ନୂଆଦିଲ୍ଲୀ ୩୧/୧: ପ୍ରଥମ ଥର ପାଇଁ ରାଷ୍ଟ୍ରପତି ଭବନରେ ହେବ ବାହାଘର । ୨ ଅଧିକାରୀ ପୁନମ ଗୁପ୍ତା ଓ ଅବନୀଶ କୁମାରଙ୍କ ପଡିବ ହାତଗଣ୍ଠି । ଉଭୟ CRPFରେ ଆସିଷ୍ଟାଣ୍ଟ କମାଣ୍ଡଣ୍ଟ ଅଛନ୍ତି । ପୁମନ ରାଷ୍ଟ୍ରପତି ଭବନରେ PSO ଭାବେ କାର୍ଯ୍ୟ କରୁଥିବାବେଳେ ଅବନୀଶ ଜମ୍ମୁ କାଶ୍ମୀରରେ ନିଯୁକ୍ତି ପାଇଛନ୍ତି । ଫେବ୍ରୁଆରୀ ୧୨ରେ ଉଭୟଙ୍କର ବାହାଘର ହେବ । ତେବେ ରାଷ୍ଟ୍ରପତି ଭବନରୁ ଏ ନେଇ କୌଣସି ଆନୁଷ୍ଠାନିକ ଭାବରେ ଘୋଷଣା କରାଯାଇନି । ତେବେ ଇତିହାସରେ ଏହାକୁ ପ୍ରଥମ ବୋଲି କୁହାଯାଉଛି ।
ମିଳିଥିବା ସୂଚନା ଅନୁସାରେ ରାଷ୍ଟ୍ରପତି ଭବନରେ ପିଏସ୍ଓ ଭାବେ ନିଯୁକ୍ତ ପୁନମଙ୍କ ବ୍ୟବହାର ଓ କାର୍ଯ୍ୟରେ ବେଶ ସନ୍ତୁଷ୍ଟ ରାଷ୍ଟ୍ରପତି ଦୌପଦୀ ମୁର୍ମୁ । ରାଷ୍ଟ୍ରପତି ଯେତେବେଳେ ଜାଣିଲେ ପୁନମ୍ଙ୍କ ବାହାଘର ହେବ ସେତେବେଳେ ସେ ଏହି ବାହାଘର ରାଷ୍ଟ୍ରପତି ଭବନରେ ହେଉ ବୋଲି ନିଜ ଆଡୁ ପ୍ରସ୍ତାବ ଦେଇଥିଲେ । ଉଭୟଙ୍କ ବାହାଘର ରାଷ୍ଟ୍ରପତି ଭବନର ମଦର ଟେରେସା କ୍ରାଉନ କଂପ୍ଲେକ୍ସରେ ହେବ । ସେଥିପାଇଁ ଆବଶ୍ୟକ ବ୍ୟବସ୍ଥା କରାଯାଇଛି । ବାହାଘରରେ ପୁନମ ଓ ଅବନୀଶଙ୍କ ପରିବାର ଲୋକଙ୍କ ସହ ସେମାନଙ୍କ ବନ୍ଧୁବାନ୍ଧବ
ଓ ଅଳ୍ପ ସଂଖ୍ୟକ ବିଶିଷ୍ଟ ଅତିଥି ଯୋଗ ଦେବେ । ଏଥିପାଇଁ ତାଲିକା ମଧ୍ୟ ପ୍ରସ୍ତୁତ ହୋଇସାରିଛି । ଖାସ କରି ରାଷ୍ଟ୍ରପତି ଏହି ବାହାଘରରେ ସାମିଲ ହେବା ନେଇ ଜୋରଦାର ଚର୍ଚ୍ଚା ହେଉଛି ।
ମଧ୍ୟପ୍ରଦେଶ ଶିବପୁରୀ ଜିଲ୍ଲାରେ ନିବାସୀ ପୁନମ୍ ଗଣିତରେ ସ୍ନାତକ ପାସ୍ ପରେ ଇଂରାଜୀ ସାହିତ୍ୟରେ ସ୍ନାତକୋତ୍ତର କରିଥିଲେ । ପରେ ସେ ବିଇଡି ମଧ୍ୟ କରିଥିଲେ । ୨୦୧୮ରେ UPSC ଦ୍ବାରା ହେଉଥିବା CAPF(ସେଣ୍ଟ୍ରାଲ ଆର୍ମଡ ପୋଲିସ ଫୋର୍ସ) ପରୀକ୍ଷାରେ ସାରା ଦେଶରେ ୮୧ ରାଙ୍କ ପାଇଥିଲେ । ଏହା ପରେ ଆସିଷ୍ଟାଣ୍ଟ କମାଣ୍ଡାଣ୍ଟ ଭାବେ ଯୋଗ ଦେଇଥିଲେ । ଗତ ବର୍ଷ ସାଧାରଣତନ୍ତ୍ର ଦିବସରେ ପରେଡରେ ସେ ସିଆରପିଏଫ୍ ମହିଳା କଣ୍ଟିଜେଣ୍ଟର ନେତୃତ୍ବ ନେଇଥିଲେ ।
