ନୂଆଦିଲ୍ଲୀ ୪।୪: ସୀମାବର୍ତ୍ତି ଗ୍ରାମଗୁଡିକ ଲାଗି କାର୍ଯ୍ୟକାରୀ କରାଯାଉଥିବା ଭାଇବ୍ରାଣ୍ଟ ଭିଲେଜ କାର୍ଯ୍ୟକ୍ରମର ଦ୍ୱିତୀୟ ପର୍ଯ୍ୟାୟକୁ ଶୁକ୍ରବାର କେନ୍ଦ୍ର କ୍ୟାବିନେଟର ମଞ୍ଜୁରୀ ମିଳିଛି। ଗ୍ରାମମାନଙ୍କୁ ମୌଳିକ ସୁବିଧା ପ୍ରଦାନ କରିବା ଓ ପଳାୟନ ରୋକିବା ଉଦ୍ଦେଶ୍ୟରେ ଏହି ଯୋଜନା କାର୍ଯ୍ୟକାରୀ କରାଯାଉଛି। ଏହି ଯୋଜନା ବିହାର, ଜମ୍ମୁ-କାଶ୍ମୀର, ପଞ୍ଜାବ, ଉତ୍ତରାଖଣ୍ଡ, ଉତ୍ତରପ୍ରଦେଶ ଓ ପଶ୍ଚିମବଙ୍ଗ ସମେତ ୧୫ ରାଜ୍ୟ ଓ କେନ୍ଦ୍ର ଶାସିତ ପ୍ରଦେଶର ବଛାବଛା ଗାଁରେ କାର୍ଯ୍ୟକାରୀ କରାଯାଉଛି।
ଏହି ଯୋଜନାରେ ଗ୍ରାମମାନଙ୍କ ଲାଗି ବାରମାସ ସଡ଼କ ସଂଯୋଗ, ଦୂରସଞ୍ଚାର, ଟେଲିଭିଜନ ସମ୍ପର୍କ ଓ ବିଦ୍ୟୁତକରଣ କାର୍ଯ୍ୟ ଆଦି କରାଯାଉଛି । ୨୦୨୪-୨୫ରୁ ୨୦୨୮-୨୯ ମଧ୍ୟରେ ଏହି ଯୋଜନାରେ ୬,୮୩୯ କୋଟି ଟଙ୍କା ଖର୍ଚ୍ଚ କରାଯିବ। ଭାଇବ୍ରାଣ୍ଟ ଭିଲେଜ କାର୍ଯ୍ୟକ୍ରମର ଦ୍ୱିତୀୟ ପର୍ଯ୍ୟାୟରେ ଚୀନ୍, ପାକିସ୍ତାନ, ବାଂଲାଦେଶ ଓ ମିଆଁମାରକୁ ଲାଗି ରହିଥିବା ସବୁ ଭାରତୀୟ ଗ୍ରାମକୁ କଭର କରିବା ପାଇଁ ଯୋଜନା କରାଯାଇଛି।
କ୍ୟାବିନେଟ୍ ନିଷ୍ପତ୍ତିର ସୂଚନା ଦେଇ କେନ୍ଦ୍ର ମନ୍ତ୍ରୀ ଅଶ୍ୱିନୀ ବୈଷ୍ଣବ କହିଛନ୍ତି ଯେ ଦ୍ୱିତୀୟ ପର୍ଯ୍ୟାୟରେ ରଣନୈତିକ ରୂପେ ଗୁରୁତ୍ୱପୂର୍ଣ୍ଣ ଗ୍ରାମକୁ ଚିହ୍ନଟ କରାଯିବ ଓ ଏହା ପରେ ୧୦୦ ପ୍ରତିଶତ କେନ୍ଦ୍ରୀୟ ସହାୟତାରେ ଯୋଜନା ଲାଗୁ କରାଯିବ। ଏହା ଦ୍ୱାରା ଗାଁ ଓ ଗ୍ରାମ ସମୂହର ଭିତ୍ତିଭୂମିକ ବିକାଶ, କୋ-ଅପରେଟିଭ ସୋସାଇଟି ଓ ସ୍ୱୟଂସହାୟକ ଗ୍ରୁପ ମାଧ୍ୟମରେ ରୋଜଗାର ଅବସର ସୃଷ୍ଟି କରିବା, ସୀମା ଅନୁସାରେ ବିଶେଷ ଗତିବିଦ୍ଧି ଆରମ୍ଭ କରିବା, ସ୍ମାର୍ଟ ଶ୍ରେଣୀ ସହିତ ସ୍କୁଲ ଗୃହ ନିର୍ମାଣ ଓ ପର୍ଯ୍ୟଟନ ସୁବିଧା ବିକାଶ ଆଦି କାମ କରାଯିବ।
ସରକାର ୨୦୨୩ ମସିହାରେ ଭାଇବ୍ରାଣ୍ଟ ଭିଲେଜ କାର୍ଯ୍ୟକ୍ରମ ହାତକୁ ନେଇଥିଲେ। ଏଥିରେ ଚୀନ୍ ସୀମାକୁ ଲାଗି ରହିଥିବା ଲଦ୍ଦାଖ, ହିମାଚଳ ପ୍ରଦେଶ, ଉତ୍ତରାଖଣ୍ଡ ଓ ଅରୁଣାଚଳ ପ୍ରଦେଶର ୬୬୩ଟି ଗ୍ରାମରେ ପଳାୟନ ରୋକିବା ଲାଗି ବିକାଶ ଯୋଜନା ଆରମ୍ଭ କରାଯାଇଥିଲା। ପ୍ରଥମ ପର୍ଯ୍ୟାୟ କାର୍ଯ୍ୟକ୍ରମର ସଫଳତା ପରେ ସରକାର ଏବେ ଦ୍ୱିତୀୟ ପର୍ଯ୍ୟାୟ କାର୍ଯ୍ୟକ୍ରମ ନିମନ୍ତେ ସବୁଜ ସଂକେତ ଦେଇଛନ୍ତି।
