ନୂଆଦିଲ୍ଲୀ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କୁ ସମାଲୋଚନା କରିଛନ୍ତି । ଶନିବାର ସେ କହିଛନ୍ତି ଯେ କ୍ରେମଲିନ୍ ପ୍ରକୃତରେ ୟୁକ୍ରେନ ସହ ଯୁଦ୍ଧ ସମାପ୍ତ କରିବାକୁ ଚାହୁଁଛି କି ନାହିଁ ସେନେଇ ସନ୍ଦେହ ହେଉଛି । ନଚେତ କଠୋର ପଦକ୍ଷେପ ନେବାର ଆବଶ୍ୟକତା ପଡ଼ିପାରେ ବୋଲି ସେ କହିଛନ୍ତି ।
ଟ୍ରୁଥ୍ ସୋସିଆଲରେ ପୋଷ୍ଟ କରି ଟ୍ରମ୍ପ କହିଛନ୍ତି, "ଗତ କିଛି ଦିନ ଧରି ପୁଟିନଙ୍କ ଦ୍ୱାରା ଆବାସିକ ଅଞ୍ଚଳ, ସହର ଏବଂ ଘରଗୁଡ଼ିକ ଉପରେ କ୍ଷେପଣାସ୍ତ୍ର ମାଡ଼ କରିବାର କୌଣସି କାରଣ ନଥିଲା । ଲାଗୁଛି ପୁଟିନ ଏହି ଯୁଦ୍ଧ ରୋକିବାକୁ ଚାହୁଁନାହାନ୍ତି । ସେ କେବଳ ମୋତେ ଟ୍ରାପ୍ କରୁଛନ୍ତି, ଅଲଗା ଉପାୟରେ ଡିଲ୍ କରିବାକୁ ପଡ଼ିବ । 'ବ୍ୟାଙ୍କିଙ୍ଗ' କିମ୍ବା 'ସେକେଣ୍ଡାରୀ କଟକଣା' ମାଧ୍ୟମରେ ଭିନ୍ନ ଭାବରେ ମୁକାବିଲା କରିବାକୁ ପଡିବ ? ବହୁତ ଲୋକ ମରୁଛନ୍ତି !!!"
ଇଟାଲୀରେ ୟୁକ୍ରେନ ରାଷ୍ଟ୍ରପତି ଜେଲେନସ୍କିଙ୍କୁ ଭେଟିବା ପରେ ଟ୍ରମ୍ପ ଏହି ପୋଷ୍ଟ କରିଛନ୍ତି । ଦୁଇ ନେତା ଇଟାଲୀର ରାଜଧାନୀ ରୋମରେ ପୋପ୍ ଫ୍ରାନ୍ସିସଙ୍କ ଅନ୍ତିମ ସଂସ୍କାର କାର୍ଯ୍ୟକ୍ରମରେ ସାମିଲ ହୋଇଥିଲେ । ଏହାପରେ ଦୁଇ ନେତାଙ୍କ ମଧ୍ୟରେ ଅନେକ ସମୟ ଯାଏ ଦ୍ୱିପାକ୍ଷିକ ବର୍ତ୍ତା ହୋଇଥିଲା ।
ଏହି ଆଲୋଚନା ପରେ ୟୁକ୍ରେନ ରାଷ୍ଟ୍ରପତି ଜେଲେନସ୍କି ସୋସିଆଲ୍ ମିଡିଆ ପ୍ଲାଟଫର୍ମ ଏକ୍ସରେ ପୋଷ୍ଟ କରିଛନ୍ତି । ଏଥିରେ ସେ ଲେଖିଛନ୍ତି, 'ଆମେ ଗୋଟେ-ଗୋଟେ କରି ଅନେକ ଚର୍ଚ୍ଚା କରିଲୁ । ଆମେ ଯେଉଁ ସବୁ ଆଲୋଚନା କରିଛୁ, ସେଥିରୁ ସାର୍ଥକ ପରିଣାମର ଆଶା ରହିଛି । ନିଜ ଲୋକଙ୍କ ଜୀବନ ରକ୍ଷା କରିବା । ପୂର୍ଣ୍ଣ ଓ ବିନା ସର୍ତ୍ତରେ ଯୁଦ୍ଧବିରତି । ବିଶ୍ୱସନୀୟ ଓ ସ୍ଥାୟୀ ଶାନ୍ତି ଯାହା ଆଉ ଏକ ଯୁଦ୍ଧ ଆରମ୍ଭକୁ ଅଟକାଇବ । ଯଦି ଆମେ ସଂଯୁକ୍ତ ପରିଣାମ ହାସଲ କରୁ, ତେବେ ଏହି ବୈଠକ ଐତିହାସିକ ହେବ ।'
Good meeting. We discussed a lot one on one. Hoping for results on everything we covered. Protecting lives of our people. Full and unconditional ceasefire. Reliable and lasting peace that will prevent another war from breaking out. Very symbolic meeting that has potential to… pic.twitter.com/q4ZhVXCjw0
— Volodymyr Zelenskyy / Володимир Зеленський (@ZelenskyyUa) April 26, 2025
