ମୁମ୍ଵାଇ ୨୪।୦୬; ନିଜ ପ୍ରେମ ଜୀବନ ସଂପର୍କରେ ବେଶ୍ ଖୋଲାଖୋଲି କଥା ହୁଅନ୍ତି ଜାହ୍ନବୀ କପୁର । ତାଙ୍କ ଜୀବନରେ ପ୍ରେମ ଆସିଛି ସେକଥା ସେ ପରୋକ୍ଷରେ ସ୍ୱୀକାର କରିସାରିଛନ୍ତି । ଏକ ସମୟର ବୟଫ୍ରେଣ୍ଡ ଶିଖର ପାହାଡିଆ ଏବେ ଜାହ୍ନବୀଙ୍କ ପ୍ରେମିକ ସାଜିଛନ୍ତି ଏକଥା କାହାକୁ ଅଛପା ନାହିଁ । କିନ୍ତୁ ଜାହ୍ନବୀଙ୍କ କଥାବାର୍ତ୍ତାରୁ ସ୍ପଷ୍ଟ ଯେ ଶିଖର ହିଁ ତାଙ୍କ ପ୍ରେମିକ । ତେବେ ପ୍ରେମ ଜୀବନକୁ ନେଇ ଜାହ୍ନବୀ ବେଶ୍ ରକ୍ଷଣଶୀଳ ବୋଲି ସେ ନିଜେ କହନ୍ତି । ପ୍ରେମିକଙ୍କ ସହ ସେ ଡେଟିଂରେ ଯାଆନ୍ତି । ମନ୍ଦିର ବି ଯିବାକୁ ଭୁଲନ୍ତି ନାହିଁ ।
କିଛିଦିନ ତଳେ ଦକ୍ଷିଣ ଭାରତର ବେଶ୍ କେତୋଟି ମନ୍ଦିରରେ ଜାହ୍ନବୀଙ୍କୁ ଶିଖରଙ୍କ ସହିତ ପାରମ୍ପରିକ ବେଶରେ ଦେଖିବାକୁ ମିଳିଥିଲା । ଜାହ୍ନବୀ କୁହନ୍ତି ପ୍ରେମର ରସାୟନ ବଡ଼ ଜଟିଳ । ଏହାକୁ ବୁଝିବା ସହଜ ନୁହେଁ । ପ୍ରେମ ସେ ପର୍ଯ୍ୟନ୍ତ ଠିକ୍ ଥିବ ଯେପର୍ଯ୍ୟନ୍ତ ପାରସ୍ପରିକ ଶ୍ରଦ୍ଧା ଥିବ । ପ୍ରେମରେ ଶାରୀରିକ ଘନିଷ୍ଠତା ମଧ୍ୟ ଆସିବା ସ୍ୱାଭାବିକ । ତେବେ ସେହି ଘନିଷ୍ଠତାର ମଧ୍ୟ ସୀମାବଦ୍ଧତା ରହିବା ଦରକାର । ନହେଲେ ପରବର୍ତ୍ତୀ ସମୟରେ ପଶ୍ଚାତାପ କରିବାକୁ ପଡ଼ିପାରେ । କିଛିଦିନ ତଳେ ଏକ ପଡକାଷ୍ଟ୍ ଚ୍ୟାନେଲକୁ ସାକ୍ଷାତକାର ଦେବା ଅବସରରେ ଜାହ୍ନବୀ ଏକଥା କହିଥିଲେ । ଏହି ଅବସରରେ ସେ ଏହା ବି ସ୍ୱୀକାର କରିଥିଲେ ଯେ ଯେତେ ଅତ୍ୟାଧୁନିକ ଚିନ୍ତାଧାରାସଂପନ୍ନ ହୋଇଥିଲେ ବି ପ୍ରେମକୁ ନେଇ ତାଙ୍କ ମନରୁ ଏବେ ବି ରକ୍ଷଣଶୀଳତା ଦୂରେଇ ନାହିଁ ।
ଶୁଣିବାକୁ ମିଳୁଛି ଖୁବ ଶୀଘ୍ର ଜାହ୍ନବୀ ପ୍ରେମିକ ଶିଖର ପାହାଡିଆଙ୍କୁ ବିବାହ କରିବେ । ଏ ନେଇ ଜାହ୍ନବୀଙ୍କୁ ପ୍ରଶ୍ନ କରାଯିବାରୁ ସେ କହିଥିଲେ ବିବାହ ଏବେ ବି ଡେରି ଅଛି । ସେ ଏବେ କ୍ୟାରିଅର୍ ଉପରେ ଅଧିକ ଫୋକସ୍ କରିବାକୁ ଚାହାନ୍ତି । ଅଳ୍ପଦିନ ତଳେ ତାଙ୍କ ଅଭିନୀତ ଫିଲ୍ମ ‘ମିଷ୍ଟର ଆଣ୍ଡ ମିସେସ୍ ମାହି’ ରିଲିଜ୍ ହୋଇଛି । ତେବେ ଫିଲ୍ମଟି ଦର୍ଶକମାନଙ୍କୁ ନିରାଶ କରିଛି।
