ନୂଆଦିଲ୍ଲୀ: ଭାରତ-ଆମେରିକା ବାଣିଜ୍ୟ ଚୁକ୍ତିନାମା ଉପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ କଡ଼ା ସମାଲୋଚନା କରିଛନ୍ତି କଂଗ୍ରେସ ନେତା ରାହୁଲ ଗାନ୍ଧୀ। ଭାରତ ବାଣିଜ୍ୟ ଚୁକ୍ତିନାମା ସମ୍ବନ୍ଧୀୟ ସମୟସୀମା ମଧ୍ୟରେ ଆମେରିକା ସହିତ କୌଣସି ଚୁକ୍ତି କରିବ ନାହିଁ ବୋଲି କେନ୍ଦ୍ର ବାଣିଜ୍ୟ ମନ୍ତ୍ରୀ ପୀୟୁଷ ଗୋୟଲ ଦାବି କରିଥିଲେ। ଜାତୀୟ ସ୍ୱାର୍ଥ ପାଇଁ ଚୁକ୍ତିନାମା କେବଳ ଚୂଡ଼ାନ୍ତ ହେବ ବୋଲି ସେ କହିଥିଲେ।
ପୀୟୁଷ ଗୋୟଲଙ୍କ ବୟାନ ପରେ ପ୍ରଧାନମନ୍ତ୍ରୀ ମୋଦୀଙ୍କୁ ଆକ୍ରମଣ କରିଛନ୍ତି ରାହୁଲ ଗାନ୍ଧୀ। ରାହୁଲ ସୋସିଆଲ ମିଡିଆରେ ଏକ ପୋଷ୍ଟ ସେୟାର କରିଛନ୍ତି। ସେ ଲେଖିଛନ୍ତି ଯେ 'ପିୟୁଷ ଗୋୟଲ ଯେତେ ଇଚ୍ଛା ଛାତି ପିଟି ପାରିବେ, କିନ୍ତୁ ମୋ କଥାରେ ଧ୍ୟାନ ଦିଅନ୍ତୁ, ଟ୍ରମ୍ପଙ୍କ ଶୁଳ୍କ ସମୟସୀମା ଆଗରେ ମୁଣ୍ଡ ନୁଆଁଇବେ ମୋଦୀ।' ଭାରତ ଏବଂ ପାକିସ୍ତାନ ମଧ୍ୟରେ ରାଷ୍ଟ୍ରପତି ଟ୍ରମ୍ପଙ୍କ ଯୁଦ୍ଧବିରତି ଦାବିର ଉତ୍ତର ନ ଦେବା ପାଇଁ ପ୍ରଧାନମନ୍ତ୍ରୀଙ୍କୁ ସମାଲୋଚନା କରୁଛି କଂଗ୍ରେସ।
ଆମେରିକା ସହିତ ପ୍ରସ୍ତାବିତ ବାଣିଜ୍ୟ ଚୁକ୍ତିନାମା ବିଷୟରେ ପଚରାଯିବାରୁ, ପୀୟୁଷ ଗୋୟଲ କହିଛନ୍ତି ଯେ ଏକ ମୁକ୍ତ ବାଣିଜ୍ୟ ଚୁକ୍ତିନାମା ସେତେବେଳେ ସମ୍ଭବ ଯେତେବେଳେ ଉଭୟ ପକ୍ଷ ଲାଭବାନ ହୁଅନ୍ତି। ସେ କହିଛନ୍ତି ଯେ ଜାତୀୟ ସ୍ୱାର୍ଥ ସର୍ବଦା ସର୍ବୋଚ୍ଚ ହେବା ଉଚିତ। ଏହାକୁ ମନେ ରଖି, ଯଦି କୌଣସି ଚୁକ୍ତି ହୁଏ, ତେବେ ଭାରତ ଏଥିପାଇଁ ପ୍ରସ୍ତୁତ।
ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଭାରତ ସହିତ ବାଣିଜ୍ୟ ଚୁକ୍ତିକୁ ଚୂଡ଼ାନ୍ତ କରିବା ପାଇଁ ଜୁଲାଇ ୯ ତାରିଖକୁ ଶେଷ ତାରିଖ ଭାବରେ ସ୍ଥିର କରିଛନ୍ତି। ଭାରତ ସରକାର ଆମେରିକା ସହିତ ୟୁରୋପୀୟ ସଂଘ, ନ୍ୟୁଜିଲ୍ୟାଣ୍ଡ, ଓମାନ, ଚିଲି ଏବଂ ପେରୁ ସହିତ ବାଣିଜ୍ୟ ଚୁକ୍ତି ଉପରେ ଆଲୋଚନା କରୁଛନ୍ତି।
ପୀୟୁଷ ଗୋୟଲ କହିଛନ୍ତି ଯେ ବାଣିଜ୍ୟ ଚୁକ୍ତି ସମ୍ପର୍କରେ ତାଙ୍କର ବର୍ତ୍ତମାନ ୱାଶିଂଟନ ଯିବାର କୌଣସି ଯୋଜନା ନାହିଁ। ବାଣିଜ୍ୟ ଚୁକ୍ତି ଉପରେ ଆମେରିକା ସହିତ କଥାବାର୍ତ୍ତା କରୁଥିବା ଭାରତୀୟ ଆଲୋଚନାକାରୀ ରାଜେଶ ଅଗ୍ରୱାଲଙ୍କ ନେତୃତ୍ୱରେ ଭାରତୀୟ ପ୍ରତିନିଧିମଣ୍ଡଳ ଫେରି ଆସିଛି। କୃଷି ଏବଂ ଅଟୋମୋବାଇଲ ଭଳି ପ୍ରସଙ୍ଗରେ ସହମତି ଏପର୍ଯ୍ୟନ୍ତ ହୋଇପାରିନାହିଁ।
