ନୟାଗଡ଼: କଲରା ପତରିଆ ବାଘ ଆକ୍ରମଣରେ ଦୁଇ ଗୁରୁତର । ନୟାଗଡ଼ ଗୁମି ସଂରକ୍ଷିତ ଜଙ୍ଗଲର କରଚୁଲି ଏବଂ ସୁଡ଼ଙ୍ଗି ଗାଁ ନିକଟରେ ଏକ କଲରାପତରିଆ ବାଘ ଦୁଇ ଜଣକୁ ଆକ୍ରମଣ କରିଥିବା ସୂଚନା ମିଳିଛି। ଦୁଇ ଗୁରୁତରଙ୍କୁ ନୟାଗଡ଼ ମେଡିକାଲରେ ଭର୍ତ୍ତି କରାଯାଇଛି।
କଲରା ପତରିଆ ବାଘ ଆକ୍ରମଣରେ ଆହତ ବ୍ୟକ୍ତି ପ୍ରମୋଦ କହିଛନ୍ତି, ସନ୍ଧ୍ୟାରେ ଗାଈ ଚରାଇ ଘରକୁ ଫେରୁଥିବାବେଳେ ଘରଠାରୁ କିଛି ଦୂରରୁ ଏକ କଲରା ପତରିଆ ବାଘ ତାଙ୍କୁ ଆକ୍ରମଣ କରିଥିଲା। ବାଘଟି ପ୍ରଥମେ ତାଙ୍କ ଡାହାଣ କାନ୍ଧକୁ କାମୁଡ଼ି ଧରିଥିଲା। ଏଥିରେ ତାଙ୍କ କାନ୍ଧରେ ଗଭୀର କ୍ଷତ ହୋଇଥିଲା।
ତେବେ ପ୍ରମୋଦ ପାଟି କରିବାରୁ ଗାଁ ଲୋକେ ସେଠାକୁ ଧାଇଁ ଯାଇଥିଲେ। କୌଣସି ମତେ ଚେଷ୍ଟା କରି ପ୍ରମୋଦ ମଧ୍ୟ ବାଘ କବଳରୁ ବର୍ତ୍ତିଯାଇଥିଲେ। ଆଉ ତାଙ୍କୁ ଗୁରୁତର ଅବସ୍ଥାରେ ନୟାଗଡ଼ ମେଡିକାଲରେ ଭର୍ତ୍ତି ଥିଲେ ଗାଁ ଲୋକେ। ସେହିଭଳି ଏହି ବାଘ ଆକ୍ରମଣରେ ଅନ୍ୟ ଜଣେ ବ୍ୟକ୍ତି ମଧ୍ୟ ଆହତ ହୋଇ ମେଡିକାଲରେ ଭର୍ତ୍ତି କରାଯାଇଛି।
ସେପଟେ ନୟାଗଡ଼ ଡିଏଫଓ କ୍ଷମା ଷଡ଼ଙ୍ଗୀଙ୍କ ସୂଚନା ଅନୁଯାୟୀ, ମହୀପୂର ରେଞ୍ଚ ଅନ୍ତର୍ଗତ ଗୁମି ସେକ୍ସନର ପଲଭା ରିଜର୍ଭ ନିକଟସ୍ଥ ଗାଁରେ ଦୁଇ ଜଣକୁ ଏକ କଲରା ପତରିଆ ବାଘ ଆକ୍ରମଣ କରିଛି । ଅଧିକାରୀମାନେ ଘଟଣାସ୍ଥଳରେ ପହଞ୍ଚି ସ୍ଥିତି ଅନୁଧ୍ୟାନ କରୁଛନ୍ତି। ବାଘର ପାଦଚିହ୍ନ ମଧ୍ୟ ମିଳିଛି। ତେଣୁ ଲୋକଙ୍କୁ ସତର୍କ କରାଇବା ସହ ରାତିରେ ଜଙ୍ଗଲ ଆଡ଼କୁ ନଯିବାକୁ କୁହାଯାଉଛି। ଗୁରୁତର ୨ ଜଣକୁ ନୟାଗଡ଼ ମେଡିକାଲରେ ଭର୍ତ୍ତି କରାଯାଇଛି।
