ମୁମ୍ଵାଇ ୦୭।୦୯: ଫିଲ୍ମ ‘ବିନି ଆଣ୍ଡ୍ ଫ୍ୟାମିଲି’ ଜରିଆରେ ବଲିଉଡ୍ରେ ପାଦ ଥାପିବେ ଅଞ୍ଜିନି ଧୱନ । ଅଭିନେତା ବରୁଣ ଧୱନଙ୍କ ଝିଆରି ହୋଇଥିବାରୁ ସିନେ ଦୁନିଆକୁ ଆସିବା ପୂର୍ବରୁ ଷ୍ଟାର୍ କିଡ୍ ବିବାଦରେ ଛନ୍ଦି ହୋଇଛନ୍ତି ଅଞ୍ଜିନି । ବଲିଉଡ୍ରେ ଷ୍ଟାର୍ କିଡ୍ଙ୍କୁ ସୁଯୋଗ ମିଳିବା ନେଇ ହେଉଥିବା ଚର୍ଚ୍ଚା ଭିତରେ ତାଙ୍କୁ ସାମିଲ କରାଯାଇଛି । ଫିଲ୍ମ ଦୁନିଆ ସହିତ ତାଙ୍କ ପରିବାର ଜଡ଼ିତ ଥିବାରୁ ଅଞ୍ଜିନି ସେ ସୁବିଧା ହାସଲ କରିଛନ୍ତି ବୋଲି ଚର୍ଚ୍ଚା ହେଉଛି । କିନ୍ତୁ ଅଞ୍ଜିନି ଏହାକୁ ଖଣ୍ଡନ କରିଛନ୍ତି । ତାଙ୍କର ସିନେ ଯାତ୍ରା କଠିନ ପରିଶ୍ରମ, ଏକାଧିକ ଅଡିସନ୍ ଓ ପ୍ରତ୍ୟାଖ୍ୟାନ ଦେଇ ଗତିକରିଛି ବୋଲି ସେ କହିଛନ୍ତି ।
ଏକ ଗଣମାଧ୍ୟମ ସହ ସାକ୍ଷାତକାରରେ ଅଞ୍ଜିନି କହିଛନ୍ତି, ଫିଲ୍ମ ଦୁନିଆ ସହ ପାରିବାରର ସମ୍ପର୍କ ଯୋଗୁ ମୋତେ ‘ବିନି ଆଣ୍ଡ୍ ଫ୍ୟାମିଲି’ ମିଳିନାହିଁ । ବରଂ ଅନେକ ଅଡିସନ୍ ପରେ ମୁଁ ଏହି ଭୂମିକା ପାଇଛି । କୌଣସି ଅଡିସନ୍ ବିନା ମୋତେ କଦାପି କାହାଣୀ ମିଳିନାହିଁ । ସେତିକି ନୁହେଁ, ଅନେକ ପ୍ରତ୍ୟାଖ୍ୟାନର ସମ୍ମୁଖୀନ ମଧ୍ୟ ହେବାକୁ ପଡ଼ିଛି । ଷ୍ଟାର୍ କିଡ୍ଙ୍କ ତୁଳନାରେ ବାହାରୁ ଆସି ବଲିଉଡ୍ରେ କ୍ୟାରିଅର ଗଢ଼ିବାକୁ ଚାହୁଁଥିବା କଳାକାରମାନେ ଇଣ୍ଡଷ୍ଟ୍ରିରେ ଅନେକ ଆହ୍ୱାନର ସମ୍ମୁଖୀନ ହେଉଛନ୍ତି ବୋଲି ଅଞ୍ଜିନି ସ୍ୱୀକାର କରିଛନ୍ତି । ଦର୍ଶକ ଷ୍ଟାର୍ କିଡ୍ଙ୍କୁ ପ୍ରତ୍ୟାଖ୍ୟାନ କଲେ ମଧ୍ୟ କେତେକାଂଶରେ ସେମାନେ ଶୀଘ୍ର ସୁଯୋଗ ପାଇଯାଆନ୍ତି ।
କିନ୍ତୁ ବରୁଣଙ୍କ ଝିଆରି ହୋଇଥିବାରୁ ତାଙ୍କୁ କେହି ଫିଲ୍ମ ଅଫର୍ ଦେଇନାହାନ୍ତି ବୋଲି ଅଞ୍ଜିନି ସ୍ପଷ୍ଟ କରିଛନ୍ତି । ‘ବିନି ଆଣ୍ଡ୍ ଫ୍ୟାମିଲି’ ନିର୍ଦ୍ଦେଶକ ତାଙ୍କର ଏକ ପୁରୁଣା ଅଡିସନ୍ ଦେଖି ତାଙ୍କୁ ଫିଲ୍ମରେ ସୁଯୋଗ ଦେଇଛନ୍ତି । ଆସନ୍ତା ୨୦ ତାରିଖରେ ଥିଏଟରକୁ ଆସିବ ଫ୍ୟାମିଲି ଡ୍ରାମା ‘ବିନି ଆଣ୍ଡ୍ ଫ୍ୟାମିଲି’ ।
