ନୂଆଦିଲ୍ଲୀ ୪।୪: ବିରୋଧୀଙ୍କ ହଙ୍ଗାମା ମଧ୍ୟରେ ଲୋକସଭାକୁ ଶୁକ୍ରବାର ଅନିର୍ଦ୍ଧିଷ୍ଟ କାଳ ପର୍ଯ୍ୟନ୍ତ ସ୍ଥଗିତ କରିଦିଆଯାଇଛି। ଗୃହର କାର୍ଯ୍ୟ ଆରମ୍ଭ ହେବାମାତ୍ରେ କଂଗ୍ରେସ ସମେତ ବିରୋଧୀ ଦଳ ସାଂସଦମାନେ ନିଜନିଜ ଆସନରେ ଛିଡା ହୋଇ ସ୍ଲୋଗାନ ଦେବା ଆରମ୍ଭ କରିଥିଲେ। ଏଥିରେ କିଛି ସାଂସଦ ଗୃହର ମଝିକୁ ଚାଲି ଆସିଥିଲେ। ଅନ୍ୟପଟେ ବିଜେପିର ନିଶିକାନ୍ତ ଦୁବେଙ୍କ ସମେତ ଶାସକ ଦଳର କେତେକ ସଦସ୍ୟ ନିଜନିଜ ଆସନରେ ଛିଡା ହୋଇ ସୋନିଆ ଗାନ୍ଧି କ୍ଷମା ମାଗନ୍ତୁ ସ୍ଲୋଗାନ ଦେବା ଆରମ୍ଭ କରିଥିଲେ ।
ଏହା ସତ୍ତ୍ୱେ ବାଚସ୍ପତି ଓମ ବିରଳା ଗୃହରେ ପ୍ରଶ୍ନ କାଳ ଚଳାଇ ରଖିବାକୁ ଉଦ୍ୟମ କରିଥିଲେ। ତେବେ ଉଭୟ ଶାସକ ଓ ବିରୋଧୀ ଦଳଙ୍କ ହଟ୍ଟଗୋଳ ବଢିବା ଯୋଗୁ ବାଚସ୍ପତି ପ୍ରଥମେ ଗୃହକୁ ମଧ୍ୟାହ୍ନ ୧୨ଟା ପର୍ଯ୍ୟନ୍ତ ଓ ପରେ ଗୃହର କାର୍ଯ୍ୟକୁ ଅନିଶ୍ଚିତ କାଳ ପର୍ଯ୍ୟନ୍ତ ସ୍ଥଗିତ କରିଦେଇଛନ୍ତି। ଏହା ସହିତ ଲୋକସଭାର ବଜେଟ ଅଧିବେଶନ ସମାପ୍ତ ହୋଇଯାଇଛି। ଏହି ଅଧିବେଶନରେ ଲୋକସଭାରେ ମୋଟ ୨୬ଟି ବୈଠକ ହୋଇଥିଲା। ଏଥିରେ ଲୋକସଭାର ମୋଟ ଉତ୍ପାଦକତା ୧୧୮ ପ୍ରତିଶତରୁ ଅଧିକ ରହିଛି ବୋଲି ବାଚସ୍ପତି କହିଛନ୍ତି।
ଅଧିବେଶନ ଆରମ୍ଭରେ ରାଷ୍ଟ୍ରପତିଙ୍କ ଅଭିଭାଷଣ ଉପରେ ଧନ୍ୟବାଦ ଚର୍ଚ୍ଚାରେ ୧୭୩ ଜଣ ସଦସ୍ୟ ଅଂଶଗ୍ରହଣ କରିଥିଲେ। ସେହିପରି ସଦନରେ କେନ୍ଦ୍ରୀୟ ବଜେଟ୍ ଚର୍ଚ୍ଚାରେ ୧୬୯ ଜଣ ସଦସ୍ୟ ଭୋଗ ନେଇଛନ୍ତି। ଅଧିବେଶନ କାଳରେ ୧୦ ସରକାରୀ ବିଧେୟକ, ୱକଫ(ସଂଶୋଧନ) ବିଧେୟକ ୨୦୨୫ ସହିତ ମୋଟ ୧୬ଟି ବିଧେୟକ ଗୃହୀତ ହୋଇଛି। ସେହିପରି ଗୃହର ଶୂନ୍ୟ କାଳରେ ୨୦୨ ଜଣ ସଦସ୍ୟ ଜନହୀତକର ବିଷୟ ଉପସ୍ଥାପନ କରିଥିବା ବେଳେ ଏହା ସଦନର ଏକ ରେକର୍ଡ ବୋଲି ବାଚସ୍ପତି କହିଛନ୍ତି।
