ଭୁବନେଶ୍ୱର ୨୯/୧୧: ସର୍ବଭାରତୀୟ ଡିଜିପି ସମ୍ମିଳନୀ ପାଇଁ ପ୍ରସ୍ତୁତି ଶେଷ । ଶୁକ୍ରବାର ଠାରୁ ଭୁବନେଶ୍ୱରରେ ଆୟୋଜିତ ହେବାକୁ ଥିବା ୩ ଦିନିଆ ସମ୍ମିଳନୀରେ ଯୋଗ ଦେବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହ । ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲ୍ ମଧ୍ୟ ସାମିଲ ହେବେ । ତିନି ଦିନ ଧରି ଲୋକସେବା ଭବନରେ ଏହି ସମ୍ମିଳନୀ ଚାଲିବ ।
ଦେଶର ଆଭ୍ୟନ୍ତରୀଣ ସୁରକ୍ଷା ସହ ସୀମା ସୁରକ୍ଷା, ସାଇବର ଅପରାଧ, ଗଞ୍ଜେଇ ଓ ବ୍ରାଉନସୁଗର କାରବାର, ଏଆଇ ଟେକ୍ନୋଲୋଜି, ଜେଲ୍ ସଂସ୍କାର ଭଳି ପ୍ରମୁଖ ପ୍ରସଙ୍ଗରେ ତିନି ଦିନ ଧରି ହେବ ଆଲୋଚନା । ପ୍ରଥମ ଥର ଲାଗି ଓଡ଼ିଶାରେ ହେଉଥିବା ଏହି ସମ୍ମିଳନୀ ପାଇଁ ଏବେ ରାଜଧାନୀ କଡ଼ା ସୁରକ୍ଷା ବଳୟରେ ।
ଶୁକ୍ରବାର ଅପରାହ୍ନରେ ଆରମ୍ଭ ହେବ ଡିଜିପି ସମ୍ମିଳନୀ । ସ୍ୱରାଷ୍ଟ୍ର ମନ୍ତ୍ରୀ ଶ୍ରୀ ଶାହ ଏହାକୁ ଉଦ୍ଘାଟନ କରିବେ । ଅପରାହ୍ନ ୧.୨୫ରେ ଶାହ ଓ ଡୋଭାଲ ବିମାନବନ୍ଦରରେ ପହଞ୍ଚି ସିଧାସଳଖ ସମ୍ମିଳନୀକୁ ଯିବେ । ଦେଶର ଆଇନ ଶୃଙ୍ଖଳା ନେଇ ହେବ ମାନସ ମନ୍ଥନ । ପ୍ରଧାନମନ୍ତ୍ରୀ କିନ୍ତୁ ଶନିବାର ସକାଳେ ଏହି ସମ୍ମିଳନୀରେ ଯୋଗ ଦେବେ । କାର୍ଯ୍ୟସୂଚୀ ଅନୁସାରେ, ଅପରାହ୍ଣ ୪ଟା ୧୫ରେ ପ୍ରଧାନମନ୍ତ୍ରୀ ମୋଦି ବିଜୁ ପଟ୍ଟନାୟକ ବିମାନ ବନ୍ଦରରେ ପହଞ୍ଚିବେ ।
