ନୂଆଦିଲ୍ଲୀ: ଆମେରିକା ଏହାର ବ୍ୟବସାୟିକ ସହଯୋଗୀ ଦେଶମାନଙ୍କ ଉପରେ ପାଲଟା ଶୁଳ୍କ ଲଗାଇବା ପରେ ବିଭିନ୍ନ ଦେଶର ହଇଚଇ ସୃଷ୍ଟି ହୋଇଛି। ଏପଟେ ଚୀନକୁ ନେଇ ଚିନ୍ତାରେ ଭାରତ। କାଳେ ଦେଶକୁ ଚୀନର ଶସ୍ତା ସାମଗ୍ରୀର ପ୍ରବେଶ ବୃଦ୍ଧି ପାଇବ ଏଥିପାଇଁ ଭାରତକୁ ଆସୁଥିବା ସାମଗ୍ରୀ ଉପରେ ସରକାର କଡ଼ା ନଜର ରଖିଛନ୍ତି ଭାରତ ସରକାର। 

ଏହି ପରିସ୍ଥିତିର ମୁକାବିଲା କରିବା ପାଇଁ ବାଣିଜ୍ୟ ମନ୍ତ୍ରଣାଳୟ ନିରନ୍ତର ବୈଠକ କରୁଛି। ଯଦି ଚୀନ୍ ତା’ର ଉତ୍ପାଦଗୁଡ଼ିକୁ ଭାରତକୁ ପଠାଏ, ତେବେ ପରିସ୍ଥିତିର କିପରି ମୁକାବିଲା କରାଯିବ ସେ ବିଷୟରେ ବାଣିଜ୍ୟ ସଚିବ ସୁନୀଲ ବାର୍ଥୱାଲଙ୍କ ନେତୃତ୍ୱରେ ଅନେକ ଆଭ୍ୟନ୍ତରୀଣ ଆଲୋଚନା ହୋଇ ସାରିଲାଣି।

ଟ୍ରମ୍ପଙ୍କ ଟାରିଫ ଲାଗୁ

ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏପ୍ରିଲ ୨ ତାରିଖରେ "ପାଲଟା ଶୁଳ୍କ" ଲାଗୁ କରିବା ପାଇଁ ସରକାରୀ ନିର୍ଦ୍ଦେଶନାମା ଉପରେ ଦସ୍ତଖତ କରି ସାରିଛନ୍ତି। ଏହା ଅଧୀନରେ, ବିଭିନ୍ନ ଦେଶରୁ ଆମେରିକାକୁ ଆସୁଥିବା ସାମଗ୍ରୀ ଉପରେ ଟ୍ରମ୍ପ ସରକାର ୧୦% ରୁ ୫୦% ଅତିରିକ୍ତ ଶୁଳ୍କ ଲାଗୁ କରିଛନ୍ତି। ଏହି ନୂଆ ଶୁଳ୍କ ଏପ୍ରିଲ ୬ ରୁ କାର୍ଯ୍ୟକାରୀ ହେବ। ତେବେ କିଛି ନିର୍ଦ୍ଦିଷ୍ଟ ଦେଶ ପାଇଁ ଏହି ଶୁଳ୍କ ଏପ୍ରିଲ ୯ ରୁ କାର୍ଯ୍ୟକାରୀ ହେବ।

ପଢନ୍ତୁ- ଟ୍ରମ୍ପଙ୍କ ପାଲଟା ଶୁଳ୍କରେ ପଲଟିଲା ଆମେରିକା ଆରବପତିଙ୍କ ଡଙ୍ଗା: ଶିଳ୍ପପତିଙ୍କ ସମ୍ପତ୍ତିରେ ବଡ଼ ହ୍ରାସ

