ନୂଆଦିଲ୍ଲୀ: ଆଜି ପ୍ରତ୍ୟେକ ଇଣ୍ଟରନେଟ୍ ୟୁଜର ଗିବଲି ଷ୍ଟାଇଲରେ ଫଟୋ ପ୍ରସ୍ତୁତ କରିବା ନିଶାରେ ଲାଗିଛନ୍ତି । ଲୋକେ ନିଜର ଗିବଲି ଫଟୋ ପ୍ରସ୍ତୁତ କରି ସୋସିଆଲ୍ ମିଡିଆରେ ସେୟାର କରୁଛନ୍ତି । ଆଜି ଏହି ଆର୍ଟକୁ ଇଣ୍ଟରନେଟରେ ଲୋକପ୍ରିୟ କରାଇବାରେ ଚାଟଜିପିଟି, ଗୁଗଲ ଜେମିନି ଓ ମେଟା ଏଆଇ ପରି ଟୁଲ୍ସଙ୍କ ଭୂମିକା ଗୁରୁତ୍ୱପୂର୍ଣ୍ଣ । କିନ୍ତୁ ଏଠାରେ କହି ରଖୁଛୁ ଯେ ଗିବଲି ଆର୍ଟର ପ୍ରତିଷ୍ଠାତା ଥରେ ଏଆଇ ଜେନେରେଟେଡ୍ ଫଟୋକୁ ନେଇ କଡ଼ା ସମାଲୋଚନା କରିଥିଲେ ଓ ଏହାକୁ ଜୀବନର ବଡ଼ ଅପମାନ ବୋଲି କହିଥିଲେ ।

ଆଜି ଗିବଲି ଆର୍ଟ ଯେଉଁ କାରଣରୁ ପରିଚିତ, ତାର ମୁଖ୍ୟ ଶ୍ରେୟ ଷ୍ଟୁଡିଓ ଗିବଲିକୁ ଯାଉଛି । ଷ୍ଟୁଡିଓ ଗିବଲି ଏହି କଳାକୁ ଫଟୋରେ ଉତାରି ଦୁନିଆ ସାମନାକୁ ଆଣିବାର କାମ କରିଥିଲା । ୧୯୫୮ ମସିହାରେ ଜାପାନର ମିୟାଜାକି ହୟାଓ, ଇସାଓ ତାକାହାଟା, ତୋଶିୟୋ ସୁଜୁକି, ୟାସୁୟୋଶି ତୋକୁମା ଏହି ଷ୍ଟୁଡିଓକୁ ଆରମ୍ଭ କରିଥିଲେ । ଅନେକ କାର୍ଟୁନରେ ଜାପାନୀ ଆନିମକୁ ଦେଖିଥିବେ ଓ ଏହାର ନାଁ ମଧ୍ୟ ଶୁଣିଥିବେ । ଗିବଲି ହେଉଛି ଏକପ୍ରକାର ଜାପାନୀ କଳା ଯେଉଁଥିରେ ଆନିମ ଚରିତ୍ରଗୁଡ଼ିକ ଫଟୋରେ ଚିତ୍ରିତ କରାଯାଇଥାଏ । ଷ୍ଟୁଡିଓ ଗିବଲିକୁ ନେଇ ସବୁଠୁ ଭିନ୍ନ କଥା ହେଉଛି ଯେ ଏଠାରେ ଆନିମେଟର୍ସ ଏହି ଫଟୋକୁ କମ୍ପ୍ୟୁଟରରେ ନୁହେଁ ବରଂ ହାତରେ ତିଆରି କରୁଥିଲେ । ଏହାପରେ ଏହି ଫଟୋକୁ କ୍ରମରେ ରଖି ଆନିମେସନ୍ ପ୍ରସ୍ତୁତ କରାଯାଉଥିଲା । ପ୍ରାୟ ୪୦ ପରେ ଆଜି ବି ଏହି ଷ୍ଟୁଡିଓ ଗିବଲି ଆନିମେସନକୁ ହାତରେ ତିଆରି ଫଟୋରୁ ହିଁ ପ୍ରସ୍ତୁତ କରାଯାଏ ।

ଆଜିର ଏହି ଆଧୁନିକ ଯୁଗରେ ଯେଉଁଠି ଆନିମେସନ ଏବେ କମ୍ପ୍ୟୁଟରରେ ନିର୍ମାଣ କରାଯାଉଛି, ସେଇଠି ଏହି ହ୍ୟାଣ୍ଡ ମେଡ୍ ଆର୍ଟକୁ ଜୀବିତ ରଖିବାରେ ଏହାର ପ୍ରତିଷ୍ଠାତା ମିୟାଜାକି ହୟାକୋଙ୍କ ଯୋଗଦାନ ବହୁ ଅଧିକ । ଆନିମେଟେଡ୍ ଓ ଫିଲ୍ମ ନିର୍ମାତା ମିୟାଜାକି ହୟାଓ ସ୍ପିରିଟେଡ୍ ଅୱେ, ମାୟ ନେବର ଟୋଟରୋ, ପ୍ରିନସେସ୍ ମୋନୋନୋକେ ପରି କାଳଜୟୀ ଫିଲ୍ମ ନିର୍ମାଣ କରିଛନ୍ତି, ଯାହା ଦର୍ଶକଙ୍କୁ ଭାବନାତ୍ମକ ରୂପ ଯୋଡ଼ିଛି । କିନ୍ତୁ ଏଆଇର ବଢୁଥିବା ପ୍ରଭାବକୁ ନେଇ ସେ ଅସନ୍ତୁଷ୍ଟ ଅଛନ୍ତି । 

ଗିବଲି ଫଟୋ ଭାଇରାଲ୍ ହେବା ପରେ ଆନିମେଟର ମିୟାଜାକି ହୟାଓଙ୍କ ଏଆଇ ଉପରେ ଦେଇଥିବା ପ୍ରତିକ୍ରିୟା ମଧ୍ୟ ଭାଇରାଲ୍ ହେବାରେ ଲାଗିଛି । ତାଙ୍କର ଏକ ଭିଡିଓକୁ ଇଣ୍ଟନେଟରେ ବହୁଲ ମାତ୍ରାରେ ସେୟାର କରାଯାଉଛି । ଏଥିରେ ସେ ଏଆଇ ଜେନେରେଟେଡ୍ ଆନିମେସନ ପ୍ରତି କଡ଼ା ଅସନ୍ତୋଷ ବ୍ୟକ୍ତ କରିଛନ୍ତି । ଖବର ଅନୁସାରେ ଏହି ଭିଡିଓ ୨୦୧୬ ମସିହାର, ଯେଉଁଥିରେ ସେ ଏଆଇକୁ ସମାଲୋଚନା କରି କହୁଛନ୍ତି ଯେ ଏହା ଜୀବନର ଅପମାନ (An insult to life itself) ଓ ଏହିପରି କଣ୍ଟେଣ୍ଟକୁ ଦେଖିବା ପାଇଁ ଆଦୌ ଇଚ୍ଛା ହୁଏ ନାହିଁ ।