ନୂଆଦିଲ୍ଲୀ: ପିଏମ ସୂର୍ଯ୍ୟ ଘର ଯୋଜନା ଭାରତ ସରକାରଙ୍କ ଏକ ମହତ୍ବାକାଂକ୍ଷୀ ଯୋଜନା। ଏହି ଯୋଜନାରେ ଦେଶର ପ୍ରତି ଘରକୁ ସୌର ଶକ୍ତି ସହ ଯୋଡ଼ିବାକୁ ଲକ୍ଷ୍ୟ ରଖାଯାଇଥିବାବେଳେ, ସୋଲାର ପ୍ୟାନେଲ ଉପରେ ସ୍ବତନ୍ତ୍ର ସବସିଡି ମଧ୍ୟ ଦେଉଛନ୍ତି। ଏହାଦ୍ବାରା କେବଳ ଯେ, ବିଜୁଳି ବିଲ୍ କମିବ ତାହା ନୁହେଁ ଏହାଦ୍ବାରା ପରିବେଶକୁ ମଧ୍ୟ ଫାଇଦା ହେବ। 

ତେବେ ଏହି ଯୋଜନାରେ ତିନି ବର୍ଷ ମଧ୍ୟରେ ୧ କୋଟି ଘରେ ସୋଲାର ପ୍ୟାନେଲ ଲଗାଯିବାକୁ ଯୋଜନା ରଖାଯାଇଥିବାବେଳେ, ପ୍ରଥମ ବର୍ଷରେ ୮ ଲକ୍ଷ ୬୦ ହଜାରରୁ ଅଧିକ ଘରେ ରୂଫ୍‌ଟପ୍‌ ସୋଲାର ସିଷ୍ଟମ ଇନଷ୍ଟାଲ କରାଯାଇସାରିଲାଣି। ଏମିତିରେ ଏବର୍ଷ ଅକ୍ଟୋବର ବେଳକୁ ୨୦ ଲକ୍ଷ ପାର୍‌ କରିବ ବୋଲି କହିଛନ୍ତି କେନ୍ଦ୍ର ବିଜୁଳି ଏବଂ ନବୀକରଣ ଶକ୍ତି ରାଷ୍ଟ୍ରମନ୍ତ୍ରୀ ଶ୍ରୀପାଦ ୟୋସୋ ନାଇକ। ଶୁକ୍ରବାର ପିଏଚଡି ଚାମ୍ବର ଅଫ୍‌ କମର୍ସ ଆଣ୍ଡ ଇଣ୍ଡଷ୍ଟି (PHDCCIE)ର ସମ୍ମେଳନରରେ ନାଇକ ଏହି ସୂଚନା ଦେଇଛନ୍ତି। 

ସେ କହିଛନ୍ତି ମାଗଣା ବିଜୁଳି ଯୋଜନା ଛାତ ଉପରେ ସୌର ପ୍ୟାନେଲ ଲଗାଇବା ଦୁନିଆର ସବୁଠୁ ବଡ଼ ପଦକ୍ଷେପ। ଏହି‌ ଯୋଜନା ଅନୁଯାୟୀ, ୨୦୨୭ ମାର୍ଚ୍ଚ ପର୍ଯ୍ୟନ୍ତ ୧ କୋଟି ଘରର ଛାତ ଉପ‌ରେ ସୌର ଶକ୍ତି ୟୁନିଟ୍‌ ଲଗାଇବାକୁ ଲକ୍ଷ୍ୟ ରିହିଛି। ମାର୍ଚ୍ଚ ୨୦୨୬ ପର୍ଯ୍ୟନ୍ତ ୪୦ ଲକ୍ଷ ଘରେ ସୋଲାର ସିଷ୍ଟମ ଲାଗିଯିବ। ସେ କହିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ୭୫ ହଜାର ୨୧ କୋଟି ଟଙ୍କାର ବଜେଟ ସହ ଏହି ଯୋଜନାର ଆରମ୍ଭ କରିଥିଲେ। ଯାହାର ଉଦ୍ଦେଶ୍ୟ ଛାତ ଉପରେ ସୋଲାର ପ୍ୟାନେଲ ଲଗାଇ ଘରକୁ ମାଗଣା ବିଜୁଳି ଦେବା। ଯୋଜନାରେ ବିଜୁଳି ବିତରଣ କମ୍ପାନି ଅର୍ଥାତ ଡିସକମକୁ ରାଜ୍ୟ କାର୍ଯ୍ୟାନ୍ବୟନ ଏଜେନ୍ସୀ (ଏସଆଇଏ) ଭାବରେ ନାମିତ କରାଯାଇଛି।

ଡିସକମକୁ ପ୍ରୋତ୍ସାହନ ପାଇଁ ସମୁଦାୟ ୪,୯୫୦ କୋଟି ଟଙ୍କା ଦିଆଯାଇଛି। ଏଥିରେ ଗ୍ରୀଡ କନେକ୍ଟେଡ ରୂଫ୍‌ ଟପ୍‌ ସୋଲାର (ଜିସିଆରଟି)ର ଦ୍ବିତୀୟ ପର୍ଯ୍ୟାୟ କାର୍ଯ୍ୟକ୍ରମ ଅନୁଯାୟୀ ପୂର୍ବ ଖର୍ଚ୍ଚକୁ ସାମିଲ କରାଯାଇଛି। ନାଇକ ଡିସେମ୍ବରରେ କହିଥିଲେ ଯେ, ରାଷ୍ଟ୍ରୀୟ ପୋର୍ଟାଲରେ ସମୁଦାୟ ୧.୪୫ କୋଟି ପଞ୍ଜିକରଣ, ୨୬.୩୮ ଲକ୍ଷ ଆବେଦନ ଏବଂ ୬.୩୪ ଲକ୍ଷ ଛାତ ଉପରେ ସୌର ପ୍ୟାନେଲ ସ୍ଥାପନ ହୋଇସାରିଛି।