ନୂଆଦିଲ୍ଲୀ: ଜାମ୍ମୁ କାଶ୍ମୀରର ଆଇଏଏସ ଅଫିସର ଶାହ ଫୈଜଲ ଧାରା ୩୭୦ ଉଚ୍ଛେଦକୁ ଚ୍ୟାଲେଞ୍ଜ କରି ଦାଖଲ କରିଥିବା ଯାଚିକାକୁ ଫେରାଇ ନେଇଛନ୍ତି । ସୁପ୍ରିମକୋର୍ଟରୁ ସେ ନିଜ ଯାଚିକା ଫେରାଇ ନେଇଛନ୍ତି । ଗତ ୨୦୧୯ ଅଗଷ୍ଟ ମାସରେ କେନ୍ଦ୍ର ସରକାର ଧାରା ୩୭୦ର ଉଚ୍ଛେଦ କରିଥିଲେ ।
କାଶ୍ମୀରରେ ନରସଂହାର କରାଯାଉଥିବା ଅଭିଯୋଗ ଆଣି ଶାହ ଫୈଜଲ ୦୧୯ ଜାନୁଆରୀ ମାସରେ କେନ୍ଦ୍ର ଗୃହ ମନ୍ତ୍ରଣାଳୟ ନିକଟକୁ ନିଜର ଇସ୍ତଫା ପଠାଇଥିଲେ । ଏହାର କିଛି ମାସ ପରେ ନିଜର ରାଜନୈତିକ ଦଳ ଜାମ୍ମୁ କାଶ୍ମୀର ପିପୁଲ୍ସ ମୁଭମେଣ୍ଟର ଗଠନ କରିଥିଲେ । ତେବେ ନିକଟ ଅତୀତରେ ପୁଣି ଥରେ ପ୍ରଶାସନିକ ସେବାକୁ ଫେରିବା ପାଇଁ ଇଛା ପ୍ରକାଶ କରିଥିଲେ । କେନ୍ଦ୍ର ସରକାର ମଧ୍ୟ ପୁଣି ଥରେ ତାଙ୍କୁ ନିଯୁକ୍ତି ଦେଇଥିଲେ । ଚଳିତ ବର୍ଷ ଏପ୍ରିଲ ମାସରେ ଫୈଜଲ ପୁଣି ଥରେ ସର୍ବଭାରତୀୟ ପ୍ରଶାସନିକ ସେବାକୁ ଫେରିଥିଲେ ଏବଂ କେନ୍ଦ୍ର ସରକାର ତାଙ୍କୁ ସଂସ୍କୃତି ମନ୍ତ୍ରଣାଳୟ ଉପସଚିବ ନିଯୁକ୍ତ କରିଥିଲେ । ଉଲ୍ଲେଖଯୋଗ୍ୟ ଯେ, ଶାହ ଫୈଜଲଙ୍କ ଇସ୍ତଫାକୁ କେନ୍ଦ୍ର ସରକାର ଗ୍ରହଣ କରି ନଥିଲେ ।
ଆଇଏଏସ ଅଧିକାରୀ ଶାହ ଫୈଜଲ ଜାମ୍ମୁ କାଶ୍ମୀରକୁ ସ୍ୱତନ୍ତ୍ର ମାନ୍ୟତା ଦେଉଥିବା ଧାରା ୩୭୦ର ଉଚ୍ଛେଦ ନେଇ ରାଷ୍ଟ୍ରପତିଙ୍କ ନିର୍ଦ୍ଦେଶକୁ ଚ୍ୟାଲେଞ୍ଜ କରି ସୁପ୍ରିମକୋର୍ଟରେ ଯାଚିକା ଦାଖଲ କରିଥିଲେ । ଧାରା ୩୭୦ ଉଚ୍ଛେଦ ବିରୋଧରେ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିବା ୨୩ ଜଣ ଆବେଦନକାରୀଙ୍କ ମଧ୍ୟରୁ ଶାହ ଫୈଜଲ ଜଣେ । ଅନୁଛେଦ ୩୭୦ ଉଚ୍ଛେଦ ସମୟରେ ଶାହ ଫୈଜଲଙ୍କୁ ପବ୍ଲିକ ସେଫ୍ଟି ଆକ୍ଟରେ ବନ୍ଦୀ କରାଯାଇଥିଲା । ପବ୍ଲିକ ସେଫ୍ଟି ଆକ୍ଟ ଅଧିନରେ ଜଣେ ବ୍ୟକ୍ତିଙ୍କୁ ବିନା ଶୁଣାଣିରେ ତିନି ମାସ ଯାଏଁ ବନ୍ଦୀ କରି ରଖାଯାଇ ପାରିବ।
