ନୂଆଦିଲ୍ଲୀ: ଦିଲ୍ଲୀରେ ବିଧାନସଭା ନିର୍ବାଚନ ଠିକ୍ ପୂର୍ବରୁ ଆମ୍ ଆଦମୀ ପାର୍ଟି(ଆପ୍)କୁ ବଡ଼ ଝଟକା ଲାଗିଛି। ଭୋଟିଂର ପାଞ୍ଚ ଦିନ ପୂର୍ବରୁ ପାର୍ଟିର ୭ ବିଧାୟକ ଇସ୍ତଫା ଦେଇଛନ୍ତି। ଏହି ସବୁ ବିଧାୟକଙ୍କ ଚଳିତ ନିର୍ବାଚନରେ ଟିକେଟ୍ କାଟି ଦିଆଯାଇଛି। ଏହାକୁ ନେଇ ଏହି ସବୁ ବିଧାୟକ ଅସନ୍ତୁଷ୍ଟ ଥିଲେ। ବିଧାୟକ ରାଜେଶ ଋଷି, ନରେଶ ଯାଦବ, ରୋହିତ କୁମାର ମହରୋଲିଆ, ଭାବନା ଗୌଡ଼, ମଦନ ଲାଲଙ୍କ ସମେତ ଶୁକ୍ରବାର ସାତ ଜଣ ବିଧାୟକ ପାର୍ଟିରୁ ଇସ୍ତଫା ଦେଇଛନ୍ତି।
ଜନକପୁରୀରୁ ଦୁଇ ଥରର ବିଧାୟକ ରାଜେଶ ଋଷି ଆମ୍ ଆଦମୀ ପାର୍ଟିର ପ୍ରାଥମିକତା ସଦସ୍ୟତା ସମେତ ସବୁ ପଦରୁ ଇସ୍ତଫା ଦେଇଛନ୍ତି। ଟିକେଟ୍ କଟିବାରୁ ଅସନ୍ତୁଷ୍ଟ ରାଜେଶ ପାର୍ଟିର ରାଷ୍ଟ୍ରୀୟ ସଂଯୋଜକ ଅରବିନ୍ଦ କେଜ୍ରିଓ୍ଵାଲଙ୍କୁ ନିଜର ଇସ୍ତଫା ପତ୍ର ପ୍ରଦାନ କରିଛନ୍ତି। ସେ ଅଭିଯୋଗ କରିଛନ୍ତି ଯେ, ପାର୍ଟି ନିଜର ମୂଳ ସିଦ୍ଧାନ୍ତକୁ ତ୍ୟାଗ କରି ଦୁର୍ନୀତିରେ ବୁଡ଼ି ରହିଛି। ସନ୍ତୋଷ କୋଲିଙ୍କ ବଳିଦାନ ସହିତ ଭୁଲ୍ ବ୍ୟବହାର କରାଗଲା। ସନ୍ତୋଷ କୋଲିଙ୍କ ହତ୍ୟାକାରୀଙ୍କୁ ଟିକେଟ୍ ଦିଆଗଲା। ଏହା ପାର୍ଟିର କର୍ମକର୍ତ୍ତାଙ୍କ ପ୍ରତି ବିଶ୍ଵାସଘାତ।
Also read: ସୋନିଆ ଗାନ୍ଧୀଙ୍କ ମନ୍ତବ୍ୟରେ ମର୍ଯ୍ୟାଦା ହାନୀ ହୋଇଛି: ରାଷ୍ଟ୍ରପତି ଭବନ
ମହରୌଲିର ବିଧାୟକ ନରେଶ ଯାଦବ ମଧ୍ୟ ପାର୍ଟି ଉପରେ ଦୁର୍ନୀତିର ଅଭିଯୋଗ ଲଗାଇଛନ୍ତି। ନରେଶ ଯାଦବଙ୍କୁ ପାର୍ଟି ଟିକେଟ୍ ଦେଇଥିଲା, ମାତ୍ର ପରେ ଫେରାଇ ନେଇଥିଲା। ଯାଦବଙ୍କ କୁରାନ ଅପମାନ ସଂପର୍କିତ ଏକ ମାମଲାରେ ପଞ୍ଜାବର ଏକ ଅଦାଲତ ଦଣ୍ଡାଦେଶ ଶୁଣାଇଥିଲେ। କିନ୍ତୁ ସେ ଉପର ଅଦାଲତ ଦ୍ଵାରା ଦଣ୍ଡାଦେଶ ଉପରେ ସ୍ଥଗିତାଦେଶ ଲଗାଇଥିଲେ। ନରେଶ ଯାଦବଙ୍କୁ ଟିକେଟ୍ ଦିଆଯିବା ଦ୍ଵାରା ଦିଲ୍ଲୀରେ ମୁସଲମାନଙ୍କ ମଧ୍ୟରେ କଂଗ୍ରେସ ଓ ଏଆଇଏମଆଇଏମ ପ୍ରସଙ୍ଗ କରିବା ଆରମ୍ଭ କରି ଦେଇଥିଲା।
ତ୍ରିଲୋକପୁରୀରୁ ଆପ୍ ବିଧାୟକ ତଥା ଦଳିତ ନେତା ରୋହିତ କୁମାର ମହରୌଲିଆ ମଧ୍ୟ ନିଜ ପଦରୁ ଇସ୍ତଫା ଦେଇଛନ୍ତି। ପାର୍ଟି ଏଥର ତାଙ୍କ ଟିକେଟ୍ କାଟି ଦେଇଛି। ରୋହିତ କୁମାର ଆନ୍ନାଙ୍କ ଆନ୍ଦୋଳନ ସମୟରୁ ଆମ୍ ଆଦମୀ ପାର୍ଟି ସହ ଜଡ଼ିତ ରହିଥିଲେ। ସେ ଏକ୍ସରେ ଲେଖିଛନ୍ତି, ବାବା ସାହେବଙ୍କ କେବଳ ଫଟୋ ଦରକାର, ତାଙ୍କର ବିଚାର ଦରକାର ନାହିଁ। ଏମିତି ଲୋକଙ୍କ ସହିତ ମୋର ସଂପର୍କ ଆଜିଠୁ ସମାପ୍ତ। ଆମ୍ ଆଦମୀ ପାର୍ଟିର ପ୍ରାଥମିକ ସଦସ୍ୟତା ସହ ସବୁ ପଦରୁ ଇସ୍ତଫା ଦେଉଛି।
ସେହିପରି ପାଲମର ବିଧାୟକ ଭାବନା ଗୌଡ଼, କସ୍ତୁରବା ନଗରର ବିଧାୟକ ମଦନ ଲାଲ, ବିଜବାସନର ବିଧାୟକ ବିଏସ ଜୁନ ଓ ଆଦର୍ଶ ନଗର ବିଧାୟକ ପବନ ଶର୍ମା ମଧ୍ୟ ଆପ୍ ଛାଡ଼ିଛନ୍ତି।
