ମାଲକାନଗିରି ୫।୪: ନକ୍ସଲପନ୍ଥୀଙ୍କ ପିଏଲଜିଏ ବାହିନୀକୁ ଲାଗିଛି ବଡ଼ ଝଟ୍କା । ସୁକୁମା ପୋଲିସ ନିକଟରେ ଆତ୍ମସମର୍ପଣ କଲେ ୪ ମାଓବାଦୀ । ମୁଣ୍ଡ ଉପରେ ଘୋଷଣା ଥିଲା ପୁରସ୍କାର ରାଶି ।
ସୂଚନାଯୋଗ୍ୟ ଯେ, ମାଓ ମୁକାବିଲାର ସମୀକ୍ଷା ଲାଗି ଛତିଶଗଡ ଦନ୍ତେୱାଡା ଜିଲ୍ଲା ଗସ୍ତରେ ଯାଉଛନ୍ତି କେନ୍ଦ୍ର ଗୃହ ମନ୍ତ୍ରୀ ଅମିତ ଶାହ । ତେବେ ଶାହଙ୍କ ଏହି ଗସ୍ତ ପୂର୍ବରୁ ନକ୍ସଲପନ୍ଥୀଙ୍କ ପିଏଲଜିଏ ବାହିନୀକୁ ଲାଗିଛି ବଡ଼ ଝଟ୍କା । ପିଏଲଜିଏ ବାଟାଲିୟନର ମୁଖ୍ୟ ବାର୍ସେ ଦେବାଙ୍କ ଭାଇ ସୁକୁମା ପୋଲିସ ନିକଟରେ ଆତ୍ମସମର୍ପଣ କରିଛି । ନକ୍ସଲ କମାଣ୍ଡର ବାର୍ସେ ଦେବାଙ୍କ ଭାଇ ବର୍ସେ ସାନ୍ନା ସମେତ ୪ ଜଣ ମାଓବାଦୀ ସୁକୁମା ଏସ୍ପି କିରଣ ଚୌହାନ ଓ ସିଆରପିଏଫ ଅଧିକାରୀଙ୍କ ନିକଟରେ ଆତ୍ମସମର୍ପଣ କରିଛନ୍ତି । ଏମାନଙ୍କ ମଧ୍ୟରୁ ଦୁଇ ମାଓବାଦୀଙ୍କ ମୁଣ୍ଡ ଉପରେ ପୂର୍ବରୁ ୮ ଲକ୍ଷ ଟଙ୍କାର ପୁରସ୍କାର ରାଶି ଘୋଷଣା କରିଥିଲେ ଛତିଶଗଡ ସରକାର । ଆତ୍ମସମର୍ପଣ କରିଥିବା ଚାରି ଜଣ ମାଓବାଦୀଙ୍କୁ ୨୫ ହଜାର ଟଙ୍କା ଲେଖାଏଁ ପ୍ରୋତ୍ସାହନ ରାଶିର ଚେକ୍ ପ୍ରଦାନ କରିଛନ୍ତି ସୁକୁମା ଏସ୍ପି କିରଣ ଚୌହାନ । ପରେ ସେମାନଙ୍କୁ ସରକାରଙ୍କ ନିୟମ ଅନୁଯାୟୀ ଥଇଥାନ କରାଯିବ ବୋଲି ସୁକୁମା ଏସ୍ପି କହିଛନ୍ତି ।
ତେବେ କିଛି ଦିନ ତଳେ ଶାନ୍ତି ଆଲୋଚନା ପାଇଁ ପ୍ରସ୍ତାବ ଦେଇଥିଲେ ମାଓ ସଂଗଠନ । କେନ୍ଦ୍ର ଗୃହ ମନ୍ତ୍ରୀ ଅମିତ ଶାହଙ୍କ ଛତିଶଗଡ଼ ଦନ୍ତେୱାଡା ଜିଲ୍ଲା ଗସ୍ତ ପୂର୍ବରୁ ଭୟଭୀତ ହୋଇପଡିଥିଲେ ଲାଲ୍ ବାହିନୀ । କେନ୍ଦ୍ର ଗୃହ ମନ୍ତ୍ରୀ ଅମିତ ଶାହଙ୍କ ବସ୍ତର ଗସ୍ତ ପୂର୍ବରୁ ମାଓବାଦୀ ମାନେ ଶାନ୍ତି ଆଲୋଚନାକୁ ସମର୍ଥନ କରିବା ପାଇଁ ଅପିଲ୍ କରିଥିଲେ । ଏ ନେଇ ସିପିଆଇ (ମାଓବାଦୀ) କେନ୍ଦ୍ରୀୟ କମିଟି ପକ୍ଷରୁ ପ୍ରେସ୍ ବିଜ୍ଞପ୍ତି ଜାରି ହୋଇଥିଲା ।
ପୂର୍ବରୁ ମଧ୍ୟ ଆଲୋଚନା ପାଇଁ ଇଚ୍ଛା ପ୍ରକାଶ କରିଥିବା ପ୍ରେସ୍ ବିଜ୍ଞପ୍ତି ମାଧ୍ୟମରେ ଜଣାଇଥିଲେ । ଏପରିକି ସଶସ୍ତ୍ର ବାହିନୀର ନୂଆ ଶିବିର ସ୍ଥାପନ ବନ୍ଦ ପାଇଁ ଲାଲ ବାହିନୀ ସର୍ତ୍ତ ରଖିଥିଲେ । ସାମରିକ କାର୍ଯ୍ୟାନୁଷ୍ଠାନ ବନ୍ଦ ପାଇଁ ମଧ୍ୟ ଦାବି ଜଣାଇଥିଲେ । ସରକାର ମାନିଲେ ମାଓବାଦୀ ଯୁଦ୍ଧବିରତି ଘୋଷଣା କରିବେ ବୋଲି ପ୍ରେସ୍ ବିଜ୍ଞପ୍ତିରେ ଦର୍ଶାଇଥିଲେ ମାଓବାଦୀ ।
You Can Read:
