ନୂଆଦିଲ୍ଲୀ: ମହାରାଷ୍ଟ୍ର ସରକାରରେ ମନ୍ତ୍ରୀ ଭାବରେ ଶପଥ ଗ୍ରହଣ କରିଛନ୍ତି ଏନସିପି ନେତା ଛଗନ ଭୁଜବଳ। ଶପଥ ସମାରୋହରେ ମହାରାଷ୍ଟ୍ରର ସିଏମ୍ ଦେବେନ୍ଦ୍ର ଫଡନବିସ, ଡେପୁଟି ସିଏମ୍ ଏକନାଥ ସିନ୍ଦେ ଏବଂ ଅଜିତ ପାୱାର ମଧ୍ୟ ଉପସ୍ଥିତ ଥିଲେ। ମହାରାଷ୍ଟ୍ରରେ ଦେବେନ୍ଦ୍ର ଫଡନବିସଙ୍କ ନେତୃତ୍ୱାଧୀନ ସରକାର ମଙ୍ଗଳବାର ତାଙ୍କ କ୍ୟାବିନେଟର ବିସ୍ତାର କରୁଛନ୍ତି। ମହାରାଷ୍ଟ୍ର ରାଜନୀତିରେ ଅନ୍ୟାନ୍ୟ ପଛୁଆ ବର୍ଗ (ଓବିସି)ର ସବୁଠାରୁ ବଡ଼ ଚେହେରା ମଧ୍ୟରୁ ଜଣେ ବୋଲି ବିବେଚନା କରାଯାଉଥିବା ଛଗନ ଭୁଜବଳ ପୁଣି ଥରେ ମନ୍ତ୍ରୀ ହୋଇଛନ୍ତି।
ମହାରାଷ୍ଟ୍ର ସରକାରରେ ଛଗନ ଭୁଜବଳ ମନ୍ତ୍ରୀ ଭାବରେ ଶପଥ ନେବା ବିଷୟରେ ଏକନାଥ ସିନ୍ଦେ କହିଛନ୍ତି, "ଛଗନ ଭୁଜବଳ ପୂର୍ବରୁ ମନ୍ତ୍ରୀ ରହିସାରିଛନ୍ତି ଏବଂ ଅନେକ ବିଭାଗର ନେତୃତ୍ୱ ନେଇଛନ୍ତି। ସେ ଜଣେ ଅଭିଜ୍ଞ ନେତା, ମୁଁ ତାଙ୍କୁ ଅଭିନନ୍ଦନ ଜଣାଉଛି ଏବଂ ତାଙ୍କ ଅଭିଜ୍ଞତାରୁ ରାଜ୍ୟ ସରକାର ବହୁତ ଲାଭବାନ ହେବେ।"
ପ୍ରକାଶଥାଉକି ଯେ ବରିଷ୍ଠ ଏନସିପି ନେତା ଛଗନ ଭୁଜବଳ ମଧ୍ୟ ପୂର୍ବ ମହାୟୁତି ସରକାରରେ ମନ୍ତ୍ରୀ ଥିଲେ। ଏନସିପିର ପ୍ରମୁଖ ନେତାମାନଙ୍କ ମଧ୍ୟରୁ ଜଣେ ବୋଲି ବିବେଚିତ ଭୁଜବଳ ନୂତନ ସରକାରରେ ମନ୍ତ୍ରୀ ହେବା ନିଶ୍ଚିତ ବୋଲି ମନେ କରାଯାଉଥିଲା। ଦେବେନ୍ଦ୍ର ଫଡନବିସ କ୍ୟାବିନେଟରେ ଭୁଜବଳଙ୍କୁ ସ୍ଥାନ ଦିଆଯାଇ ନଥିଲା। ୭୭ ବର୍ଷୀୟ ବରିଷ୍ଠ ନେତା ଏହା ଉପରେ ଖୋଲାଖୋଲି ଅସନ୍ତୋଷ ପ୍ରକାଶ କରିଥିଲେ ଏବଂ ଅଜିତ ପାୱାରଙ୍କୁ ମଧ୍ୟ ଟାର୍ଗେଟ କରିଥିଲେ। ଛଗନ ଭୁଜବଳ ନାସିକ ଜିଲ୍ଲାର ୟେଭଲା ବିଧାନସଭା ଆସନର ବିଧାୟକ।
ଧନଞ୍ଜୟ ମୁଣ୍ଡେଙ୍କ ସ୍ଥାନରେ ଦେବେନ୍ଦ୍ର ଫଡନବିସଙ୍କ ମନ୍ତ୍ରିମଣ୍ଡଳରେ ଛଗନ ଭୁଜବଳଙ୍କୁ ସାମିଲ କରାଯାଇଛି। ସୂଚନାଯୋଗ୍ୟ ଯେ ଧନଞ୍ଜୟ ମୁଣ୍ଡେ ସ୍ୱାସ୍ଥ୍ୟଗତ କାରଣ ଦର୍ଶାଇ ମାର୍ଚ୍ଚ ମାସରେ ମନ୍ତ୍ରୀ ପଦରୁ ଇସ୍ତଫା ଦେଇଥିଲେ। ତାଙ୍କ ପାଖରେ ଖାଦ୍ୟ ଏବଂ ଯୋଗାଣ ବିଭାଗର ଦାୟିତ୍ୱ ଥିଲା। ଜଣେ ସରପଞ୍ଚଙ୍କ ହତ୍ୟା ମାମଲାରେ ଧନଞ୍ଜୟ ମୁଣ୍ଡେଙ୍କ ଜଣେ ସହଯୋଗୀଙ୍କ ନାମ ଆସିବା ପରେ ତାଙ୍କ ଉପରେ ଇସ୍ତଫା ଦେବା ପାଇଁ ଚାପ ବଢ଼ି ଯାଇଥିଲା। ସରପଞ୍ଚ ଦେଶମୁଖଙ୍କ ହତ୍ୟା ମାମଲାରେ ଧନଞ୍ଜୟ ମୁଣ୍ଡେଙ୍କ ସହଯୋଗୀ ବାଲ୍ମିକି କରାଡଙ୍କ ନାମ ସାମ୍ନାକୁ ଆସିଥିଲା।
ଗତ ବର୍ଷ ଡିସେମ୍ବରରେ, ଛଗନ ଭୁଜବଳଙ୍କୁ କ୍ୟାବିନେଟ ବିସ୍ତାରରେ ମନ୍ତ୍ରୀ ପଦ ମିଳିନଥିଲା। ସେ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନବିସଙ୍କୁ ଭେଟିଥିଲେ। ଏହା ପରେ ଭୁଜବଳ ଖୋଲାଖୋଲି ଭାବରେ ନିଜର ଅସନ୍ତୋଷ ପ୍ରକାଶ କରିଥିଲେ।
