ନୂଆଦିଲ୍ଲୀ: ସଂସଦରେ ଉଠିଲା ଓ୍ବାକଫ ବୋର୍ଡରେ ବେଆଇନ ଭାବେ ପଞ୍ଜୀକୃତ ହୋଇଥିବା ସମ୍ପତ୍ତି ପ୍ରସଂଗ । ସମୋବାର କେନ୍ଦ୍ର ସରକାର ତଥ୍ୟ ରଖିଛନ୍ତି ଯେ, ଦେଶର ବିଭିନ୍ନ ସ୍ଥାନରେ ମୋଟ୍ ୯୯୪ ସମ୍ପତ୍ତି ଓ୍ବାକଫ୍ ବୋର୍ଡ ଦ୍ବାରା ବେଆଇନ ଭାବେ କବଜା ହୋଇଛି । ଯେଉଁଥିରେ ତାମିଲନାଡ଼ୁରେ ସବୁଠାରୁ ଅଧିକ ୭୩୪ ସମ୍ପତ୍ତି ରହିଛି । ଭାରତୀୟ କମୁନିଷ୍ଟ ପାର୍ଟି ନେତା ଜନ ବ୍ରିଟାସ୍ ପ୍ରଶ୍ନର ଲିଖିତ ଜବାବ ଲୋକସଭାରେ ରଖିଛନ୍ତି କେନ୍ଦ୍ର ସରକାର । ଦେଶରେ ଓ୍ବାକଫ ବୋର୍ଡ ନାଁରେ ୧୬,୭୧୩ ସ୍ଥାବର ଏବଂ ୮,୭୨, ୩୫୨ ଅସ୍ଥାବର ସମ୍ପତ୍ତି ପଞ୍ଜୀକୃତ ହୋଇଛି ।
ସଂଖ୍ୟାଲଘୁ ମାମଲାରେ କେନ୍ଦ୍ର ମନ୍ତ୍ରୀ କିରଣ ରିଜୁଜ୍ ଜନ ବ୍ରିଟାସ୍ ପ୍ରଶ୍ନର ଜବାବରେ କହିଛନ୍ତି, ମିଳିଥିବା ତଥ୍ୟ ଅନୁଯାୟୀ, ଓ୍ବାକଫ୍ ବୋର୍ଡ ଦେଶରେ ମୋଟ୍ ୯୯୪ ସମ୍ପତ୍ତିରୁ ବେଆଇନ ଭାବେ କବଜା କରିଛି । ଏଥି ମଧ୍ୟରୁ ତାମିଲନାଡ଼ୁ ରେ ଥିବା ୭୩୪ ସମ୍ପତ୍ତି ଚିହ୍ନଟ କରିବାକୁ ନିର୍ଦ୍ଦେଶ ଦିଆଯାଇଛି । ସେହିପରି ଆନ୍ଧ୍ରପ୍ରଦେଶରେ ୧୫୨ ସମ୍ପତ୍ତି ରହିଥିବା ବେଳେ ପଞ୍ଜାବରେ ୬୩, ଉତ୍ତରାଖଣ୍ଡରେ ୧୧ ଏବଂ ଜାମ୍ମୁ-କଶ୍ମୀରରେ ୧୦ ସମ୍ପତ୍ତି ଚିହ୍ନଟ କରାଯାଇଛି ।
କେନ୍ଦ୍ରୀୟ ଆବାସ ଏହଂ ସହରୀ ମାମଲାରେ ମନ୍ତ୍ରାଳୟ ରାଜ୍ୟସଭାରେ ତଥ୍ୟ ରଖି କହିଛି, କେନ୍ଦ୍ର ସରକାରଙ୍କ ଦ୍ବାରା ୨୦୧୯ ପରେ ଓ୍ବାକଫ ବୋର୍ଡକୁ କୌଣସି ଜମି ଦିଆଯାଇନାହିଁ । ହେଲେ ରାଜ୍ୟ ସରକାରଙ୍କ ଦିଆଯାଇଥିବା ଜମିଜମାର କୌଣସି ତଥ୍ୟ ନାହିଁ ବୋଲି ଗୃହରେ ତଥ୍ୟ ରଖିଛନ୍ତି । ଗତ ସପ୍ତାହରେ ଜେପିସି ଅଧ୍ୟକ୍ଷ ଜଗଦମ୍ବିକା ପାଲ୍ କହିଛନ୍ତି, ତାଙ୍କ ପ୍ୟାନେଲ ସମସ୍ତ ରାଜ୍ୟ ସରକାରଙ୍କୁ ଚିଠି ଲେଖିଛି ଏବଂ ସେଥିରେ ସେମାନଙ୍କ ଅଧିକାରରେ ଆସୁଥିବା ଓ୍ବାକଫ୍ ସମ୍ପତ୍ତିର ବିବରଣୀ ଦେବାକୁ କହିଛି ।
