ଭଦ୍ରକ: ଡକାୟତି ପାଇଁ ପ୍ଳାନିଂ ବେଳେ ଧରାହେଲେ ୫ ଡକାୟତ । ରାତି ଅଧରେ ଗୋଡ଼ାଇ ଗୋଡ଼ାଇ ଧରିଲା ପୋଲିସ। ଭଦ୍ରକ ଜିଲ୍ଲା ତିହିଡି ପୋଲିସ ଏହି ଡକାୟତ ଗ୍ୟାଙ୍ଗକୁ ଧରିଛି। ବିଳମ୍ବିତ ରାତିରେ ବିଶେଷ ସୂତ୍ରରୁ ଖବର ମିଳିଥିଲା ଯେ ଦୋଳସାହି ଗୋରୁହାଟ ପଡିଆରେ ପାଞ୍ଚ ଛଅ ଜଣ ଲୋକ ଅସ୍ତ୍ରଶସ୍ତ୍ର ଧରି ଡକାୟତି ପାଇଁ ଯୋଜନା କରୁଛନ୍ତି। ତିହିଡି ଏଏସଆଇଙ୍କ ନେତୃତ୍ୱରେ ପୋଲିସ ଟିମ୍ ରାତ୍ର ପାଟ୍ରୋଲିଂ କରୁଥିବା ବେଳେ ତାଙ୍କୁ ଏ ବିଷୟରେ ଜଣେଇ ଦିଆଯାଇଥିଲା।
ପାଟ୍ରୋଲିଂ ଟିମ ରାତି ଗୋଟାଏ ବେଳେ ଉକ୍ତ ସ୍ଥାନରେ ଚଢଉ କରିବା ବେଳେ ଆସାମୀମାନେ ପୋଲିସ ଟିମକୁ ଦେଖି ସେଠାରୁ ଦୌଡି ପଳାଇଥିବା ସମୟରେ ପୋଲିସ ପାଞ୍ଚଜଣଙ୍କୁ ଧରିବାରେ ସକ୍ଷମ ହୋଇଥିଲେ। ଗିରଫ ଡକାୟତମାନେ ହେଲେ ଦୋଳସାହିର ଦୁଇ ଭାଇ ଅଜୟ ଦାସ , ସଦାନନ୍ଦ ଦାସ , ସିବରାମ ଜେନା, ଗଞ୍ଜାମ ଜିଲ୍ଲା ଭଞ୍ଜନଗର ଥାନା ଅଞ୍ଚଳର ରାଜା ନାୟକ ଖୋର୍ଦ୍ଧା ଥାନା ଅଞ୍ଚଳର ଚନ୍ଦନ ସାହୁ।
ସେମାନଙ୍କୁ ଅଟକ ରଖି ଜଣ ଜଣ କରି ଖୋଜା ଖୋଜି କରିବାରୁ ସେମାନଙ୍କ ପାଖରୁ ଦୁଇଟି ଖଣ୍ଡା, ଏକ ଲୁହା ରଡ, ଏକ ମୁନିଆ ଛୁରୀ, ହାତୁଡି ମିଳିଥିଲା। ସେମାନେ ଗୁଆମାଳ ଗାଁରେ ଏକ ଘରେ ଡକାୟତି କରିବାପାଇଁ ଏକଜୁଟ ହୋଇଛନ୍ତି ବୋଲି ପୋଲିସକୁ କହିଥିବା ବେଳେ ଗିରଫ ଅପରାଧୀମାନେ ଆଗରୁ ବହୁ ଅପରାଧରେ ସମ୍ପୃକ୍ତ ଥିବାର ଜଣାଯାଇଛି। ଭଦ୍ରକ ଚାନ୍ଦବାଲି ରାଜ୍ୟ ରାଜପଥରେ ଯାଅ ଆସ କରୁଥିବା ଯାତ୍ରୀ, କିମ୍ବା ରାସ୍ତା କଡ଼ରେ ଥିବା ଘରୁ ଡକାୟତ କରିବାକୁ ସେମାନଙ୍କର ଯୋଜନା ଥିବା ତଦନ୍ତରୁ ଜଣାଯାଇଛି।
