ନୂଆଦିଲ୍ଲୀ: ଗତକାଲି(ଏପ୍ରିଲ-୩) ଥାଇଲାଣ୍ଡରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓ ବାଂଲାଦେଶ ମଧ୍ୟବର୍ତ୍ତୀ କାଳୀନ ସରକାର ମୁଖ୍ୟ ମହମ୍ମଦ ୟୁନୁସଙ୍କର ରାତ୍ରୀ ଭୋଜନର ଫଟୋ ସାମ୍ନାକୁ ଆସିଥିଲା। ଏହାପରେ ଦୁଇ ଦେଶ ମଧ୍ୟରେ ଦ୍ୱିପାକ୍ଷିକ ଆଲୋଚନା ହୋଇପାରେ ବୋଲି ଅନୁମାନ କରାଯାଉଥିଲା। କଥା ସତ ହେଲା। ଆଜି ଦୁଇ ନେତାଙ୍କ ମଧ୍ୟରେ ଦ୍ୱିପାକ୍ଷିକ ଆଲୋଚନା ହୋଇଛି। 

ୟୁନୁସଙ୍କ ସହିତ ଆଲୋଚନା ବେଳେ ପ୍ରଧାନମନ୍ତ୍ରୀ ମୋଦୀ ରୋକ୍‌ଠୋକ୍ ଶୁଣାଇଛନ୍ତି। ଦୁଇ ଦେଶର ସମ୍ପର୍କ ବିଗିଡ଼ିବା ଭଳି ବୟାନବାଜୀ ବନ୍ଦ କରିବା ସହିତ ଦେଶରେ ହିନ୍ଦୁଙ୍କ ସୁରକ୍ଷା ସୁନିଶ୍ଚିତ କରନ୍ତୁ ବୋଲି ମୋଦୀ ୟୁନୁସଙ୍କୁ କହିଛନ୍ତି। 

ରାତ୍ରୀ ଭୋଜନ ସମୟର ଫଟୋ

ଥାଇଲ୍ୟାଣ୍ଡରେ ଅନୁଷ୍ଠିତ ବିମଷ୍ଟେକ୍ (BIMSTEC ବେ ଅଫ୍ ବେଙ୍ଗଲ ଇନିସିଏଟିଭ୍ ଫର୍ ମଲ୍ଟି-ସେକ୍ଟରାଲ୍ ଟେକ୍ନିକାଲ୍ ଆଣ୍ଡ୍ ଇକୋନୋମିକ୍ କୋଅପରେସନ୍) ସମ୍ମିଳନୀରେ ଦୁଇ ନେତା ପରସ୍ପରକୁ ଭେଟିଥିଲେ। ସେମାନଙ୍କ ଆଲୋଚନା ସମୟରେ, ପ୍ରଧାନମନ୍ତ୍ରୀ ମୋଦୀ ସାମ୍ପ୍ରତିକ ତିକ୍ତତା ସତ୍ତ୍ୱେ ବାଂଲାଦେଶ ସହିତ ସମ୍ପର୍କକୁ ସୁଦୃଢ଼ କରିବା ପାଇଁ ଭାରତର ପ୍ରତିବଦ୍ଧତାକୁ ପୁନଃ ଦୋହରାଇ ଥିଲେ।

ଏନେଇ ବୈଦେଶିକ ସଚିବ ବିକ୍ରମ ମିସ୍ରି କହିଛନ୍ତି “ପ୍ରଧାନମନ୍ତ୍ରୀ ମୋଦୀ ଏକ ଗଣତାନ୍ତ୍ରିକ, ସ୍ଥିର, ଶାନ୍ତିପୂର୍ଣ୍ଣ, ପ୍ରଗତିଶୀଳ ଏବଂ ଇନକ୍ଲୁସିଭ୍ ବାଂଲାଦେଶ ପାଇଁ ଭାରତର ସମର୍ଥନକୁ ଦୋହରାଇଲେ। ସେ ପ୍ରଫେସର ୟୁନୁସ ବାଂଲାଦେଶ ସହିତ ଏକ ସକାରାତ୍ମକ ଏବଂ ଗଠନମୂଳକ ସମ୍ପର୍କ ସ୍ଥାପନ କରିବାକୁ ଭାରତର ଇଚ୍ଛାକୁ ଦର୍ଶାଇଥିଲେ। ପରିବେଶକୁ ନଷ୍ଟ କରୁଥିବା ଯେକୌଣସି ବୟାନବାଜିକୁ ଏଡାଇବା ଉଚିତ ବୋଲି ପ୍ରଧାନମନ୍ତ୍ରୀ କହିଥିଲେ।”

