ବ୍ରହ୍ମପୁର ୯/୧: NH-୧୬ ଲାଞ୍ଜିପଲ୍ଲୀ ନିକଟ ନିର୍ମାଣାଧୀନ କୋଠାରୁ ବୋମା ବ୍ୟାଗ ଜବତ ଘଟଣା । ପ୍ରତିକ୍ରିୟା ରଖିଛନ୍ତି ବ୍ରହ୍ମପୁର ଏସ୍‌ପି ଶ୍ରବଣା ବିବେକ ଏମ୍‌ । କହିଛନ୍ତି ଘଟଣାରେ ଜଣକୁ ଅଟକ ରଖି ପଚରାଉଚରା କରାଯାଉଛି । ଖୁବ ଶୀଘ୍ର ଅନ୍ୟ ଅପରାଧୀଙ୍କୁ ଗିରଫ କରାଯିବ । ଏହି ନିର୍ମାଣାଧୀନ କୋଠାରେ ଅପରାଧିକ କାର୍ଯ୍ୟକଳାପ ଚାଲିଥିବା ଖବର ପାଇ ପୋଲିସ ପାଟ୍ରୋଲିଂ ଟିମ୍ ପହଞ୍ଚି ଥିଲା । ପୋଲିସକୁ ଦେଖି ୪ ଜଣ ସେଠାରୁ ଚମ୍ପଟ ମାରିଥିଲେ । 

ପରେ ସେହି ଘରେ ଏକ ବ୍ୟାଗରେ ୭ଟି ବୋମା ଥିବା ଜାଣିବାକୁ ପାଇଥିଲା ପୋଲିସ । ବୋମା ନିଷ୍କିୟକାରୀ ଟିମ୍‌ ସେଠାରେ ପହଞ୍ଚି  ୭ଟି ବୋମାକୁ ନିଷ୍କ୍ରିୟ କରିଥିଲେ । ଘଟଣାରେ ସମ୍ପୃକ୍ତ ଥିବା ଜଣଙ୍କୁ ଅଟକ ରଖି ପଚରାଉଚୁରା କରାଯାଉଛି। ଅଟକ ବ୍ୟକ୍ତିଙ୍କ  ନାଁରେ ପୂର୍ବରୁ ରହିଛି ଅନେକ ଅପରାଧିକ ମାମଲା । ସ୍ଥାନୀୟ ଅଞ୍ଚଳରେ ପୋଲିସ ପାଟ୍ରୋଲିଂ ଜୋରଦାର କରାଯାଇଛି । 

କିଛି ଦିନ ହେଲାଣି ବ୍ରହ୍ମପୁରରେ ବଢି ଚାଲିଛି ଅପରାଧ । ଅପରାଧୀଙ୍କୁ ଚେକ୍‌ ଦେବାକୁ ବିଭିନ୍ନ ସ୍ଥାନରେ ବ୍ଲକିଂ ଚେକିଂ କରୁଛି ପୋଲିସ । ସହର ବାହାରେ ଥିବା ନିର୍ମାଣାଧୀନ ଘର ବି ତଲାସୀ କରାଯାଉଛି । ଅପରାଧୀମାନେ ଏପରି ଘରକୁ ଟାର୍ଗେଟ କରୁଛନ୍ତି । ନିଛାଟିଆର ସୁଯୋଗ ନେଇ ଆଡ୍ଡା କରିବା ସହ ଅପରାଧ ଘଟାଇବାକୁ ତିଆରି କରୁଛନ୍ତି ବ୍ଲୁ ପ୍ରିଣ୍ଟ ।