ମୁମ୍ବାଇ ୪।୪: ମୁମ୍ବାଇରେ ଶୁକ୍ରବାର ଅପରାହ୍ନରେ ଧୂଳି ଝଡ଼ ହୋଇଛି, ଫଳରେ ଦୃଶ୍ୟତା ହ୍ରାସ ହୋଇଥିଲା। ଧୂଳିଝଡ ମୁମ୍ବାଇବାସୀଙ୍କୁ ବେଶ୍ ପ୍ରଭାବିତ କରିଛି। ଭୀଷଣ ଧୂଳି ଝଡ଼ ସାଙ୍ଗକୁ ବର୍ଷା ସହରର ଯାତାୟାତ ଓ ଲୋକାଲ ଟ୍ରେନ ପରିଚାଳନାକୁ ପ୍ରଭାବିତ କରିଛି। ଠାଣେର ଥକୁରପଡ଼ା ଅଞ୍ଚଳରେ ଏକ ଘରର ଛାତ ଉପରେ ଥିବା ଘର ଝଡତୋଫାନରେ କ୍ଷତିଗ୍ରସ୍ତ ହୋଇଛି। ଏହି ଘଟଣାରେ କେହି ହତାହତ ହୋଇଥିବାର ଖବର ନାହିଁ।
ପାଣିପାଗ ବିଭାଗ ଜାରି କରିଥିବା ସତର୍କତାରେ ମୁମ୍ବାଇର ଅଲଗା ଅଲଗା ସ୍ଥାନରେ ଘଡ଼ଘଡ଼ି ବିଜୁଳି ସହ ହାଲୁକା ବର୍ଷା ସାଙ୍ଗକୁ ଝଡତୋଫାନ ହୋଇପାରେ ବୋଲି ପୂର୍ବାନୁମାନ କରିଛନ୍ତି। ଏହି ସମୟରେ ଘଣ୍ଟା ପ୍ରତି ୩୦ରୁ ୪୦ କିଲୋମିଟର ବେଗରେ ପବନ ବହିପାରେ ବୋଲି କୁହାଯାଇଛି। ତେବେ ଧୂଳି ଝଡ଼ ଯୋଗୁ ଆର୍ଥିକ ମହାନଗରୀରେ ସେଭଳି କୌଣସି କ୍ଷୟକ୍ଷତି ହୋଇ ନାହିଁ। ଅଗ୍ନିସମ ବିଭାଗ ଅଧିକାରୀଙ୍କ ସୂଚନା ଅନୁସାରେ ଥକୁରପଡ଼ାର ଏକ ୭ମହଲା କୋଠାର ଛାତ ଉପରେ ଥିବା ଏକ ଅସ୍ଥାୟୀ ନିର୍ମାଣ ଝଡ ତୋଫାନରେ ଭୂଷୁଡି ପଡିଛି।
ଝଡତୋଫାନ ବେଳେ ମିଳିଥିବା ସୂଚନା ଅନୁସାରେ ଦମକଳ ବିଭାଗ ତୁରନ୍ତ ଘଟଣାସ୍ଥଳକୁ ପହଞ୍ଚିଥିଲା। ସେତେବେଳକୁ ଛାତ ଉପରେ ଥିବା ଘରଟି ଭୁଶୁଡି ପଡିଥିଲା। ଘରଟି ସମ୍ପୂର୍ଣ୍ଣ କ୍ଷତିଗ୍ରସ୍ତ ହୋଇଥିବା ବେଳେ ୨ଟି ଟିମ୍ କୁ ସେଠାରେ ମୁତୟନ କରାଯାଇଛି। ଏଥିରେ ସ୍ଥାନୀୟ ଲୋକେ ମଧ୍ୟ ଦମକଳ ବିଭାଗ କର୍ମଚାରୀଙ୍କୁ ସହାୟତା କରିଛନ୍ତି। ଭୁଶୁଡି ପଡିଥିବା ଘରେ କେହି ରହୁ ନଥିଲେ।