ସେଠାରେ ତାଙ୍କୁ ଭବ୍ୟ ସ୍ୱାଗତ ସମ୍ବଦ୍ଧର୍ନା ପରେ ବିମାନବନ୍ଦର କ୍ୟାମ୍ପସ୍ ପାଖରେ ଏକ ସଭା କରିବେ । ସେଠାରୁ ପ୍ରଧାନମନ୍ତ୍ରୀ ଯିବେ ରାଜଭବନ । କିଛି ସମୟ ପରେ ସନ୍ଧ୍ୟା ସାଢ଼େ ୬ଟାରେ ବିଜେପି ରାଜ୍ୟ କାର୍ଯ୍ୟାଳୟକୁ ଆସିବେ । ଦଳୀୟ କାର୍ଯ୍ୟାଳୟରେ ସାଂସଦ ଓ ବିଧାୟକଙ୍କଠାରୁ ରିପୋର୍ଟ କାର୍ଡ ନେବେ ମୋଦି । ଗତ ୫ ମାସରେ ସେମାନଙ୍କ ପ୍ରଦର୍ଶନ ସଂପର୍କରେ ଆଲୋଚନା କରିବେ । ଦଳୀୟ ସାଂସଦ, ମନ୍ତ୍ରୀ, ବିଧାୟକ ଓ ପଦାଧିକାରୀଙ୍କ ସହ ରାତ୍ରୀଭୋଜନ ସାରି ସେ ରାଜଭବନ ଯାଇ ରାତ୍ରୀଯାପନ କରିବେ ।
ମୋଦି ୩୦ ତାରିଖ ସକାଳ ସାଢେ ୮ରୁ ସଂଧ୍ୟା ୮ଟା ଏବଂ ୧ ତାରିଖ ସକାଳ ସାଢେ ୮ରୁ ଅପରାହ୍ଣ ସାଢେ ୪ଟା ଯାଏଁ ସମ୍ମିଳନୀରେ ଉପସ୍ଥିତ ରହିବେ । ୨୯ରୁ ଡିସେମ୍ବର ୧ ତାରିଖ ଯାଏଁ ଡିଜିପି ସମ୍ମିଳନୀ ପାଇଁ ପୂରା ରାଜଧାନୀକୁ ହାଇଆଲର୍ଟରେ ରଖାଯାଇଛି । ରାସ୍ତାଘାଟ ସବୁଠି ପୁଲିସ ପହରା ମାରୁଛି । ଲୋକସେବା ଭବନ, ରାଜଭବନ, ରାଜ୍ୟ ଅତିଥି ଭବନ, ଆଇପିଏସ୍ ମେସ୍ ସହ ସହରର ପ୍ରମୁଖ ଅଞ୍ଚଳରେ କେନ୍ଦ୍ରୀୟ ଫୋର୍ସ କଡ଼ା ପହରା ଦେଉଛନ୍ତି ।
ସବୁଠି ଚାଲିଛି ତନ୍ନ ତନ୍ନ ଯାଞ୍ଚ । ସହରର ସମସ୍ତ ପ୍ରବେଶ ପଥରେ ଯାଞ୍ଚ କରୁଛନ୍ତି ପୋଲିସ ଓ ବିଏସଏଫ୍ । ପ୍ରଧାନମନ୍ତ୍ରୀଙ୍କ କାର୍ଯ୍ୟକ୍ରମ ଥିବା ସ୍ଥାନରେ "ନୋ ଫ୍ଲାଇଙ୍ଗ ଜୋନ୍' ଘୋଷଣା କରାଯାଇଛି । ଭିଡ଼ ନିୟନ୍ତ୍ରଣ ଓ ଟ୍ରାଫିକ ପାଇଁ ବି ବ୍ୟାପକ ବ୍ୟବସ୍ଥା କରିଛି କମିଶନରେଟ୍ ପୁଲିସ୍ । ରଙ୍ଗୀନ୍ ସାଜସଜ୍ଜାରେ ସାରା ସହର ବେଶ୍ ସୁନ୍ଦର ଲାଗୁଛି । ଲୋକସେବା ଭବନକୁ ମଧ୍ୟ ଅଧିକ ଆକର୍ଷଣୀୟ ଭାବେ ସଜା ଯାଇଛି । ବୈଠକ ପାଇଁ ୭୦ ପା୍ଲଟୁନ୍ ପୁଲିସ୍ ଫୋର୍ସ, ୧ ହଜାର ଅଫିସର, ବମ୍ ସ୍କ୍ୱାଡ୍, ଡଗ୍ ସ୍କ୍ୱାଡ୍, ୩ କମ୍ପାନୀ କେନ୍ଦ୍ରୀୟ ଫୋର୍ସ, ୧ ହଜାର ଅଫିସରଙ୍କୁ ମୁତୟନ କରାଯାଇଛି ।
