ନୂଆଦିଲ୍ଲୀ: ଚୀନ ଶୁକ୍ରବାର ଆମେରିକା ଉପରେ ପାଲଟା କାର୍ଯ୍ୟାନୁଷ୍ଠାନ ନେଇଛି । ୱାଶିଂଟନରୁ ଆମଦାନୀ ହେଉଥିବା ସାମଗ୍ରୀ ଉପରେ ୩୪ ପ୍ରତିଶତ ଅତିରିକ୍ତ ଶୁଳ୍କ ଲଗାଇଛି । ରାଷ୍ଟ୍ରପତି ଟ୍ରମ୍ପଙ୍କ ଦ୍ୱାରା ଚୀନ ରପ୍ତାନୀ ସାମଗ୍ରୀ ଉପରେ ୩୪ ପ୍ରତିଶତ ଶୁଳ୍କ ଲାଗୁ କରାଯିବା ପରେ ଜିନପିଙ୍ଗ ସରକାର ଏହି ନିଷ୍ପତ୍ତି ନେଇଛି । ଚୀନ ସରକାରୀ ନ୍ୟୁଜ୍ ଏଜେନ୍ସି ଶିନ୍ୟୁହା ରିପୋର୍ଟ ଅନୁସାରେ, ଏପ୍ରିଲ୍ ୧୦ରେ ଆମେରିକୀୟ ସାମଗ୍ରୀ ଉପରେ ଟାରିଫ୍ ଲଗାଯିବ । ଏହା ବ୍ୟତୀତ ଚୀନ ବିଶ୍ୱ ବାଣିଜ୍ୟ ସଂଗଠନରେ ମାମଲା ଦାଖଲ କରିଛି ।
ବେଜିଂର ବାଣିଜ୍ୟ ମନ୍ତ୍ରଣାଳୟ କହିଛି ଯେ ପୃଥିବୀର ସାତ ଦୁର୍ଲଭ ତତ୍ୱର ରପ୍ତାନୀକୁ ନିୟନ୍ତ୍ରଣକୁ ଆଣିଛି । ଏଥିରେ ଗେଡୋଲିନିୟମ (ଯାହାକୁ ମୁଖ୍ୟତଃ ଏମଆରଆଇରେ ବ୍ୟବହାର କରାଯାଏ), ୟିଟ୍ରିୟମ (ଯାହାକୁ ଇଲେକ୍ଟ୍ରୋନିକ୍ସରେ ବ୍ୟବହାର କରାଯାଏ) ସାମିଲ ରହିଛି । ଏହା ବ୍ୟତୀତ ମନ୍ତ୍ରଣାଳୟ ନିଜ ବୟାନ କହିଛି, 'ଚୀନ ଡବ୍ଲୁଟିଓ ବିବାଦ ସମାଧାନ ତନ୍ତ୍ର ଅଧିନରେ ମକୋଦ୍ଦମା ଦାଖଲ କରିଛି ।'
ଏହା ବ୍ୟତୀତ ଚୀନ ୧୧ ଆମେରିକୀୟ ପ୍ରତିରକ୍ଷା କମ୍ପାନିକୁ ଅବିଶ୍ୱସନୀୟ ୟୁନିଟ୍ ଲିଷ୍ଟରେ ମଧ୍ୟ ଯୋଡ଼ିଛି । ୧୬ ଆମେରିକୀୟ ଫାର୍ମା ଉପରେ ରପ୍ତାନୀ ନିୟନ୍ତ୍ରଣ ଲଗାଇବାକୁ ଯାଉଛି । ଜାନୁଆରୀରେ ହ୍ୱାଇଟ୍ ହାଉସକୁ ଫେରିବା ପରଠୁ ୱାଶିଂଟନ ଓ ବେଜିଂ ମଧ୍ୟରେ ତିକ୍ତତା ବଢିବାରେ ଲାଗିଛି । ଟାରିଫକୁ ନେଇ ଆମେରିକା ଓ ବିଶ୍ୱର ସବୁ ମଧ୍ୟରେ ବିବାଦ ବଢିଛି । ଏପ୍ରିଲ୍ ଦୁଇରେ ଆମେରିକା ପକ୍ଷରୁ ୧୮୦ ଦେଶ ଉପରେ ପାରସ୍ପରିକ ଶୁଳ୍କ ଲାଗୁ କରାଯାଇଥିବା ନେଇ ଘୋଷଣା କରିଥିଲେ ।
