ମୁମ୍ଵାଇ ୧୩।୦୩; ୨୦୦୦ ମସିହାରେ ‘ରିଫ୍ୟୁଜି’ ଫିଲ୍ମ ଜରିଆରେ ବଲିଉଡ୍ରେ ପାଦ ଥାପିଥିଲେ ଅଭିନେତ୍ରୀ କରୀନା କପୁର । ସେବେଠାରୁ ଦୀର୍ଘ ୨୫ ବର୍ଷର କ୍ୟାରିଅର ମଧ୍ୟରେ ଅନେକ ସୁପରହିଟ୍ ଫିଲ୍ମରେ ଅଭିନୟ କରିଛନ୍ତି ସେ । କିନ୍ତୁ ସବୁ ଫିଲ୍ମରେ ଅନ୍ତରଙ୍ଗ ଦୃଶ୍ୟଠାରୁ ଦୂରରେ ରହିଛନ୍ତି ।
ନିକଟରେ ଏକ ସାକ୍ଷାତକାରରେ କରୀନା ଏଭଳି ଦୃଶ୍ୟକୁ ନେଇ ସହଜ ଅନୁଭବ କରୁନଥିବା ପ୍ରକାଶ କରିଛନ୍ତି । ‘ଦ ଡାର୍ଟି’ ପତ୍ରିକା ସହ ସାକ୍ଷାତକାରରେ କରୀନା କହିଛନ୍ତି, କାହାଣୀକୁ ଆଗକୁ ବଢ଼ାଇବାକୁ ଏଭଳି ଦୃଶ୍ୟ ଜରୁରି ବୋଲି ସେ ମନେକରନ୍ତି ନାହିଁ । ପରଦାରେ ଅନ୍ତରଙ୍ଗ ଦୃଶ୍ୟ କରିବାବେଳେ ସେ ସହଜ ରହିବେ ନାହିଁ ବୋଲି ଜାଣିଥିବାରୁ କେବେହେଲେ ଏଭଳି ଦୃଶ୍ୟ କରିନାହାନ୍ତି । ସେହିପରି ପରଦାରେ ଅନ୍ତରଙ୍ଗ ଦୃଶ୍ୟ ଦେଖାଇବା ପୂର୍ବରୁ ଏ ସଂପର୍କରେ ଗମ୍ଭୀରତାର ସହ ବିଚାର କରାଯିବା ଆବଶ୍ୟକ । ଏହାକୁ ସମ୍ମାନ ମିଳିବା ଉଚିତ୍ ।
ଭାରତୀୟ ସମାଜ ଏବେ ବି ଏତେ ମୁକ୍ତ ବିଚାରଧାରାର ହୋଇନାହିଁ ବୋଲି କରୀନା ପ୍ରକାଶ କରିଥିଲେ । ତାଙ୍କୁ ଆଗକୁ ମାଲାୟାଲମ୍ ଷ୍ଟାର ପୃଥୀରାଜ ସୁକୁମାରନ୍ଙ୍କ ସହିତ ଦେଖିବାକୁ ମିଳିବ । ମେଘନା ଗୁଲଜାରଙ୍କ ଏକ ଚଳଚ୍ଚିତ୍ରରେ ମଧ୍ୟ କରୀନା ନଜର ଆସିପାରନ୍ତି ।
