ନୂଆଦିଲ୍ଲୀ: ପ୍ରାଇଭେଟ୍ ଟେଲିକମ୍ କମ୍ପାନି ତୁଳନାରେ ବିଏସ୍ଏନ୍ଏଲ୍ ୟୁଜର୍ସଙ୍କ ପସନ୍ଦ ପାଲଟୁଛି । ସରକାରୀ ଟେଲିକମ୍ ବିଏସ୍ଏନ୍ଏଲ୍ ଗତ ସାତ ମାସରେ ୫୫ ଲକ୍ଷରୁ ଅଧିକ ନୂଆ ଗ୍ରାହକଙ୍କୁ ନିଜ ସହ ଯୋଡ଼ିଛି । ଏହାସହ କମ୍ପାନିର ମୋଟ ସବସ୍କ୍ରାଇବର୍ସଙ୍କ ସଂଖ୍ୟା ବଢି ୯.୧ କୋଟି ହୋଇଛି ।
କେନ୍ଦ୍ର ଦୂରସଂଚାର ମନ୍ତ୍ରୀ ଜ୍ୟୋତିରାଦିତ୍ୟ ସିନ୍ଧିଆ ରାଜ୍ୟସଭାରେ ଏକ ପ୍ରଶ୍ନର ଜବାବ ଦେଇଛନ୍ତି । ମନ୍ତ୍ରୀ କହିଛନ୍ତି ୨୦୨୪ ଜୁନ୍ଠୁ ଚଳିତ ବର୍ଷ ଫେବ୍ରୁଆରୀ ମଧ୍ୟରେ ଗ୍ରାହକଙ୍କ ସଂଖ୍ୟା ୮.୫୫ କୋଟିରୁ ବଢି ୯.୧ କୋଟି ହୋଇଛି । ପିଏମ୍ ନରେନ୍ଦ୍ର ମୋଦୀ ସରକାରଙ୍କ ନୀତି କାରଣରୁ ସରକାରୀ କମ୍ପାନି ୧୮ ବର୍ଷ ପରେ ଅକ୍ଟୋବର-ଡିସେମ୍ୱର ତ୍ରୈମାସରେ ଲାଭ କରିଛି ।
ଜ୍ୟୋତିରାଦିତ୍ୟ ସିନ୍ଧିଆ କହିଛନ୍ତି ଯେ ବିଏସ୍ଏନ୍ଏଲ୍ ଦେଶର ସେହି ସବୁ ଗାଁରେ 4G ମୋବାଇଲ୍ ସେବା ପହଞ୍ଚିବା ଉପରେ କାମ କରୁଛି, ଯେଉଁଠି ଆଜି ଯାଏ ମୋବାଇଲ୍ ସେବା ପହଞ୍ଚିପାରି ନାହିଁ । ଏହି ପରିଯୋଜନାକୁ କେନ୍ଦ୍ର ମନ୍ତ୍ରିମଣ୍ଡଳର ମଞ୍ଜୁରି ମିଳିସାରିଛି । ଏଥିପାଇଁ ମୋଟ ୨୬,୩୧୬ କୋଟି ଟଙ୍କା ଖର୍ଚ୍ଚ କରାଯିବ । ଏଥିରେ 2G ବିଟିଏସକୁ 4Gରେ ଅପଗ୍ରେଡ୍ କରିବା ସାମିଲ ରହିଛି । ବିଏସ୍ଏନ୍ଏଲ୍ ଏଲଡବ୍ଲୁଇ ପର୍ଯ୍ୟାୟ-୧ରେ ସ୍ଥାପିତ ୨୩୪୩ 2G ବିଟିଏସକୁ 2Gରୁ 4G କରାଯାଉଛି ।
ଅନ୍ୟପଟେ ଦୂଚସଂଚାର ରାଷ୍ଟ୍ରମନ୍ତ୍ରୀ ପମ୍ମାସାନି ଚନ୍ଦ୍ରଶେଖର ସଂସଦରେ ସୂଚନା ଦେଇଥିଲେ ଯେ BSNL 700 MHz, 3300 MHz ଏବଂ 26 GHz ବ୍ୟାଣ୍ଡରେ 5G ପାଇଁ ସ୍ପେକ୍ଟ୍ରମ୍ ଅଧିଗ୍ରହଣ କରିଛି । ଏହା ବ୍ୟତୀତ, କମ୍ପାନୀ ୧ ଲକ୍ଷ 4G ସାଇଟ୍ ପାଇଁ ମଧ୍ୟ ଲକ୍ଷ୍ୟ ରଖିଛି । ଗୁରୁତ୍ୱପୂର୍ଣ୍ଣ କଥା ହେଉଛି ଏହି ସାଇଟଗୁଡ଼ିକୁ ସହଜରେ 5Gକୁ ଅପଗ୍ରେଡ୍ କରାଯାଇପାରିବ । ୮ ମାର୍ଚ୍ଚ ସୁଦ୍ଧା, ବିଏସଏନଏଲ ଦ୍ୱାରା ୮୩,୯୯୩ଟି 4G ସାଇଟ୍ ବିକଶିତ କରାଯିବ । ଏପର୍ଯ୍ୟନ୍ତ ୭୪,୫୨୧ ସ୍ଥାନରେ କାମ ଆରମ୍ଭ ହୋଇସାରିଛି ।
