ଚାନ୍ଦବାଲି ୦୪/୪: ଆମ କ୍ଷୀରକୁ ବାରମ୍ବାର ନିମ୍ନମାନର କହୁଛନ୍ତି । ଦର ବଢାଇବାକୁ ଦାବି କଲେ ଶୁଣୁନାହାନ୍ତି । ଏମିତି ଅଭିଯୋଗ ଆଣି ରାଗରେ ପଞ୍ଚମ ହୋଇଯାଇଛନ୍ତି ଗୋପାଳକ ବା ଦୁଗ୍ଧ ଚାଷୀ । ରାସ୍ତାରେ ଡ୍ରମ ଡ୍ରମ କ୍ଷୀର ଢାଳି ଜଣାଇଛନ୍ତି ପ୍ରତିବାଦ । ଭଦ୍ରକ ଜିଲ୍ଲା ଚାନ୍ଦବାଲି ଏନଏସିରେ ଥିବା ଦୁଗ୍ଧ ଉତ୍ପାଦକ ସମବାୟ ସମିତି ସମ୍ମୁଖରେ ଦେଖାଦେଇଛି ଉତ୍ତେଜନା । ସମବାୟ ସମିତି ସେମାନଙ୍କ କ୍ଷୀରକୁ ନିମ୍ନମାନର କହି ନେବାକୁ ମନା କରିବାରୁ ସବୁ କ୍ଷୀର ରାସ୍ତାରେ ଢାଳି ଦେଇଛନ୍ତି ଚାଷୀ ।
ସେମାନଙ୍କର ଅଭିଯୋଗ ହେଉଛି ଦୁଗ୍ଧ ଉତ୍ପାଦ କେନ୍ଦ୍ରର କର୍ମଚାରୀମାନେ ଜାଣିଶୁଣି କ୍ଷୀରକୁ ନିମ୍ନମାନର କହୁଛନ୍ତି । ପ୍ରାୟ ୧ହଜାର ଲିଟରରୁ ଅଧିକ କ୍ଷୀରକୁ ନାକଚ କରିଦେଇଛନ୍ତି । ଲିଟର ପିଛା ୩୦ରୁ ୩୨ ଟଙ୍କା ନିଆଯାଉଛି । ହେଲେ ବଜାରରେ ୫୪ ଟଙ୍କାରେ ବିକ୍ରି କରୁଛନ୍ତି । କ୍ଷୀର ମୂଲ୍ୟ ବଢାଇବାକୁ ଆମେ ବାରମ୍ବାର ସମିତି ନିକଟରେ ଦାବି କରିଛୁ । ହେଲେ ସେମାନେ ଆମର କୌଣସି କଥା ଶୁଣୁନାହାନ୍ତି । ସେଥିପାଇଁ ଆମେ ନିରାଶ ହୋଇ ରାଗ ଓ କ୍ଷୋଭରେ ଏତେ ପରିମାଣର କ୍ଷୀର ଢାଳିବାକୁ ବାଧ୍ୟ ହେଉଛୁ ।
ଚାଷୀ ଏପରି ଅଭିଯୋଗ କରୁଥିବାବେଳେ ଦୁଗ୍ଧ ଉତ୍ପାଦକ କେନ୍ଦ୍ରର ଫିଲ୍ଡ ଅଫିସରଙ୍କ ପ୍ରତିକ୍ରିୟା ବି ଆସିଛି । ସେ କହିଛନ୍ତି ଅପମିଶ୍ରଣ କ୍ଷୀର ପରୀକ୍ଷା ପରେ ଆମେ ଫେରାଇ ଦେଇଥିଲୁ । ଦୁଗ୍ଧ ଟାଷୀ ନିମ୍ନମାନର କ୍ଷୀର ଆଣିଲେ ଆମେ ଗ୍ରହଣ କରିବୁନି ବୋଲି ରୋକ୍ଠୋକ୍ ଶୁଣାଇ ଦେଇଛନ୍ତି ଚାନ୍ଦବାଲି ଦୁଗ୍ଧ ଉତ୍ପାଦନ କେନ୍ଦ୍ରର ଫିଲ୍ଡ ଅଫିସର ମନୋଜ ମହାରଣା ।