ବୈଦେଶିକ ସଚିବ ବିକ୍ରମ ମିସ୍ରି

୨୦୨୪ ଅଗଷ୍ଟ ମାସରେ ବାଂଲାଦେଶରେ ଶେଖ ହସିନାଙ୍କ ସରକାରର ପତ୍ତନ ପରେ ଭାରତ ସହିତ ସମ୍ପର୍କ ଖରାପ ହୋଇଛି। ବାଂଲାଦେଶରେ ହିନ୍ଦୁଙ୍କ ଉପରେ ହେଉଥିବା ଆକ୍ରମଣ ଓ ସେଠାକାର ନେତା ଓ ଜନତାଙ୍କର ଭାରତ ବିରୋଧୀ ମାନୋଭାବ ଦୁଇ ଦେଶର ସମ୍ପର୍କକୁ ତିକ୍ତ କରିଦେଇଛି। 

ୟୁନୁସଙ୍କ ସହିତ ଆଲୋଚନା ବେଳେ ପ୍ରଧାନମନ୍ତ୍ରୀ ମୋଦୀ ହିନ୍ଦୁଙ୍କ ସୁରକ୍ଷା ନେଇ ଚିନ୍ତା ବ୍ୟକ୍ତ କରିଥିଲେ। ବାଂଲାଦେଶରେ ସଂଖ୍ୟାଲଘୁଙ୍କ ଉପରେ ହେଉଥିବା ଅତ୍ୟାଚାର ମାମଲାଗୁଡ଼ିକର ସଠିକ ତଦନ୍ତ କରି ନ୍ୟାୟ ଦେବାକୁ ପ୍ରଧାନମନ୍ତ୍ରୀ କହିଥିବା ମିସ୍ରି ସୂଚନା ଦେଇଛନ୍ତି।  

ମୋଦୀ ଓ ୟୁନୁସଙ୍କ ମଧ୍ୟରେ ଆଲୋଚନା ବେଳେ ସୀମା ସୁରକ୍ଷା ମଧ୍ୟ ପ୍ରମୁଖ ପ୍ରସଙ୍ଗ ହୋଇଥିଲା। ବେଆଇନ ସୀମା ପାର ରୋକିବା ପାଇଁ ଆଇନର କଠୋର ପ୍ରୟୋଗ ଉପରେ ଗୁରୁତ୍ୱାରୋପ କରିଥିଲେ ପ୍ରଧାନମନ୍ତ୍ରୀ। ଏହି ଆଲୋଚନା ସମୟରେ ବୈଦେଶିକ ମନ୍ତ୍ରୀ ଏସ ଜୟଶଙ୍କର ଏବଂ ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲ ମଧ୍ୟ ଉପସ୍ଥିତ ଥିଲେ।

ବ୍ୟାଙ୍ଗ୍‌କକ୍‌ରେ ଦୁଇ ନେତାଙ୍କ ମଧ୍ୟରେ ଆଲୋଚନା ପରେ ବାଂଲାଦେଶର ମୁଖ୍ୟ ପରାମର୍ଶଦାତା ମହମ୍ମଦ ୟୁନୁସ୍ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ସେମାନଙ୍କର ଏକ ପୁରୁଣା ଫଟୋ ପ୍ରଦାନ କରିଥିଲେ। ଏହି ଫଟୋଗ୍ରାଫଟି ୩ ଜାନୁଆରୀ ୨୦୧୫ରେ ମୁମ୍ବାଇରେ ଅନୁଷ୍ଠିତ ୧୦୨ତମ ଭାରତୀୟ ବିଜ୍ଞାନ କଂଗ୍ରେସରେ ଏକ ଉଠା ଯାଇଥିଲା। ଯେଉଁଠାରେ ପ୍ରଧାନମନ୍ତ୍ରୀ ମୋଦି ୟୁନୁସଙ୍କୁ ସ୍ୱର୍ଣ୍ଣ ପଦକ ପ୍ରଦାନ କରିଥିଲେ।

ୟୁନୁସଙ୍କ ଉପ-ପ୍ରେସ ସଚିବ ଆବୁଲ କଲାମ ଆଜାଦ ମଜୁମଦାର ଏନେଇ ସୂଚନା ଦେଇଛନ୍ତି। ସେ କହିଛନ୍ତି ଯେ ୟୁନୁସ ସଦିଚ୍ଛାର ନିଦର୍ଶନ ସ୍ୱରୂପ ଏହି ଫଟୋଟି ଉପହାର ଦେଇଛନ୍ତି। ଦୁଇ ଦେଶ ମଧ୍ୟରେ ଉତ୍ତେଜନା ଲାଗି ରହିଥିବା ସତ୍ତ୍ୱେ, ଫଟୋ ଉଠାଇବା ସମୟରେ ଦୁଇ ନେତା ହସ ହସ ମୁହଁରେ ଥିଲେ।