ଅନୁମାନ କରୁଛି, ସେକ୍ସ ଡଲର କିଛି ଅଂଶକୁ ଜାଣିଶୁଣି ପୋଡ଼ି ଏହାକୁ ଏକ ସର୍ବାଜନୀନ ସ୍ଥାନରେ ଫିଙ୍ଗି ଦିଆଯାଇଛି । ପୋଲିସ ମାମଲାକୁ ବନ୍ଦ କରି ସେକ୍ସ ଡଲକୁ ପୋଡ଼ି ଦେଉଛି । ...
