ରାୟପୁର: ଛତିଶଗଡ଼ ନକ୍ସଲ ବିରୋଧୀ ଏନକାଉଣ୍ଟରରେ ମୃତ୍ୟୁ ସଂଖ୍ୟା ୧୭କୁ ବୃଦ୍ଧି । ମାଓବାଦୀଙ୍କ ମଧ୍ୟରେ ୧୧ଜଣ ମହିଳା ଓ ୬ଜଣ ପୁରୁଷ ଥିବା ଜଣାପଡ଼ିଛି । ୨୫ ଲକ୍ଷ ପୁରସ୍କାର ଘୋଷଣା ହୋଇଥିବା ନକ୍ସଲ ବୁଧରାର ମଧ୍ୟ ମୃତ୍ୟୁ ହୋଇଥିବା ଜଣାପଡ଼ିଛି । ଘଟଣାସ୍ଥଳରୁ ବିପୁଳ ପରିମାଣ ମାଓ ସମାଗ୍ରୀ ଜବତ କରିଛି ସୁରକ୍ଷାବାହିନୀ । 

ଶନିବାର ମାଲକାନଗିରି ସୀମାନ୍ତ ଛତିଶଗଡ଼ ବିଜାପୁର-ସୁକମାରେ ସୁରକ୍ଷା ବାହିନୀକୁ ବଡ଼ ସଫଳତା ମିଳିଛି । କେରଲାପାଲ ଥାନା ଅନ୍ତର୍ଗତ ଜଙ୍ଗଲରେ ଆଜି ସୁରକ୍ଷାବାହିନୀ ଓ ନକ୍ସଲଙ୍କ ମୁହାଁମୁହିଁ ହୋଇଥିଲେ । ସକାଳ ୮ଟାରେ ପୃଥକ ପୃଥକ ସ୍ଥାନରେ ଏନକାଉଣ୍ଟର ଆରମ୍ଭ ହୋଇଥିଲା । ଏଥିରେ ୧୭ ମାଓବାଦୀଙ୍କ ମୃତ୍ୟୁ ହୋଇଛି । ନକ୍ସଲ ସ୍ବତନ୍ତ୍ର ଜୋନାଲ କମିଟି ସଦସ୍ୟ ଏବଂ ଦରଭା ଡିଭିଜନର ସଚିବ କୁଡାମୀ ଜଗଦିଶ ଓର୍ଫ ବୁଧରା ପୋଲିସ ଗୁଳିରେ ନିହତ ହୋଇଛନ୍ତି । ଏହି ଦୁଇ ମାଓବାଦୀଙ୍କ ମୁଣ୍ଡରେ ୨୫ ଲକ୍ଷ ପୁରସ୍କାର ରାଶି ରହିଥିଲା । ହାର୍ଡକୋର ମାଓବାଦୀ ଜଗଦିଶ ୨୦୧୩ ଝିରମ ଘାଟି ହମଲା ସହିତ ଅନେକ ମାଓ ଆକ୍ରମଣର ମାଷ୍ଟର ମାଇଣ୍ଡ୍ ଥିଲା । ଏହାଛଡ଼ା ସୁରକ୍ଷାବାହିନୀ ଗୁଳିରେ ଟଳିଥିବା ମାଓବାଦୀ ଚାରୋଟି ଏରିଆର ସଦସ୍ୟ ଥିଲେ ।

ଶନିବାର ଡିଆର୍‌ଜି ଓ ସିଆର୍‌ପିଏଫ୍‌ ବାହିନୀଙ୍କ ପକ୍ଷରୁ କୁମ୍ବିଂ ଅପରେସନ୍‌ କରିଥିଲା । ସୁରକ୍ଷା ବାହିନୀ ଓ ମାଓବାଦୀ ଗୁଳି ବିନିମୟରେ ଡିଆରଜିର ୩ଜଣ ଗାର୍ଡ ଏବଂ ଜଣେ ସିଆରପିଏଫ ଯବାନ ଆହତ ହୋଇଛନ୍ତି । ସେମାନଙ୍କୁ ହସ୍ପିଟାଲରେ ଭର୍ତ୍ତି କରି ଚିକିତ୍ସା କରାଯାଉଛି । ଅନ୍ୟପଟେ ସର୍ଚ୍ଚ ଅପରେସନ ବେଳେ ପୋଲିସ ବିପୁଳ ପରିମାଣର ମାଓ ସାମଗ୍ରୀ ଜବତ କରିଛି । ଏଥିରେ ଗୋଟିଏ ଏକ-୪୭ ରାଇଫଲ୍, ଏସଏଲଆର, ଇନସାସ୍ ରାଇଫଲ୍, 303 ରାଇଫଲ, ରକେଟ ଲଞ୍ଚର, ବ୍ୟାରେଲ ଗ୍ରେନେଡ ଲଞ୍ଚର ଏବଂ ବିସ୍ଫୋରଣ ସାମଗ୍ରୀ ରହିଛି ।...