ଏହି କ୍ରମରେ ଭାରତ ଉପରେ ୨୬% ଶୁଳ୍କ ଲାଗୁ କରିଛି ଆମେରିକା। ହେଲେ ଭାରତ ଠାରୁ ଚୀନ ଉପରେ ସର୍ବାଧିକ ୩୪% ଶୁଳ୍କ ଲାଗୁ କରାଯାଇଛି। ଏହା ପୂର୍ବରୁ ଚୀନ ଉପରେ ୨୦ ପ୍ରତିଶତ ଶୁଳ୍କ ଲାଗୁ କରାଯାଇଥିଲା। ଏବେ ୩୪% ଶୁଳ୍କ ଅତିରିକ୍ତ ଲାଗିବା ପରେ ଚୀନ ଉପରେ ମୋଟ ୫୪% ଶୁଳ୍କ ଲାଗୁ କରିଛି ଆମେରିକା। ଏହା ପୂର୍ବରୁ ସେପ୍ଟେମ୍ବର ୨୦୨୩ ରେ ଜୋ ବାଇଡେନ ପ୍ରଶାସନ ଚୀନ ଉପରେ ଶୁଳ୍କ ଲାଗୁ କରିଥିଲେ। ଏହା ବାଦ୍‌ ଟ୍ରମ୍ପ ସରକାର ଅତିରିକ୍ତ ଶୁଳ୍କ ଲାଗୁ କରିଛନ୍ତି।  

ପ୍ରଭାବିତ ହେବ ଭାରତ, ବଢ଼ିବ ଚୀନ ସାମଗ୍ରୀର ପ୍ରବେଶ
ବାଣିଜ୍ୟ ବିଶେଷଜ୍ଞଙ୍କ କହିବା କଥା ହେଲା ଆମେରିକାରେ ବର୍ଦ୍ଧିତ ଶୁଳ୍କ ଯୋଗୁ, ଚୀନ୍ ଏବେ ଅନ୍ୟ ଦେଶକୁ ତା'ର ସାମଗ୍ରୀ ରପ୍ତାନୀ କରିବାକୁ ଚେଷ୍ଟା କରିବ। ଏପରି ପରିସ୍ଥିତିରେ, ଭାରତରେ ଚୀନ୍ ଉତ୍ପାଦର ବନ୍ୟା ଆସିପାରେ ଏବଂ ଶସ୍ତା ଚୀନ୍ ସାମଗ୍ରୀର "ଡମ୍ପିଂ" ବଢ଼ିପାରେ। 

ଏନେଇ ସାମାଜିକ ବିକାଶ ପରିଷଦର ପ୍ରଫେସର ବିଶ୍ୱଜିତ ଧର କହିଛନ୍ତି " ଚୀନ ପୂର୍ବରୁ ହିଁ ଆମେରିକୀୟ ବଜାରରେ ନିଜର ଭାଗ କମ୍ କରୁଛି ଏବଂ ଭାରତୀୟ ବଜାରରେ ଏହାର ଉପସ୍ଥିତି ବଢୁଛି। ତେଣୁ ଏ ଦିଗରେ ଭାରତ ସରକାରଙ୍କୁ ସତର୍କ ରହିବାକୁ ପଡ଼ିବ। କାରଣ ଆମେରିକା ପ୍ରାୟ ପ୍ରତ୍ୟେକ ଉତ୍ପାଦ ଉପରେ ଶୁଳ୍କ ଲାଗୁ କରିଛି। ତେଣୁ ଡମ୍ପିଂର ବିପଦ ଆହୁରି ବଢ଼ିଯାଇଛି।" 

ଚୀନ ଶସ୍ତା ସାମଗ୍ରୀକୁ କେମିତି ଅଟକାଇବା ଭାରତ ?

