ନୂଆଦିଲ୍ଲୀ: ଆମ୍ ଆଦମୀ ପାର୍ଟି ମୁଖିଆ ଏବଂ ଦିଲ୍ଲୀର ପୂର୍ବତନ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କୁ କଡ଼ା ସମାଲୋଚନା କରିଛନ୍ତି କଂଗ୍ରେସ ସାଂସଦ ରାହୁଲ ଗାନ୍ଧୀ । ସୋସିଆଲ୍ ମିଡିଆ ପ୍ଲାଟଫର୍ମ ଏକ୍ସରେ ଏକ ପୋଷ୍ଟ କରି ଦିଲ୍ଲୀର ସଫେଇ ବ୍ୟବସ୍ଥାକୁ ନେଇ ଆପ୍ ସରକାର ଉପରେ ବର୍ଷିଛନ୍ତି । ଭିଡିଓରେ ରାହୁଲ ଗାନ୍ଧୀ ଏକ ନାଳକୁ ଦେଖାଇ, 'ଦେଖ ଦେଖ ଇଏ ହେଉଛି ଦିଲ୍ଲୀ । ଅରବିନ୍ଦ କେଜ୍ରିୱାଲଙ୍କ ଚମକୁଥିବା ଦିଲ୍ଲୀ ।' ରାହୁଲ ଗାନ୍ଧୀ ଏହା ପୂର୍ବରୁ ସୋମବାର ସୀଲମପୁର ବିଧାନସଭା କ୍ଷେତ୍ରରେ ଏକ ନିର୍ବାଚନୀ ରାଲିରେ ବି ଅରବିନ୍ଦ କେଜ୍ରିୱାଲଙ୍କୁ ଜୋରଦାର ଟାର୍ଗେଟ୍ କରିଥିଲେ ।
ରାହୁଲ ଗାନ୍ଧୀ ମଙ୍ଗଳବାର ଏକ୍ସରେ ଏକ ଭିଡିଓ ସେୟାର କରି ଲେଖିଛନ୍ତି, ‘ଏ ହେଉଛି କେଜ୍ରିୱାଲଙ୍କ ଚମକୁଥିବା ଦିଲ୍ଲୀ-ପ୍ୟାରିସ ପରିକା ଦିଲ୍ଲୀ !’ ଲୋକସଭାରେ ବିରୋଧୀ ଦଳ ନେତା ରାହୁଲ ଗାନ୍ଧୀ ଯେଉଁ ଭିଡିଓ ସେୟାର କହିଛନ୍ତି, ସେଥିରେ ସେ କହୁଛନ୍ତି, 'ଦେଖ ଦିଲ୍ଲୀ ଦେଖ...ଚମକୁଥିବା ଦିଲ୍ଲୀ । ପ୍ୟାରିସ୍ ପରି ଦିଲ୍ଲୀ । ସବୁ ସ୍ଥାନରେ ସମାନ ସ୍ଥିତି ।'
ये है केजरीवाल जी की ‘चमकती’ दिल्ली - पेरिस वाली दिल्ली!#SaafKaroDilli pic.twitter.com/ycSxZa4hUt
— Rahul Gandhi (@RahulGandhi) January 14, 2025
ଅରବିନ୍ଦ କେଜ୍ରିୱାଲଙ୍କ ଉପରେ ରାହୁଲ ଗାନ୍ଧୀଙ୍କ ସିଧା ହମଲା ପଛରେ ଅନେକ କାରଣ ରହିଥିବା କୁହାଯାଉଛି । ଗୋଟିଏ ସମୟରେ ଦିଲ୍ଲୀରେ କଂଗ୍ରେସ ପାର୍ଟି ମଜଭୁତ ସ୍ଥିତିରେ ଥିଲା । ତେବେ କେଜ୍ରିୱାଲଙ୍କ ଆମ୍ ଆଦମୀ ପାର୍ଟି ଆସିବା ପରେ କଂଗ୍ରେସ୍ ବ୍ୟାକଫୁଟକୁ ଚାଲି ଯାଇଛି । ଦିଲ୍ଲୀରେ ଆମ୍ ଆଦମୀ ପାର୍ଟିର ଗ୍ରାଫ୍ ବଢିବା ସହ କଂଗ୍ରେସର ଗ୍ରାଫ୍ ତଳମୁହାଁ ହୋଇଥିଲା । ଏବେ ସ୍ଥିତି ଏପରି ହୋଇଛି ଯେ ଦିଲ୍ଲୀରେ କଂଗ୍ରେସର ଜଣେ ବି ବିଧାୟକ କି ସାଂସଦ ନାହାନ୍ତି । ଏଭଳି ସ୍ଥିତିରେ ଦେଶର ସର୍ବପୁରାତନ ଦଳ ରାଷ୍ଟ୍ରୀୟ ରାଜଧାନୀରେ ନିଜର ଅସ୍ତିତ୍ୱ ବଞ୍ଚାଇବା ଲଢେଇ କରୁଛି । ଏହି କାରଣରୁ ଆଗାମୀ ବିଧାନସଭା ନିର୍ବାଚନ ପାଇଁ କଂଗ୍ରେସ ଖୋଲାଖୋଲି ଭାବେ ଆମ୍ ଆଦମୀ ପାର୍ଟିକୁ ଘେରୁଛି ।
