ନୂଆଦିଲ୍ଲୀ: ବଜେଟ୍ରେ ସାଧାରଣ ଲୋକଙ୍କ ପାଇଁ ବଡ଼ ଘୋଷଣା ହୋଇପାରେ । ସରକାର ବଜେଟ୍ରେ ପେଟ୍ରୋଲ-ଡିଜେଲ୍ ମୂଲ୍ୟ ହ୍ରାସ ନେଇ ଘୋଷଣା କରିପାରନ୍ତି । ଅନୁମାନ କରାଯାଉଛି ଯେ ସରକାର ତେଲ ଉପରେ ଲାଗୁ ହେଉଥିବା ଏକ୍ସାଇଜ୍ ଡ୍ୟୁଟି (ଉତ୍ପାଦ ଶୁଳ୍କ)ରେ ବଡ଼ ହ୍ରାସ କରିପାରନ୍ତି । ବର୍ତ୍ତମାନ, ପେଟ୍ରୋଲ ଉପରେ ୧୯.୯୦ ଟଙ୍କା ଏବଂ ଡିଜେଲ୍ ଉପରେ ୧୫.୮୦ ଟଙ୍କା ଉତ୍ପାଦ ଶୁଳ୍କ ରହିଛି । ଜୀ ବିଜନେସ୍ ରିପୋର୍ଟ ଅନୁସାରେ ଉଦ୍ୟୋଗ ସଂଗଠନଗୁଡ଼ିକ ଦ୍ୱାରା କରାଯାଇଥିବା ସୁପାରିସ ଆଧାରରେ ସରକାର ବଜେଟରେ ଏକ୍ସାଇଜ୍ ଡ୍ୟୁଟି ହ୍ରାସ କରିପାରନ୍ତି ।
ପେଟ୍ରୋଲ୍ ଏବଂ ଡିଜେଲ୍ ମୂଲ୍ୟ ଭାରତୀୟ ଅର୍ଥନୀତି ପାଇଁ ଗୁରୁତ୍ୱପୂର୍ଣ୍ଣ । ଏହା କେବଳ ସାଧାରଣ ଲୋକଙ୍କ ପାଇଁ ବରଂ ଉଦ୍ୟୋଗଜଗତ ଉପରେ ମଧ୍ୟ ପ୍ରଭାବ ପକାଇଥାଏ । ଇନ୍ଧନର ମୂଲ୍ୟ ବୃଦ୍ଧି ହେଲେ, ଏହା ଦରବୃଦ୍ଧିର କାରଣ ପାଲଟିଥାଏ । ଏହାର ବୋଝ ସାଧାରଣ ଜନତାଙ୍କ ପକେଟ୍ ଉପରେ ପଡ଼ିଥାଏ । ଏହି କାରଣରୁ ତୈଳ ଦରରେ ହ୍ରାସ ସାଧାରଣ ଲୋକଙ୍କୁ ଆଶ୍ୱସ୍ତି ଦେବା ସହ ଦେଶର ଆର୍ଥିକ ସ୍ଥିରତାକୁ ବି ମଜଭୁତ କରିଥାଏ ।
କନ୍ଫଡେରେସନ୍ ଅଫ୍ ଇଣ୍ଡିଅନ୍ ଇଣ୍ଡଷ୍ଟ୍ରି (ସିଆଇଆଇ) ସରକାରଙ୍କୁ ପେଟ୍ରୋଲ ଏବଂ ଡିଡେଲ୍ ଉପରେ ଏକ୍ସାଇଜ୍ ଡ୍ୟୁଟି ହ୍ରାସ କରିବା ପାଇଁ ସୁପାରିସ୍ କରିଛି । ସିଆଇଆଇ ଏକ ପ୍ରମୁଖ ଉଦ୍ୟୋଗ ସଂଗଠନ ଯିଏ ଭାରତୀୟ ଉଦ୍ୟୋଗଜଗତର ହିତ ରକ୍ଷା କରିଥାଏ । ଏହା ମତରେ ପେଟ୍ରୋଲ୍-ଡିଜେଲ୍ ମୂଲ୍ୟରେ ହ୍ରାସ କେବଳ ସାଧାରଣ ଜନତାଙ୍କୁ ଆଶ୍ୱସ୍ତି ମିଳିବ ତାହା ନୁହେଁ ବରଂ ଉଦ୍ୟୋଗଜଗତ ମଧ୍ୟ ଲାଭବାନ ହେବ । ଶେଷ ଥର ପାଇଁ ୨୦୨୨ ମେ ମାସରେ ପେଟ୍ରୋଲ ଉପରେ ଏକ୍ସାଇଜ୍ ଡ୍ୟୁଟି ୧.୪ ଟଙ୍କା ହ୍ରାସ କରାଯାଇଥିଲା । ସେହି ସମୟରେ ଡିଜେଲ ଉପରେ ଲାଗୁଥିବା ଉତ୍ପାଦ ଶୁଳ୍କ ୧.୮ ଟଙ୍କା କମ କରାଯାଇଥିଲା ।
