ଭୁବନେଶ୍ବର ୧୬।୧: ଖୁବ୍‌ଶୀଘ୍ର ଲିଙ୍ଗରାଜ ମନ୍ଦିର ପାଇଁ ସ୍ୱତନ୍ତ୍ର ଆଇନ ଆସିବ ବୋଲି ଆଇନ ମନ୍ତ୍ରୀ ପୃଥ୍ବୀରାଜ ହରିଚନ୍ଦନ କହିଛନ୍ତି ।ନୂଆ ଆଇନ ପାଇଁ କେନ୍ଦ୍ର ସରକାର ଯେଉଁ ସ୍ପଷ୍ଟୀକରଣ ମାଗିଥିଲେ, ତାହା ପ୍ରସ୍ତୁତ ହୋଇ ସାରିଛି । ବଦଳିବା ପରେ ଡ୍ରାଫ୍ଟ ହୋଇଛି । ତାକୁ ରାଷ୍ଟ୍ରପତି ଏବଂ କେନ୍ଦ୍ର ସରକାରଙ୍କ ଅନୁମତି ପାଇଁ ଯିବ । ଖୁବ୍‌ଶୀଘ୍ର ଲିଙ୍ଗରାଜ ମନ୍ଦିର ପାଇଁ ସ୍ୱତନ୍ତ୍ର ଆଇନ ଆସିବ । ନୀତିକାନ୍ତିଙ୍କୁ ବ୍ୟବସ୍ଥିତ କରାଇବା ପାଇଁ ଯାହା ଆବଶ୍ୟକ ସରକାର କରୁଛନ୍ତି ।

ସେବାୟତଙ୍କ ବିବାଦ ଯୋଗୁଁ ଏକାମ୍ର କ୍ଷେତ୍ରାଧିପତି ପ୍ରଭୁ ଲିଙ୍ଗରାଜଙ୍କୁ ଉପବାସରେ ରହିବାକୁ ପଡ଼ିଲା । ୩ ଦିନ ହେଲା ଭୋକ ଓପାସରେ ରହିଲେ ପ୍ରଭୁ ଲିଙ୍ଗରାଜ । ସୋମବାର ରାତିରୁ ମକର ମଣ୍ଡପରେ ରହିଥିଲେ ପ୍ରଭୁ । ନା’ ହେଲା ମଙ୍ଗଳ ଆଳତି ନା’ ହେଲା ଅବକାଶ ନୀତି । ବନ୍ଦ ହୋଇଗଲା ଭୋଗ ସମର୍ପଣ । ବନ୍ଦ ହୋଇଯାଇଥିଲା ଅବଢ଼ା ପ୍ରସ୍ତୁତି । ବଡ଼ୁ ନିଯୋଗ ଓ ବ୍ରାହ୍ମଣ ନିଯୋଗ ମଧ୍ୟରେ ଘୃତ କମଳ ନୀତିକୁ ନେଇ ହୋଇଥିବା ବିବାଦ ପାଇଁ ୩ ଦିନ ହେଲା ପ୍ରଭୁ ଲିଙ୍ଗରାଜଙ୍କ ବନ୍ଦ ରହିଥିଲା ସମସ୍ତ ନୀତିକାନ୍ତି । ଏକାମ୍ର କ୍ଷେତ୍ରାଧିପତି ପ୍ରଭୁ ଲିଙ୍ଗରାଜଙ୍କ ପ୍ରତି ଏପରି ଅବହେଳା କୋଟି କୋଟି ଭକ୍ତଙ୍କ ଭାବାବେଗକୁ ଆଘାତ ଦେଇଥିଲା । ଏମିତିକି ବାହାର ରାଜ୍ୟରୁ ଆସିଥିବା ଶ୍ରଦ୍ଧାଳୁ ଠାକୁରଙ୍କୁ ଭୋଗ ଲଗାଇ ନପାରି ଦୁଃଖିତ ହୋଇଥିଲେ । ସେବାୟତଙ୍କ ମନମାନି ଯୋଗୁଁ ବାହାର ରାଜ୍ୟର ଶ୍ରଦ୍ଧାଳୁଙ୍କ ପାଖରେ ନିନ୍ଦିତ ହୋଇଛି ଓଡ଼ିଶା । ନୂଆବର୍ଷ ଆରମ୍ଭରୁ ଯେତେବେଳେ ପୁରୀ କୋଣାର୍କ ସହ ଲିଙ୍ଗରାଜ ମନ୍ଦିରକୁ ହଜାର ହଜାର ସଂଖ୍ୟାରେ ବାହାର ରାଜ୍ୟର ଶ୍ରଦ୍ଧାଳୁମାନେ ଆସୁଛନ୍ତି, ସେହି ସମୟରେ ଲିଙ୍ଗରାଜ ମନ୍ଦିରରେ ଏଭଳି ଏକ ଅଭାବନୀୟ ଘଟଣା ସେମାନଙ୍କୁ ମର୍ମାହତ କରିଥିଲା । 

