ନୂଆଦିଲ୍ଲୀ ୦୧/୧୧:  ଦୁବାଇ ଏୟାରପୋର୍ଟରେ ଅଘଟଣ । ବିମାନରୁ ଓହ୍ଲାଉ ଓହ୍ଲାଉ ପଡିଗଲେ ପାକିସ୍ତାନ ରାଷ୍ଟ୍ରପତି ଆସିଫ ଅଲ୍ଲି ଜର୍ଦ୍ଦାରୀ । ଅସାବଧାନତାବଶତଃ ଖସି ପଡିବାରୁ ଜର୍ଦ୍ଦାରୀଙ୍କ ଗୋଡ ଭାଙ୍ଗି ଯାଇଛି । ଇସଲାମବାଦରୁ ଦୁବାଇ ଗସ୍ତ କରି ଜର୍ଦ୍ଦାରୀ ଦୁବାଇ ଏୟାରପୋର୍ଟରେ ପହଞ୍ଚିଥିଲେ  । ସେଠାରେ ଫ୍ଲାଇଟରୁ ଓହ୍ଲାଇବା ସମୟରେ ସେ ଏଭଳି ପରିସ୍ଥିତିର ସମ୍ମୁଖୀନ ହୋଇଛନ୍ତି । ତୁରନ୍ତ ତାଙ୍କୁ ଦୁବାଇ ମେଡିକାଲରେ ଭର୍ତ୍ତି କରାଯାଇଥିଲା । ସେଠାରେ ଗୋଡରେ ପ୍ଲାଷ୍ଟର କରାଯାଇଛି । ତାଙ୍କୁ ଏବେ ୪ ମାସ ରେଷ୍ଟ ପାଇଁ ପରାମର୍ଶ ଦେଇଛନ୍ତି ଡାକ୍ତର ।ଜର୍ଦ୍ଦାରୀ ଆସନ୍ତା ୪ରୁ ୯ ଯାଏ ଚୀନ ଗସ୍ତରେ ଯିବାକୁ ସ୍ଥିର ହୋଇଥିଲା । ଆସନ୍ତା ୫ରେ ସାଂଘାଇରେ ହେବାକୁ ଥିବା ବିଶ୍ବସ୍ତରୀୟ ପ୍ରଦର୍ଶନୀରେ ଭାଗ ନେଇଥାନ୍ତେ । ଏବେ ଗୋଡ ଭାଙ୍ଗିବା ପରେ ସବୁକିଛି କାର୍ଯ୍ୟକ୍ରମ ବାତିଲ କରାଯାଇଛି । ୬୯ ବର୍ଷୀୟ ଜର୍ଦ୍ଦାରୀ ଅନେକ ସମୟରେ ସ୍ବାସ୍ଥ୍ୟ ସମସ୍ୟାର ସମ୍ମୁଖୀନ ହେଉଥିବା ଖବର ଆସିଛି ।