ମୁମ୍ଵାଇ ୦୩।୦୪; ଷ୍ଟାଣ୍ଡ-ଅପ୍ କମେଡିଆନ କୁନାଲ କାମରା । ବର୍ତ୍ତମାନ ତାଙ୍କୁ ନେଇ ବିବାଦ ବୃଦ୍ଧି ପାଇଛି। ପୋଲିସ ତାଙ୍କୁ ପଚରାଉଚରା ପାଇଁ ତୃତୀୟ ଥର ସମନ କରିଛି। ଏନେଇ ତାଙ୍କୁ ଏପ୍ରିଲ ୫ରେ ହାଜର ହେବାକୁ ନିର୍ଦ୍ଦେଶ ଦେଇଛି । ମୁମ୍ବାଇ ପୋଲିସ କହିଛି ଯେ ଏହା ପୂର୍ବରୁ ମଧ୍ୟ କୁନାଲ କାମରାଙ୍କୁ ଦୁଇଥର ସମନ ପାଇଁ ଡକାଯାଇଥିଲା। କିନ୍ତୁ ସେ ଉଭୟ ଥର ହାଜର ହୋଇ ନଥିଲେ।

ଏହି ମାମଲାରେ କୁନାଲ କାମରା ମାଡ୍ରାସ ହାଇକୋର୍ଟର ଦ୍ୱାରସ୍ଥ ହୋଇଥିଲେ । କୋର୍ଟରେ ଆଗୁଆ ଜାମିନ ଆବେଦନ କରିଥିଲେ। ହାସ୍ୟ ଅଭିନେତା ଜଣକ କୋର୍ଟରେ ଟ୍ରାଞ୍ଜିଟ୍ ଆଣ୍ଟିସିପେଟୋରୀ ଜାମିନ ପାଇଁ ଆବେଦନ କରିଥିଲେ। ମାଡ୍ରାସ ହାଇକୋର୍ଟର ମୁଖ୍ୟ ଖଣ୍ଡପୀଠ ସମ୍ମୁଖରେ ଜରୁରୀ ଶୁଣାଣି ପାଇଁ ଓକିଲମାନେ ଦାବି କରିଥିଲେ। କାମରାଙ୍କ ବିରୋଧରେ ମହାରାଷ୍ଟ୍ରରେ ଏକ ମାମଲା ରୁଜୁ ହୋଇଛି। କିନ୍ତୁ ସେ ବର୍ତ୍ତମାନ ତାମିଲନାଡୁରେ ଅଛନ୍ତି। ମାଡ୍ରାସ ହାଇକୋର୍ଟ ଏପ୍ରିଲ ୭ ପର୍ଯ୍ୟନ୍ତ କାମରାଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ ନକରିବାକୁ ନିର୍ଦ୍ଦେଶ ଦେଇଥିଲେ।

କହିବାକୁ ଗଲେ କୁନାଲ କାମରା ତାଙ୍କ ସୋସିଆଲ ମିଡିଆ ହ୍ୟାଣ୍ଡେଲ X ରେ ତାଙ୍କର ଏକ ଶୋ’ର ଏକ ଭିଡିଓ ପୋଷ୍ଟ କରିଥିଲେ। ଏହି ଭିଡିଓରେ ସେ ମହାରାଷ୍ଟ୍ରର ଉପମୁଖ୍ୟମନ୍ତ୍ରୀ ଏକନାଥ ସିନ୍ଦେଙ୍କ ବିରୁଦ୍ଧରେ ଅପମାନଜନକ ମନ୍ତବ୍ୟ ଦେଇଛନ୍ତି। ଏହି କାରଣରୁ, ଏକନାଥ ସିନ୍ଦେଙ୍କ ସମର୍ଥକମାନେ ତାଙ୍କ ବିରୁଦ୍ଧରେ ଏଫଆଇଆର ଦାୟର କରିଥିଲେ। ତାଙ୍କୁ ଏବେ ପଚରାଉଚରା ପାଇଁ ଡକାଯାଉଛି। କିନ୍ତୁ ଏପର୍ଯ୍ୟନ୍ତ ଜାରି ହୋଇଥିବା ଦୁଇଟି ନୋଟିସରେ ସେ ହାଜର ହୋଇନାହାଁନ୍ତି। ଏବେ ତାଙ୍କୁ ତୃତୀୟ ନୋଟିସ୍ ଜାରି କରାଯାଇଛି।