ନୂଆଦିଲ୍ଲୀ: ଆଇଏନଏସ୍ ତୁଶୀଲର ଆୟୋଗରେ ଭାଗ ନେବାକୁ ଋଷ ରାଜଧାନୀ ମସ୍କୋରେ ପହଞ୍ଚିଛନ୍ତି ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ । ସେ ତାଙ୍କ ପ୍ରତିପକ୍ଷ ଆଣ୍ଡ୍ରେ ବେଲାସୋଭ ଏବଂ ଋଷର ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ସହ ମଧ୍ୟ ଆଲୋଚନା କରିବେ। ଏହା ସହିତ ସେ ସାମରିକ ଏବଂ ବୈଷୟିକ ସହଯୋଗ ଉପରେ ଭାରତ- ଋଷ ଆନ୍ତଃସରକାରୀ ଆୟୋଗର ଏକବିଂଶତମ ବୈଠକରେ ମଧ୍ୟ ଅଧ୍ୟକ୍ଷତା କରିବେ। ଏହି ଅବଧି ମଧ୍ୟରେ ଅନେକ ବିଶ୍ୱସ୍ତରୀୟ ପ୍ରସଙ୍ଗ ଉପରେ ଆଲୋଚନା ହେବ।
ପ୍ରତିରକ୍ଷା ମନ୍ତ୍ରଣାଳୟ ଅନୁଯାୟୀ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ଏବଂ ଋଷର ପ୍ରତିରକ୍ଷା ମନ୍ତ୍ରୀ ବେଲାସୋଭ ପ୍ରତିରକ୍ଷା କ୍ଷେତ୍ରରେ ଦୁଇ ଦେଶ ମଧ୍ୟରେ ଥିବା ବହୁମୁଖୀ ସମ୍ପର୍କର ସମୀକ୍ଷା କରିବେ। ଏହା ବ୍ୟତୀତ ସାମରିକ ଏବଂ ଶିଳ୍ପ ସହଯୋଗ ସମେତ ପାରସ୍ପରିକ ଆଗ୍ରହର ସମସାମୟିକ ଆଞ୍ଚଳିକ ଏବଂ ବିଶ୍ୱସ୍ତରୀୟ ପ୍ରସଙ୍ଗ ଉପରେ ମଧ୍ୟ ସେମାନେ ମତ ବିନିମୟ କରିବେ। ଏହା ବ୍ୟତୀତ ଦ୍ୱିତୀୟ ବିଶ୍ୱଯୁଦ୍ଧରେ ନିହତ ସୋଭିଏତ୍ ସ୍ୟୈନିକମାନଙ୍କ ସମ୍ମାନାର୍ଥେ ଶ୍ରଦ୍ଧାଞ୍ଜଳି ଅର୍ପଣ କରିବେ। ମସ୍କୋରେ ଭାରତୀୟ ସମ୍ପ୍ରଦାୟକୁ ମଧ୍ୟ ସମ୍ବୋଧିତ କରିବାର କାର୍ଯ୍ୟକ୍ରମ ରହିଛି।
ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ଏବଂ ନୌସେନାର ମୁଖ୍ୟ ଆଡମିରାଲ ଦୀନେଶ କେ ତ୍ରିପାଠୀ ଅତ୍ୟାଧୁନିକ ଜ୍ଞାନକୌଶଳ ସହିତ ସଜ୍ଜିତ ଯୁଦ୍ଧ ଜାହାଜ INS ତୁଶିଲକୁ ଋଷରେ ନିର୍ମିତ ତଥା ଦେଶୀ ମିଶାଇଲ ସହିତ କମିଶନ କରିବେ। ଏହି ଯୁଦ୍ଧ ଜାହାଜ ସହିତ ସମୁଦ୍ରରେ ଭାରତର ଶକ୍ତି ଆହୁରି ବୃଦ୍ଧି ପାଇବ। ୩୯୦୦ ଟନ୍ ଓଜନ ବିଶିଷ୍ଟ ଏହି ଯୁଦ୍ଧ ଜାହାଜକୁ ଦେଖିଲେ ଶତ୍ରୁଦେଶ ଭୟରେ ଥରି ଉଠିବେ।
INS Tushil ର ବିଶେଷତ୍ୱ ହେଉଛି- ଏହି ଯୁଦ୍ଧ ଜାହାଜର ଲମ୍ବ ୧୨୫ ମିଟର ଏବଂ ଓଜନ ୩୯୦୦ ଟନ୍, ଯାହା ପ୍ରଚଣ୍ଡ ଆକ୍ରମଣ ପାଇଁ ଜଣାଶୁଣା | INS Tushil ଋଷ ଏବଂ ଭାରତୀୟ ଅତ୍ୟାଧୁନିକ ଜ୍ଞାନକୌଶଳ ଏବଂ ଯୁଦ୍ଧ ଜାହାଜ ନିର୍ମାଣର ଏକ ମହାନ ମିଶ୍ରଣ। ଏହି ଜାହାଜ ଘଣ୍ଟାପ୍ରତି ସର୍ବାଧିକ ୫୯ କିଲୋମିଟର ବେଗରେ ଚାଲିପାରିବ।
