ଭୁବନେଶ୍ୱର ୨୩/୦୫: ଦେଶରେ ୨୦୨୧ ମସିହାରେ ଶୂନରୁ ୪ ବର୍ଷ ଶିଶୁଙ୍କ ମଧ୍ୟରେ ୭.୯% ଙ୍କ ମୃତ୍ୟୁ ହୋଇଥିଲା । ସେହି ସମୟରେ ଓଡ଼ିଶାରେ ୭.୫%ଙ୍କ ମୃତ୍ୟୁ ହୋଇଛି । କେରଳରେ ସର୍ବନିମ୍ନ ୧.୧% ଶିଶୁଙ୍କ ମୃତ୍ୟୁ ହୋଇଥିଲା ବେଳେ ଉତ୍ତର ପ୍ରଦେଶରେ ସର୍ବାଧିକ ୧୪.୫% ଶିଶୁଙ୍କ ମୃତ୍ୟୁ ହୋଇଛି । ଏହି କ୍ଷେତ୍ରରେ ଓଡ଼ିଶାର ସ୍ଥାନ ୭ମ ରହିଛି । କେନ୍ଦ୍ର ସରକାରଙ୍କ ସାମ୍ପୁଲ ରେଜିଷ୍ଟ୍ରେସନ୍ ସିଷ୍ଟମ୍ ରିପୋର୍ଟ-୨୦୨୧ରୁ ଏହା ସ୍ପଷ୍ଟ ହୋଇଛି ।
ସାମ୍ପୁଲ ରେଜିଷ୍ଟ୍ରେସନ୍ ସିଷ୍ଟମ୍ ରିପୋର୍ଟ-୨୦୨୦ ଅନୁଯାୟୀ ଜାତୀୟସ୍ତରରେ ୧୦% ମୃତ୍ୟୁ ହୋଇଥିଲା ବେଳେ ଓଡ଼ିଶାରେ ୯.୨% ମୃତ୍ୟୁ ହୋଇଛି । ରିପୋର୍ଟ ୨୦୨୧ରେ ଜାତୀୟସ୍ତରରେ ଓଡ଼ିଶା ୭ମ ସ୍ଥାନରେ ରହିଥିଲା ୨୦୨୦ରେ ଓଡ଼ିଶା ୮ମ ସ୍ଥାନରେ ରହିଥିଲା । ହେଲେ ଅର୍ଥାତ ପୂର୍ବ ବର୍ଷ ଅପେକ୍ଷା ଓଡ଼ିଶା ଗୋଟିଏ ପାହାଚକୁ ଖସିଛି । ଯାହାକି ରାଜ୍ୟ ପାଇଁ ଭଲ ଖବର ରହିଛି । ରିପୋର୍ଟ ୨୦୨୧ ଅନୁଯାୟୀ, ଜାତୀୟସ୍ତରରେ ଶିଶୁମୃତ୍ୟୁରେ ଗ୍ରାମାଞ୍ଚଳରେ ୯.୧% ଏବଂ ସହରାଞ୍ଚଳରେ ୪.୯% ରହିଛି ।
ଓଡ଼ିଶାରେ ଏହି କ୍ଷେତ୍ରରେ ଯଥାକ୍ରମେ ୭.୮% ଓ ୫.୪% ରହିଛି । ସେହିପରି ସର୍ବନିମ୍ନ ବର୍ଗରେ କେରଳରେ ଯଥାକ୍ରମେ ସର୍ବନିମ୍ନ ଗ୍ରାମାଞ୍ଚଳରେ ୦.୯% ଓ ସହରାଞ୍ଚଳରେ ୧.୩%ଙ୍କ ମୃତ୍ୟୁ ହୋଇଛି । କେରଳ ପଛରେ ରହିଛି ତାମିଲନାଡ଼ୁ । ସେଠାରେ ୨.୨% ଶିଶୁଙ୍କ ମୃତ୍ୟୁ ହୋଇଛି । ଆଉ ଗ୍ରାମାଞ୍ଚଳରେ ୨.୫% ଓ ସହରାଞ୍ଚଳରେ ୧.୯%ଙ୍କ ମୃତ୍ୟୁ ହୋଇଛି । ପଞ୍ଜାବ ୩.୫% ରହି ତୃତୀୟ ସ୍ଥାନରେ ରହିଛି । ସେଠାରେ ଗ୍ରାମାଞ୍ଚଳରେ ୩.୦% ଓ ସହରାଞ୍ଚଳରେ ୪.୫%ଙ୍କ ମୃତ୍ୟୁ ହୋଇଛି ।