ଗୃହ ବିଭାଗ ଅଧିନରେ ଥିବା ଦେଶର ସମସ୍ତ ଡିଜିପି ଏ ବୈଠକରେ ଉପସ୍ଥିତ ରହିବେ । ଏସ୍ପିଜି ଓ ଏନ୍ଏସ୍ଜିର ବରିଷ୍ଠ ଅଧିକାରୀମାନେ ସୁରକ୍ଷା ବ୍ୟବସ୍ଥା ଯାଞ୍ଚ କରୁଛନ୍ତି । ବୈଠକରେ କେଉଁ ବିଷୟରେ ଆଲୋଚନା ହେବ ନିଷ୍ପତ୍ତି ନେବ କେନ୍ଦ୍ରୀୟ ଗୁଇନ୍ଦା ସଂସ୍ଥା । ସୂଚନା ଅନୁସାରେ, ବର୍ତ୍ତମାନ ସୁଦ୍ଧା ୪୩ ଜଣ ଡିଜି, ଗୁଇନ୍ଦାର ୧୦ ଜଣ ଯୁଗ୍ମ ନିର୍ଦ୍ଦେଶକ ଭୁବନେଶ୍ୱରରେ ପହଞ୍ଚି ସାରିଛନ୍ତି ।
ଶୁକ୍ରବାର ପୂର୍ବାହ୍ଣ ୧୦ ଟା ସୁଦ୍ଧା ଅନ୍ୟ ଡିଜିମାନେ ଭୁବନେଶ୍ୱରରେ ପହଞ୍ଚିବେ । ଡିଜିମାନଙ୍କୁ ବିମାନ ବନ୍ଦରରୁ ସ୍ୱାଗତ କରିବା ଦାୟିତ୍ୱ ଏଏସ୍ପି/ଡିସିପିଙ୍କୁ ଦିଆଯାଇଛି । ଅତିଥିଙ୍କୁ ସ୍ୱାଗତ ଓ ସହାୟତା ପାଇଁ ବିମାନ ବନ୍ଦରରେ କମିଶନରେଟ୍ ପୁଲିସ ପକ୍ଷରୁ କ୍ୟାମ୍ପ ସାଙ୍ଗକୁ ୨ଟି ହେଲ୍ପ ଡେସ୍କ ଖୋଲାଯାଇଛି । ରାଜ୍ୟ ଅତିଥି ଭବନରେ ସବୁ ରାଜ୍ୟର ପୁଲିସ ଡିଜି ରହିବେ ।
ପ୍ରଧାନମନ୍ତ୍ରୀ ଓ ସ୍ୱରାଷ୍ଟ୍ର ମନ୍ତ୍ରୀଙ୍କୁ ଛାଡିଲେ ବାକି ସବୁ ଅଧିକାରୀମାନେ ରାଜ୍ୟ ଅତିଥି ଭବନରେ ରହିବେ । ପ୍ରଧାନମନ୍ତ୍ରୀ ରାଜ୍ୟ ବିଜେପି କାର୍ଯ୍ୟାଳୟରେ ପ୍ରାୟ ଦୁଇଘଣ୍ଟା ରହିବାର କାର୍ଯ୍ୟକ୍ରମ ଥିବାରୁ ଆଜି ଏସପିଜି ପକ୍ଷରୁ କାର୍ଯ୍ୟାଳୟ ପରିସରରେ ଯାଞ୍ଚ କରାଯାଇଛି । ବିଜେପି ରାଜ୍ୟ କାର୍ଯ୍ୟାଳୟରେ ମଧ୍ୟ ପ୍ରଧାନମନ୍ତ୍ରୀଙ୍କୁ ଭବ୍ୟ ସ୍ୱାଗତ ସମ୍ବଦ୍ଧର୍ନା ପାଇଁ ବ୍ୟାପକ ଆୟୋଜନ କରାଯାଇଛି ।