ଲସରକାର କହିଛନ୍ତି ଯେ ଡମ୍ପିଂକୁ ରୋକିବା ପାଇଁ ଭାରତରେ ଏକ ଦୃଢ଼ ବ୍ୟବସ୍ଥା ରହିଛି। ଡାଇରେକ୍ଟୋରେ ଜନେରାଲ ଅଫ୍ ଟ୍ରେଡ୍ ରେମେଡିଜ୍ (DGTR) ମାଧ୍ୟମରେ, ଚୀନରୁ ଭାରତକୁ ଆସୁଥିବା ଶସ୍ତା ସାମଗ୍ରୀ ଉପରେ ନିରନ୍ତର ନଜର ରଖାଯାଉଛି ଏବଂ ଅନେକ ଉତ୍ପାଦ ଉପରେ ଡମ୍ପିଂ ବିରୋଧୀ ଟିକସ ମଧ୍ୟ ଲାଗୁ କରାଯାଉଛି।

ପଢନ୍ତୁ- ଆମେରିକା ଟାରିଫ ଉପରେ ଚୀନର ପାଲଟା ଆକ୍ରମଣ, ସବୁ US ଉତ୍ପାଦ ଉପରେ ଲଗାଇଦେଲା ୩୪% ଟ୍ୟାକ୍ସ

ବାଣିଜ୍ୟ ମନ୍ତ୍ରଣାଳୟର ତଥ୍ୟ ଅନୁଯାୟୀ, ୨୦୨୪-୨୫ ଆର୍ଥିକ ବର୍ଷ ଏପ୍ରିଲରୁ ଫେବୃଆରୀ ମଧ୍ୟରେ ଭାରତ ଚୀନରୁ ୧୦୩.୭ ବିଲିୟନ ଡଲାର ମୂଲ୍ୟର ସାମଗ୍ରୀ ଆମଦାନୀ କରିଛି, ଯାହା ଗତ ବର୍ଷ ତୁଳନାରେ ୧୦.୪% ଅଧିକ। ଅନ୍ୟପକ୍ଷରେ ଚୀନକୁ ଭାରତର ରପ୍ତାନୀ ହ୍ରାସ ପାଉଛି। ଉକ୍ତ ଅବଧୀ ମଧ୍ୟରେ ଭାରତର ଚୀନକୁ ରପ୍ତାନୀର ୧୫.୭% ହ୍ରାସ ପାଇ ମାତ୍ର ୧୨.୭ ବିଲିୟନ ଡଲାର ହୋଇଛି।

ଭାରତ ଦ୍ୱାରା ଆମଦାନୀ କରାଯାଉଥିବା ପ୍ରମୁଖ ଚୀନ୍ ଉତ୍ପାଦଗୁଡ଼ିକ ମଧ୍ୟରେ କମ୍ପ୍ୟୁଟର ହାର୍ଡୱେୟାର, ଇଲେକ୍ଟ୍ରୋନିକ୍ସ, ଟେଲିକମ୍ ଉପକରଣ, ପ୍ଲାଷ୍ଟିକ୍ କଞ୍ଚାମାଲ, ରାସାୟନିକ ପଦାର୍ଥ ଏବଂ କ୍ରେନ୍ ଆଦି ଅନ୍ତର୍ଭୁକ୍ତ। ତେବେ ବର୍ତ୍ତମାନ, ଭାରତ ସରକାର ଚୀନ୍‌ରୁ ଆସୁଥିବା ରସାୟନିକ ପଦାର୍ଥ, ଗ୍ଲାସ୍ ଫାଇବର, ଏଳିଭେଟର ଗାଇଡ୍ ରେଲ୍, କମ୍ ଏଶ ମେଟ୍ କୋକ୍ ଏବଂ କ୍ରେନ୍ ଭଳି ଉତ୍ପାଦଗୁଡ଼ିକର ଡମ୍ପିଂ ନିରୋଧୀ ତଦନ୍ତ କରୁଛନ୍ତି। ଏହି ବିପଦର ମୁକାବିଲା କରିବା ପାଇଁ ସରକାର ସମସ୍ତ ଆବଶ୍ୟକୀୟ ପଦକ୍ଷେପ ନେଉଛନ୍ତି ଏବଂ ଚୀନ୍ ଉତ୍ପାଦଗୁଡ଼ିକ ଉପରେ କଟକଣାକୁ ଆହୁରି କଠୋର କରିବାକୁ ବିଚାର କରାଯାଉଛି।