କଟକ ୨୧।୦୮ : ସ୍ୱତନ୍ତ୍ର ଓଟିଇଟି ପ୍ରଶ୍ନପତ୍ର କେଳେଙ୍କାରୀ ମାମଲା । ଗିରଫ ଅଭିଯୁକ୍ତ ରାମ୍ଜୀ ପ୍ରସାଦ ଗୁପ୍ତା ଓ ସନାତନ ବିଶୋଇଙ୍କୁ ରିମାଣ୍ଡରେ ଆଣି ଜେରା କରିବ କ୍ରାଇମବ୍ରାଞ୍ଚ । ପ୍ରଶ୍ନପତ୍ର ପ୍ରଘଟରେ ଏମାନଙ୍କର କେଉଁ ଭୂମିକା ଥିଲା ? କିଭଳି ଏହି କାରବାର ସଂପୃକ୍ତ ହେଲେ ? ଏଥିପାଇଁ ତାଙ୍କୁ କେତେ ଟଙ୍କା ମିଳିଛି ଏବଂ ଆଉ କିଏ କିଏ ସଂପୃକ୍ତ ରହିଛନ୍ତି । ସେନେଇ ଜେରା କରିବ କ୍ରାଇମବ୍ରାଞ୍ଚ। ପ୍ରାୟ ୬ ଜଣଙ୍କୁ ଏହି ଜେରା ସମୟରେ ପଚରାଉଚରା କରାଯିବ। ସମ୍ପୃକ୍ତ ଦୁଇ ଅଭିଯୁକ୍ତଙ୍କୁ ରିମାଣ୍ଡ୍ରେ ଆଣି ଜେରା କରି ଛାଡ଼ିବା ପରେ ପୂର୍ବତନ ଉପସଭାପତି ନିହାର ରଞ୍ଜନ ମହାନ୍ତିଙ୍କୁ ରିମାଣ୍ଡ୍ରେ ଆଣିବା ପାଇଁ ଯୋଜନା ରହିଛି। ବୋର୍ଡ କାର୍ଯ୍ୟାଳୟର ଆହୁରି କେତେକ କର୍ମଚାରୀ ଓ ଏକ୍ସ କ୍ୟାଡର୍ ଶିକ୍ଷକ ସଂଘ ନେତା ଏବେ କ୍ରାଇମ୍ବ୍ରାଞ୍ଚ୍ ସ୍କାନରରେ ରହିଛନ୍ତି ।
ସେହିପରି ନିକଟରେ ଦୁଇଦିନିଆ ରିମାଣ୍ଡରେ ଆସିଥିବା ଡାଟା ଏଣ୍ଟ୍ରି ଅପରେଟର ଜିତନ ମହାରଣା ଓ ରାୟଗଡ଼ା ଜିଲ୍ଲାର ଏକ୍ସକ୍ୟାଡର୍ ଶିକ୍ଷକ ସଂଘ ସଭାପତି ବିଜୟ କୁମାର ମିଶ୍ରଙ୍କୁ ଜେରା ସମୟରେ କିଛି ଠୋସ୍ ତଥ୍ୟ ମିଳିଥିଲା । ଅଭିଯୁକ୍ତ ଦ୍ୱୟଙ୍କଠାରୁ ମିଳିଥିବା ତଥ୍ୟକୁ ଆଧାର କରି ଜେଲ୍ରେ ଥିବା କୋରାପୁଟ ଜିଲ୍ଲା କୁନ୍ଦ୍ରା ଥାନା ସାଗରଗୁଡ଼ା ଗ୍ରାମର ସନାତନ ବିଶୋଇ (୫୧) ଓ କଟକ ବାଦାମବାଡ଼ି ନାରାୟଣ ଲେନ୍ ଅଞ୍ଚଳର ଦଲାଲ୍ ରାମ୍ଜୀ ପ୍ରସାଦ ଗୁପ୍ତା (୫୧)ଙ୍କୁ କ୍ରାଇମ୍ବ୍ରାଞ୍ଚ ରିମାଣ୍ଡ୍ରେ ଆଣିବ । ଅଭିଯୁକ୍ତ ବିଶୋଇ ଓ ଗୁପ୍ତାକୁ ଦୁଇଦିନିଆ ରିମାଣ୍ଡ୍ରେ ଆଣିବା ପାଇଁ କ୍ରାଇମ୍ବ୍ରାଞ୍ଚ୍ କଟକ ଜେଏମ୍ଫ୍ସି-୩ କୋର୍ଟରେ ଆବେଦନ କରିଥିଲା । କୋର୍ଟ ଏହାର ଶୁଣାଣି କରି ଅଭିଯୁକ୍ତ ଦ୍ୱୟଙ୍କୁ ଗୋଟିଏ ଦିନ ରିମାଣ୍ଡରେ ନେବାପାଇଁ ଅନୁମତି ପ୍ରଦାନ କରିଥିଲେ ।ଆଜି ଉଭୟ ଅଭିଯୁକ୍ତଙ୍କୁ ରିମାଣ୍ଡ ଆଣି ଜେରା କରିବ କ୍ରାଇମ୍ବ୍ରଞ୍ଚ ।
ଜିତନ ଓ ବିଜୟଙ୍କୁ ରିମାଣ୍ଡରେ ଆଣିବା ମଧ୍ୟରେ କ୍ରାଇମ୍ବ୍ରାଞ୍ଚ୍କୁ ବୋର୍ଡ କାର୍ଯ୍ୟାଳୟରୁ ପ୍ରଶ୍ନ ଲିକ୍ ଘଟଣାରେ କମ୍ପ୍ୟୁଟର ଓ ପୁଳାଏ ପେନ୍ ଡ୍ରାଇଭ୍ ଜବତ ହୋଇଥିଲା । ଯାହାକି ଅଭିଯୁକ୍ତମାନଙ୍କ ବିରୋଧରେ ଅଦାଲତରେ ବଳିଷ୍ଠ ପ୍ରମାଣ ହେବ । ନିହାରଙ୍କ ଲାପ୍ଟପ୍ରୁ ଜିତନ୍ ପ୍ରଶ୍ନ ନେଇ ପ୍ରଥମେ ବିଜୟଙ୍କ ଭାଇ ପାଖରେ ନୟାଗଡ଼ରେ ପହଞ୍ଚାଇଥିଲା । ବିଜୟ ପ୍ରଶ୍ନ ନେଇ ସନାତନ ଓ ରାମଜୀ ସମେତ ଅନ୍ୟ କାହା ପାଖରେ ପହଞ୍ଚାଇଥିଲା ଏବଂ କେତେ ଟଙ୍କା କାରବାର ହୋଇଥିଲା ତାହାର ପ୍ରମାଣ ଏବେ କ୍ରାଇମ୍ବ୍ରାଞ୍ଚ ଖୋଜି ବାହାର କରିବ । ଅନ୍ୟପକ୍ଷରେ ରାମଜୀ ଗୁପ୍ତା ପେସାଦାର ଦଲାଲ୍ ଭାବେ ପ୍ରଶ୍ନ ବିକ୍ରି କରେ ବୋଲି କ୍ରାଇମ୍ବ୍ରାଞ୍ଚ୍ ଡିଜି ଆରମ୍ଭରୁ କହିଆସୁଛନ୍ତି । ରାମଜୀ କଟକରେ ରହୁଥିବାରୁ ବୋର୍ଡର ଅନ୍ୟ ଅଧିକାରୀ ଓ କର୍ମଚାରୀଙ୍କ ସହ ତାର ଲିଙ୍କ୍ ଥିବା କ୍ରାଇମ୍ବ୍ରାଞ୍ଚ ଜାଣିବାକୁ ପାଇଛି । ଏଯାଏ କ୍ରାଇମ୍ବ୍ରାଞ୍ଚ୍ ୮ ଜଣଙ୍କୁ ଗିରଫ କରିଥିଲେ ହେଁ ଆହୁରି କିଛି ଶିକ୍ଷକ ଗିରଫ ହେବାର ସମ୍ଭାବନା ରହିଛି ବୋଲି ସୂଚନା ମିଳୁଛି।
