ନୂଆଦିଲ୍ଲୀ ୧୪।୧: ବିଶ୍ୱ ଆର୍ଥିକ ମଞ୍ଚ (ଡବ୍ଲୁଇଏଫ)ର ଆଗାମୀ ବୈଠକ ସ୍ୱିଜର ଲ୍ୟାଣ୍ଡ ଦାଭୋସରେ ଅନୁଷ୍ଠିତ ହେବ। ଆସନ୍ତା ସପ୍ତାହରେ ଅନୁଷ୍ଠିତ ହେଉଥିବା ଏହି କାର୍ଯ୍ୟକ୍ରମକୁ ଆମେରିକାର ନବ ନିର୍ବାଚିତ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ, ଜର୍ମାନ ଚାନ୍ସେଲର ଓଲାଫ ସ୍କୋଲଜ୍ ଓ ୟୁକ୍ରେନ ରାଷ୍ଟ୍ରପତି ଭୋଲଦେମୀର ଜେଲଂସ୍କିଙ୍କ ସମେତ ବିଶ୍ୱର ବିଭିନ୍ନ ଦେଶରୁ ୬୦ ନେତା ସମ୍ବୋଧିତ କରିବେ। ଜେନେଭାସ୍ଥିତ ବିଶ୍ୱ ଆର୍ଥିକ ମଞ୍ଚ ଏ ନେଇ ମଙ୍ଗଳବାର ବିସ୍ତୃତ କାର୍ଯ୍ୟସୂଚୀ ଘୋଷଣା କରିଛି।
ଡବ୍ଲୁଇଏଫ ଏଥିରେ କହିଛି ଯେ ବୈଠକରେ ବିଭିନ୍ନ ଦେଶର ସରକାରଙ୍କ ୩୫୦ନେତାଙ୍କ ସମେତ ୧୩୦ରୁ ଅଧିକ ଦେଶଙ୍କ ପାଖାପାଖି ୩,୦୦୦ ଲୋକ ଭାଗ ନେବେ। ଏଥିରେ ଭାରତରୁ ୫ କେନ୍ଦ୍ରମନ୍ତ୍ରୀ ଅଶ୍ୱିନ ବୈଷ୍ଣବ, ସି.ଆର.ପାଟିଲ, କେ.ରାମମୋହନ ନାୟଡୁ, ଚିରାଗ ପାଶ୍ୱାନ ଓ ଜୟନ୍ତ ଚୌଧୁରୀ ଯୋଗ ଦେବାକୁ ଥିବା ବେଳେ ୩ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନବୀଶ, ଏନ.ଚନ୍ଦ୍ରବାବୁ ନାୟଡୁ ଓ ରେବନ୍ତ ରେଡ୍ଡୀ ଆଦି ସାମିଲ ହେବେ। ଏହି ବୈଠକରେ ବିଶ୍ୱର ବିଭିନ୍ନ ଦେଶରୁ ୧୦୦ରୁ ଅଧିକ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ (ସିଇଓ) ମଧ୍ୟ ଯୋଗଦେବେ।
ଡବ୍ଲୁଇଏଫ କହିଛନ୍ତି ଯେ ଜାନୁୟାରୀ ୨୦ ତାରିଖରୁ ଆରମ୍ଭ ହେଉଥିବା ୫ ଦିବସୀୟ ବୈଠକରେ ବୃଦ୍ଧିକୁ ପୁଣି ରାସ୍ତାକୁ ଆଣିବା, ନୂଆ ପ୍ରଯୁକ୍ତିର ଉପଯୋଗ ସହିତ ସାମାଜିକ ଓ ଆର୍ଥିକ ବ୍ୟବସ୍ଥାକୁ ମଜଭୁତ କରିବାର ଉପାୟ ଉପରେ ମନ୍ଥନ କରାଯିବ। ଡବ୍ଲୁଇଏଫର ସଂସ୍ଥାପକ ତଥା ଅଧ୍ୟକ୍ଷ କ୍ଲାଉସ୍ ସ୍ୱାବ କହିଛନ୍ତି ଯେ ଦାଭୋସ ବୈଠକ ନିଜକୁ ନିଜେ ଏକ ଅନନ୍ୟ କାର୍ଯ୍ୟକ୍ରମ। ଏଥିରେ ସରକାର, ଉଦ୍ୟୋଗ ଓ ନାଗରିକ ନୀତି ନିର୍ମାଣ ସମ୍ପର୍କିତ ୩ହଜାର ଲୋକ ଏକତ୍ରୀତ ହେବେ।
