ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ । ଅବୈଧ ପ୍ରବାସୀଙ୍କ ପ୍ରତି ରଖିଛନ୍ତି କଠୋର ମନୋଭାବ । ଟ୍ରମ୍ପ ଏହି ମାମଲାରେ ନା ହିଁ ଶାନ୍ତି ଚାହୁଁଛନ୍ତି, ନା ମାମଲାକୁ କରିବାକୁ ଚାହୁଁଛନ୍ତି ଥଣ୍ଡା । ଏଥିପାଇଁ ସେ ଅବୈଧ ପ୍ରବାସୀଙ୍କୁ ନେଇ ଦେଉଛନ୍ତି ଅନେକ ବୟାନ । ନିକଟରେ ଟ୍ରମ୍ପଙ୍କ ବୟାନ ଅବୈଧ ପ୍ରବାସୀଙ୍କୁ କରିଛି ଭୟଭୀତ । ଟ୍ରମ୍ପ କହିଛନ୍ତି ଅବୈଧ ପ୍ରବାସୀଙ୍କୁ ରଖାଯିବ ବିଶ୍ୱର ସବୁଠାରୁ ବିପଦପୂର୍ଣ୍ଣ ଜେଲ୍ରେ । ଯାହା ପରେ ବଢିଛି ଚିନ୍ତା । ଏହି ଜେଲ୍କୁ କୁହାଯାଏ ବିଶ୍ବର ସବୁଠାରୁ ବିପଦପୂର୍ଣ୍ଣ ଜେଲ୍ ।
୯/୧୧ ଆକ୍ରମଣ ପରେ ଆତଙ୍କବାଦୀ ସନ୍ଦିଗ୍ଧଙ୍କୁ ରଖିବା ପାଇଁ ଏହି ଜେଲ୍କୁ ତିଆରି କରାଯାଇଥିଲା। ସାରା ବିଶ୍ୱର ଲୋକେ ଏହି ଜେଲକୁ କହିଥାନ୍ତି ନର୍କ । ଜେଲ୍ର ନାଁ ହେଉଛି ଗୁଆଣ୍ଟାନାମୋ ବେ । ଏଠାରେ ୩୦ ହଜାର ପ୍ରବାସୀଙ୍କୁ ରଖିବା ପାଇଁ ଏକ ଅର୍ଡର ସ୍ବାକ୍ଷର କରିଛନ୍ତି ଟ୍ରମ୍ପ । ସେ କହିଛନ୍ତି ଏହି ପଦକ୍ଷେପ ତୁରନ୍ତ ଅବୈଧ ପ୍ରବାସୀଙ୍କୁ ଧରିବାର ସାହାଯ୍ୟ କରିବ ।
ସାରା ବିଶ୍ୱରେ ଏପରି ଅନେକ ଜେଲ ଅଛି, ଯାହାର କାହାଣୀ ଭିନ୍ନ ଭିନ୍ନ। କିନ୍ତୁ ଆମେରିକାର ଗୁଆଣ୍ଟାନାମୋ ବେ ଜେଲକୁ କୁହାଯାଏ ଦୁନିଆର ନର୍କ । ଏହି ଜେଲ୍ କ୍ୟୁବାରେ ଆମେରିକା ଦ୍ୱାରା ନିର୍ମିତ । ଜେଲର ବିଶେଷତ୍ୱ ହେଉଛି ଯେ ଏଠାକୁ ଆସୁଥିବା କଏଦୀମାନଙ୍କୁ ବିନା କୌଣସି ଶୁଣାଣିରେ ଦୀର୍ଘ ସମୟ ପର୍ଯ୍ୟନ୍ତ ରଖାଯାଇଥାଏ। କାରଣ ଏହି ଜେଲଟି ଆତଙ୍କବାଦୀ ଏବଂ ସେମାନଙ୍କ ସନ୍ଦିଗ୍ଧ ଲୋକଙ୍କୁ ରଖିବା ପାଇଁ ତିଆରି କରାଯାଇଥିଲା।
ଏହି ଜେଲରେ ଶାରୀରିକ ନିର୍ଯାତନା ସହିତ ମାନସିକ ନିର୍ଯାତନା ମଧ୍ୟ ଦିଆଯାଏ । ଏଠାରେ କଏଦୀମାନଙ୍କୁ ବହୁତ ଦିନ ପର୍ଯ୍ୟନ୍ତ ଶୋଇବାକୁ ଦିଆଯାଏ ନାହିଁ । ଏହାସହିତ ସେମାନଙ୍କୁ ଘନ ଅନ୍ଧାରରେ ରଖାଯାଇଥାଏ । ଯେଉଁଠାରେ ସୂର୍ଯ୍ୟକିରଣ ମଧ୍ୟ ପହଞ୍ଚିପାରେନି । ଜେଲର କୋଠରୀଗୁଡ଼ିକ ବହୁତ ଛୋଟ ତିଆରି ହୋଇଛି ।
ଜେଲ୍ଟି ୧୯୦୩ ମସିହାରେ ପ୍ରତିଷ୍ଠିତ ହୋଇଥିଲା। ୨୦୦୧ ସେପ୍ଟେମ୍ବର ୧୧ ରେ ହୋଇଥିବା ଆତଙ୍କବାଦୀ ଆକ୍ରମଣ ପରେ ଆମେରିକା ପୁନଃ ଏହି ଜେଲ୍କୁ ଆରମ୍ଭ କରିଥିଲା। ଏହାପରେ କେବଳ ସେହି ଲୋକଙ୍କୁ ଏଠାରେ ରଖାଯାଏ ଯେଉଁମାନେ ଆତଙ୍କବାଦ ସମ୍ବନ୍ଧୀୟ ଘଟଣାରେ ଜଡିତ । ପୂର୍ବତନ ଆମେରିକା ରାଷ୍ଟ୍ରପତି ବାରାକ ଓବାମା ଏହାକୁ ବନ୍ଦ କରିବାକୁ କହିଥିଲେ । କିନ୍ତୁ ଏହା ବନ୍ଦ ହୋଇନଥିଲା । ଏହି ଗୁଆଣ୍ଟାନାମୋ ବେ ଜେଲକୁ ନେଇ ସାରା ବିଶ୍ୱରେ ଆମେରିକାକୁ କରାଯାଉଛି ସମାଲୋଚନା । ତଥାପି ବନ୍ଦ ହୋଇନି ଏହି ଜେଲ୍ ।