ଆରମ୍ଭ ହେବ ପ୍ରଭୁ ଲିଙ୍ଗରାଜଙ୍କ ନୀତିକାନ୍ତି, ବିଭ୍ରାଟ କରିଥିବା ସେବାୟତଙ୍କ ବିରୁଦ୍ଧରେ ହେବ କାର୍ଯ୍ୟାନୁଷ୍ଠାନ

ଠାକୁରଙ୍କୁ ମକର ମଣ୍ଡପରେ ଛାଡ଼ି ଦେଇ କେମିତି ନିଜ ଘରେ ଶାନ୍ତିରେ ଶୋଇପାରିଲେ ସେବାୟତ ?  ଏକାମ୍ର ଅଧିପତିଙ୍କୁ ୩ ଦିନ ହେଲା  ଉପାସରେ ରଖିଥିବା ସେବାୟତଙ୍କୁ କେମିତି ରୁଚିଲା ଖାଦ୍ୟ ?  ଯେଉଁ ପ୍ରଭୁଙ୍କ ପାଇଁ ସେମାନେ ପରିଚୟ ପାଇଛନ୍ତି, ଯେଉଁ ପ୍ରଭୁଙ୍କ ପାଇଁ ସେମାନଙ୍କ ଅଣ୍ଟି ଭରୁଛି, ପେଟ ପୁରୁଛି ସେହି ଠାକୁରଙ୍କ ପ୍ରତି ଏଭଳି ଅବହେଳାକୁ କେମିତି ବରଦାସ୍ତ କରାଯାଇପାରିବ ? ଏମିତିରେ ଶ୍ରୀଲିଙ୍ଗରାଜ ମନ୍ଦିର ସେବାୟତଙ୍କ ବିବାଦକୁ ନେଇ ବୁଧବାର ଚେତାବନୀ ଦେଇଥିଲେ ଆଇନ ମନ୍ତ୍ରୀ ପୃଥ୍ବୀରାଜ ହରିଚନ୍ଦନ । ସେ କହିଥିଲେ ମନ୍ଦିରକୁ ନେଇ ରାଜନୀତି କରିବା ବନ୍ଦ କରନ୍ତୁ । ସେବାୟତଙ୍କ ବିବାଦ ଯୋଗୁଁ ଦୁଇ ଦିନ ହେଲା ଠାକୁରଙ୍କ ନୀତି ବନ୍ଦ ଦୁର୍ଭାଗ୍ୟଜନକ । 

ସେପଟେ ବୁଧବାର ଅପରାହ୍ନରେ ଟ୍ରଷ୍ଟ ବୋର୍ଡ଼ ବୈଠକ ପରେ ବିବାଦର ସମାଧାନ ହୋଇଥିଲା ଓ ଠାକୁରଙ୍କ ନୀତିକାନ୍ତି ଯଥାରୀତି ଚାଲିବ ବୋଲି କହିଥିଲେ ଜିଲ୍ଲାପାଳ । ଆଉ ଯେଉଁମାନେ ବିଶୃଙ୍ଖଳା କରିଥିଲେ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେବ ।୨୪ ଘଣ୍ଟା ଭିତରେ ADM ତଦନ୍ତ କରି ରିପୋର୍ଟ ଦେବେ ବୋଲି ଜିଲ୍ଲାପାଳ ଚଞ୍ଚଲ ରାଣା କହିଥିଲେ । ତେବେ ସେବାୟତଙ୍କ ବିବାଦର ସମାଧାନ ହେବା ପରେ ଠାକୁରଙ୍କ ନୀତିକାନ୍ତି ସ୍ବାଭାବିକ ହୋଇଥିଲା ।

You Can Read:

ସୁରକ୍ଷାକର୍ମୀଙ୍କୁ ସଫଳତା, ବିପୁଳ ପରିମାଣର ମାଓ ସାମଗ୍ରୀ ଠାବ