ମାଲକାନଗିରି ୦୯।୦୧ : ମାଲକାନଗିରି ସୀମାନ୍ତରେ ଏନ୍କାଉଣ୍ଟର । ଛତିଶଗଡ଼ ସୁକୁମା ଏବଂ ବିଜାପୁର ସୀମାନ୍ତରେ ପୋଲିସ-ମାଓବାଦୀଙ୍କ ମଧ୍ୟରେ ଗୁଳି ବିନିମୟ ହୋଇଛି । ଯେଉଁଥିରେ ତିନି ଜଣ ମାଓବାଦୀ ନିହତ ହୋଇଥିବା ସୂଚନା ମିଳିଛି । ଏବେବି ଜଙ୍ଗଲରେ ସର୍ଚ୍ଚ ଅପରେସନ ଜାରି ରହିଥିବା ସୂଚନା ମିଳିଛି ।
ଖବର ଅନୁଯାୟୀ, ସୁକମା ଏବଂ ବିଜାପୁର ସୀମାବର୍ତ୍ତୀ ଜଙ୍ଗଲରେ କିଛି ମାଓବାଦୀ ଲୁଚି ରହିଥିବାର ସ୍ଥାନୀୟ ପୋଲିସକୁ ଗୁଇନ୍ଦା ସୂଚନା ମିଳିଥିଲ । ଏହାପରେ ସୁକୁମା ପୋଲିସ, କୋବ୍ରା, ଡିଆରଜି ବାହିନୀ ଏବଂ ଏସଟିଏଫ୍ ପକ୍ଷରୁ କମ୍ଵିଂ ଅପରେସନ କରାଯାଇଥିଲା। କମ୍ବିଂ ସମୟରେ ସୁରକ୍ଷା କର୍ମୀ ଚାରିପଟୁ ଘେରିଥିବା ଦେଖି ମାଓବାଦୀମାନେ ଗୁଳିଚାଳନା କରିଥିଲେ । ଯାହାର ଦୃଢ ଜବାବ ଦେଇଥିଲେ ସୁରକ୍ଷାକର୍ମୀ । ଦୀର୍ଘ ସମୟ ଧରି ମାଓବାଦୀ ଏବଂ ସୁରକ୍ଷାକର୍ମୀଙ୍କ ମଧ୍ୟରେ ଗୁଳିବିନିମୟ ଜାରି ରହିଥିଲା । ସୁରକ୍ଷା କର୍ମୀଙ୍କ ଗୁଳିରେ ତିନି ଜଣ ମାଓବାଦୀ ନିହତ ହୋଇଥିବା ବେଳେ ଏକାଧିକ ଆହତ ହୋଇଥିବା ଜଣାପଡିଛି ।
ସେପଟେ ଏନ୍କାଉଣ୍ଟର ପରେ ଜଙ୍ଗଲରେ ସର୍ଚ୍ଚ ଅପରେସନକୁ ଜୋରଦାର କରାଯାଇଛି । ପୋଲିସ, କୋବ୍ରା, ଡିଆର୍ଜି ବାହିନୀ ପକ୍ଷରୁ ଚାଲିଛି ସର୍ଚ୍ଚ ଅପରେସନ ।