ଜାତୀୟସ୍ତରରେ ସର୍ବାଧିକ ମୃତ୍ୟୁ ବର୍ଗରେ ଉତ୍ତର ପ୍ରଦେଶରେ ସର୍ବାଧିକ ଗ୍ରାମାଞ୍ଚଳରେ ୧୫.୮% ଓ ସହରାଞ୍ଚଳରେ ୧୦.୧% ରହିଛି । ମଧ୍ୟପ୍ରଦେଶ ଦ୍ୱିତୀୟ ସ୍ଥାନରେ ରହିଛି । ସେଠାରେ ୧୩.୮%ଙ୍କ ମୃତ୍ୟୁ ହୋଇଛି । ଗ୍ରାମାଞ୍ଚଳରେ ୧୫.୭% ଓ ସହରାଞ୍ଚଳରେ ୭.୮% ରହିଛି । ତୃତୀୟ ସ୍ଥାନରେ ରାଜସ୍ଥାନ । ସେଠାରେ ୧୩.୨%ଙ୍କ ମୃତ୍ୟୁ ହୋଇଛି । ଗ୍ରାମାଞ୍ଚଳରେ ୧୪.୪% ଓ ସହରାଞ୍ଚଳରେ ୯.୪% ରହିଛି ।
ଅନ୍ୟପଟରେ ଓଡ଼ିଶାରୁ ସ୍ୱାସ୍ଥ୍ୟ ବିଭାଗ ବିଶେଷଜ୍ଞ କେରଳ ଯାଇ ସେଠାରେ ସ୍ୱାସ୍ଥ୍ୟ ସ୍ଥିତି ଯାଞ୍ଚ କରିଛନ୍ତି । ସେଠାକାର ସରକାର ଶିଶୁ ସୁରକ୍ଷା ନେଇ କ’ଣ ପଦକ୍ଷେପ ଗ୍ରହଣ କରିଛନ୍ତି ସେନେଇ ତଥ୍ୟ ସଂଗ୍ରହ କରିଛନ୍ତି । ଓଡ଼ିଶାରେ ଶିଶୁ ମୃତ୍ୟୁ ରୋକିବା ଦିଗରେ ସ୍ୱତନ୍ତ୍ର ଭାବେ ଯୋଜନା କରାଯାଇଛି । ଡାକ୍ତରଙ୍କଠାରୁ ନର୍ସଙ୍କ ପର୍ଯ୍ୟନ୍ତ ସ୍ୱତନ୍ତ୍ର ପ୍ରଶିକ୍ଷଣ ନେଇଛନ୍ତି ।
ସ୍ୱାସ୍ଥ୍ୟ ଭିତ୍ତିଭୂମି କ୍ଷେତ୍ରରେ ଶିଶୁଙ୍କ ଚିକିତ୍ସା ପାଇଁ ଏସ୍ଏନ୍ସିୟୁ, ପିକୁ, ଡେ କେୟାର ୟୁନିଟ୍, ଏନ୍ଆରସି, ଡିଇସିଆଇ ଭଳି ଚିକିତ୍ସା ବ୍ୟବସ୍ଥା କରାଯାଇଛି । ସେହିପରି ସାମ୍ପୁଲ ରେଜିଷ୍ଟ୍ରେସନ୍ ସିଷ୍ଟମ୍ ରିପୋର୍ଟ-୨୦୨୦ ଅନୁଯାୟୀ ଓଡ଼ିଶାରେ ୯.୨%ଙ୍କ ଶିଶୁଙ୍କ ମୃତ୍ୟୁ ହୋଇଥିଲା । ଜାତୀୟସ୍ତରରେ ଓଡ଼ିଶା ୮ମ ସ୍ଥାନରେ ରହିଥିଲା । ହେଲେ ରିପୋର୍ଟ ୨୦୨୧ରେ ଓଡ଼ିଶା ୭ମ ସ୍ଥାନରେ ରହିଛି । ଅର୍ଥାତ ଓଡ଼ିଶା ଗୋଟିଏ ସ୍ଥାନକୁ ଖସିଛି ।
