ନୂଆଦିଲ୍ଲୀ: ଉପରାଷ୍ଟ୍ରପତି ଜଗଦୀପ ଧନଖଡ଼ଙ୍କୁ ହଟାଇବା ପାଇଁ ଇଣ୍ଡି ମେଣ୍ଟ ଦ୍ୱାରା ଦିଆଯାଇଥିବା ନୋଟିସକୁ ଦୁର୍ଭାଗ୍ୟଜନକ ବୋଲି କେନ୍ଦ୍ର ସଂସଦୀୟ ବ୍ୟାପାର ମନ୍ତ୍ରୀ କିରେନ ରିଜିଜୁ କହିଛନ୍ତି । ସେ କହିଛନ୍ତି ଯେ ଉପରାଷ୍ଟ୍ରପତିଙ୍କୁ ନେଇ ସରକାର ଗର୍ବିତ । ଉପରାଷ୍ଟ୍ରପତି ଏବଂ ରାଜ୍ୟସଭାର ଅଧ୍ୟକ୍ଷ ଭାବେ ଧନଖଡ଼ଙ୍କ କାର୍ଯ୍ୟ ନିରପେକ୍ଷ ଏବଂ ପେଶାଦାର । ରିଜିଜୁ କହିଛନ୍ତି, 'ବିରୋଧୀଦଳ ରାଜ୍ୟସଭା ଏବଂ ଲୋକସଭାରେ ପଦ ମର୍ଯ୍ୟାଦାର ସମ୍ମାନହାନୀ କରିଛନ୍ତି । କଂଗ୍ରେସ ପାର୍ଟି ଏବଂ ଏହାର ସହଯୋଗୀ ଲଗାତାର ଆସନର ନିର୍ଦ୍ଦେଶ ପାଳନ ନକରି ଦୁର୍ବ୍ୟହାର କରିଛନ୍ତି ।'
ସଂସଦୀୟ ବ୍ୟାପାର ମନ୍ତ୍ରୀ କହିଛନ୍ତି, 'ଉପରାଷ୍ଟ୍ରପତି ଜଗଦୀପ ଧନଖଡ଼ ଅତ୍ୟନ୍ତ ସାଧାରଣ ପୃଷ୍ଠଭୂମିରୁ ଆସିଛନ୍ତି । ସେ ଗୃହ ଭିତରେ ଏବଂ ବାହାରେ ଚାଷୀଙ୍କ କଲ୍ୟାଣ କଥା କୁହନ୍ତି । ସେ ଆମ ସମସ୍ତଙ୍କ ମାର୍ଗଦର୍ଶନ କରାନ୍ତି । ଆମେ ତାଙ୍କୁ ସମ୍ମାନ କରୁ ।' ରିଜିଜୁ କହିଛନ୍ତି, 'ଯେଉଁ ନୋଟିସ ଦିଆଯାଇଛି ତାହା ଉପରେ ଯେଉଁ ୬୦ ସାଂସଦଙ୍କ ହସ୍ତାକ୍ଷର ରହିଛି । ମୁଁ ସେହି ସାଂସଦଙ୍କ ଏହି ପଦକ୍ଷେପ ନିନ୍ଦା କରୁଛି । ଏନଡିଏ ପାଖରେ ବହୁମତ ରହିଛି ଏବଂ ଅଧ୍ୟକ୍ଷଙ୍କ ଉପରେ ଆମ ସମସ୍ତଙ୍କ ଭରସା ରହିଛି । ଯେପରି ଭାବେ ସେ ଗୃହର ମାର୍ଗଦର୍ଶନ କରୁଛନ୍ତି, ସେଥିରେ ଆମେ ଖୁସି ଅଛୁ ।'
ଉଲ୍ଲେଖଯୋଗ୍ୟ ଯେ ବିରୋଧୀ ଇଣ୍ଡି ମେଣ୍ଟ ମଙ୍ଗଳବାର ରାଜ୍ୟସଭା ଅଧ୍ୟକ୍ଷ ଧନଖଡ଼ଙ୍କ ବିରୋଧରେ ଅନାସ୍ଥା ପ୍ରସ୍ତାବ ଆଣିବା ପାଇଁ ନୋଟିସ୍ ଦେଇଛନ୍ତି । ରାଜ୍ୟସଭା ସଭାପତି ପକ୍ଷପାତ କରୁଥିବା ବିରୋଧୀ ଅଭିଯୋଗ କରିଛନ୍ତି । ଯଦି ପ୍ରସ୍ତାବ ଆଗତ ହୁଏ ତେବେ ଏହାକୁ ପାରିତ କରିବା ପାଇଁ ସାଧାରଣ ବହୁମତ ଆବଶ୍ୟକ ହେବ । କିନ୍ତୁ ୨୪୩ ସଂଦସ୍ୟ ବିଶିଷ୍ଟ ଗୃହରେ ବିରୋଧୀଙ୍କ ପାଖରେ ଆବଶ୍ୟକୀୟ ସଂଖ୍ୟା ନାହିଁ ।
