ପାଟନା ୪।୪: ୱକଫ ସଂଶୋଧନ ବିଧେୟକ ଲୋକସଭା ପରେ ଗୁରୁବାର ରାଜ୍ୟସଭାରେ ମଧ୍ୟ ଗୃହୀତ ହୋଇଯାଇଛି। ସଂସଦରେ ଏହି ବିଧେୟକକୁ ଗୃହୀତ କରିବାରେ ନିତିଶ କୁମାରଙ୍କ ଜେଡିୟୁ ବିଜେପିକୁ ଭରପୁର ସାଥ ଦେଇଛି। ଏହି କାରଣରୁ ଏବେ ପାର୍ଟିକୁ ଝଟକା ପରେ ଝଟକା ଲାଗୁଛି। ଜେଡିୟୁର ମୁସଲମାନ ନେତାମାନେ ଜଣଜଣ କରି ପାର୍ଟି ଛାଡୁଛନ୍ତି। ଏ ସବୁ ମଧ୍ୟରେ ଏବେ ଖବର ଆସୁଛି ବିଲକୁ ନେଇ ଅସନ୍ତୁଷ୍ଟ ହିନ୍ଦୁ ନେତା ବି ପାର୍ଟି ଛାଡିଛନ୍ତି।
ବିଲ୍ ପ୍ରସଙ୍ଗରେ ମୁଜଫରପୁରର ଏମ.ରାଜୁ ନାୟର ଜେଡିୟୁର ସବୁ ପଦପଦବୀରୁ ଇସ୍ତଫା ଦେଇଛନ୍ତି। ରାଜୁ ନାୟର କହିଛନ୍ତି ଯେ ୱକଫ ବୋର୍ଡ ଉପରେ ସରକାର ଯେଉଁ ବିଧେୟକ ଆଣିଛନ୍ତି ଏଥିରେ ଆହତ ହୋଇ ମୁଁ ପାର୍ଟି ଛାଡିବାକୁ ନିଷ୍ପତ୍ତି ନେଲି। ଏହି ବିଧେୟକ ମୁସଲମାନଙ୍କ ସ୍ୱାର୍ଥ ବିରୋଧୀ। ନାୟର ଯୁବ ଜେଡିୟୁର ପ୍ରଦେଶ ସଚିବ ଥିଲେ ଓ ସୀତାମଢିରୁ ଲୋକସଭା ଆସନର ପ୍ରଭାରୀ ମଧ୍ୟ ଥିଲେ।
ଏହା ପୂର୍ବରୁ ଜେଡିୟୁର ବରିଷ୍ଠ ମୁସଲମାନ ନେତା ତଥା ପୂର୍ବତନ ସାଂସଦ ଅଶଫାକ କରୀମ, ଏମଏଲସି ଗୁଲାମ ଗୌସ ଓ ପୂର୍ବତନ ଏମଏଲସି ଗୁଲାମ ରସୁଲ ବଲିୟାଭି ମଧ୍ୟ ପାର୍ଟି ଛାଡିଥିଲେ। ସେମାନେ କହିଛନ୍ତି ଏବେ ଧର୍ମନିରପେକ୍ଷ ଓ ସାମ୍ପ୍ରଦାୟିକତାବାଦୀଙ୍କ ମଧ୍ୟରେ କୌଣସି ଫରକ ରହିଲାନି। ସେମାନେ ଏହି ବିଧେୟକ ବିରୋଧରେ ସୁପ୍ରିମକୋର୍ଟକୁ ଯିବାକୁ ଧମକ ଦେଇଛନ୍ତି।
ୱକଫ ବିଧାୟକକୁ ନେଇ ହେଉଥିବା ରାଜନୀତିରେ ପାର୍ଟି ମୁଖପାତ୍ର ରାଜୀବ ରଞ୍ଜନ କହିଛନ୍ତି ଯେ ଲୋକସଭାରେ ଆମର ୧୨ ଜଣ ସାଂସଦ ଅଛନ୍ତି ଓ ସେମାନେ ୱକଫ ବିଧେୟକ ସପକ୍ଷରେ ସଂସଦରେ ମତଦାନ କରିଛନ୍ତି। ରାଜ୍ୟସଭାରେ ଆମର ୪ ଜଣ ସାଂସଦ ଅଛନ୍ତି, ଆମେ ଏନଡିଏ ସହିତ ମଜଭୁତ ଭାବେ ଛିଡା ହୋଇଛୁ। ଜେଡିୟୁ ମୁଖପାତ୍ର କହିଛନ୍ତି ଯେ ନିତିଶ କୁମାରଙ୍କୁ କେହି ଧର୍ମନିରପେକ୍ଷତା ଶିଖାଇ ପାରିବେ ନାହିଁ। ତାଙ୍କଠୁ ଦେଶରେ ବଡ଼ ଧର୍ମନିରପେକ୍ଷ ନେତା ଅନ୍ୟ କେହି ନାହିଁ।
