ମୁମ୍ଵାଇ ୨୧।୦୮; ରଣବୀର କପୁରଙ୍କ ବହୁ ପ୍ରତୀକ୍ଷିତ ଫିଲ୍ମ 'ରାମାୟଣ'। ଏହି ଫିଲ୍ମକୁ ନେଇ ସିନେପ୍ରେମୀଙ୍କ ମଧ୍ୟରେ ଉତ୍କଣ୍ଠା ବଢ଼ିବାରେ ଲାଗିଛି । ନିର୍ଦ୍ଦେଶକ ନିତେଶ ତିୱାରୀଙ୍କ ଏହି ଫିଲ୍ମର ପ୍ରଥମ ଭାଗର ସୁଟିଂ ଶେଷ ହୋଇଛି । ସୂଚନା ଅନୁଯାୟୀ , ଫିଲ୍ମରେ ସୁଗ୍ରୀବଙ୍କ ଚରିତ୍ର ପାଇଁ ଜଣେ ଦକ୍ଷ ଅଭିନେତାଙ୍କୁ ଚୟନ କରାଯାଇଥିବା ବେଳେ, ବଲିଉଡର ମହାନାୟକ ଅମିତାଭ ବଚ୍ଚନ ଜଟାୟୁ ଚରିତ୍ରରେ ନିଜର ସ୍ୱର ଦେବେ ।
ନିଜର ଦମଦାର ଅଭିନୟ ପାଇଁ ପରିଚିତ ଅମିତ ସିଆଲଙ୍କୁ 'ରାମାୟଣ'ରେ ସୁଗ୍ରୀବ ଭୂମିକାରେ ଦେଖିବାକୁ ମିଳିବ । ଓଟିଟି ପ୍ଲାଟଫର୍ମରେ ନିଜର ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିଥିବା ଅମିତଙ୍କ ପାଇଁ ଏହା ଏକ ବଡ଼ ପ୍ରୋଜେକ୍ଟ ହେବାକୁ ଯାଉଛି । ତାଙ୍କର ଅଭିନୟ ଦକ୍ଷତା ଫିଲ୍ମକୁ ଏକ ନୂଆ ମାତ୍ରା ଦେବ ବୋଲି ଆଶା କରାଯାଉଛି ।
ଅନ୍ୟପଟେ, ଅମିତାଭ ବଚ୍ଚନଙ୍କୁ ଏହି ଫିଲ୍ମରେ ଏକ ଗୁରୁତ୍ୱପୂର୍ଣ୍ଣ ଭୂମିକା ପାଇଁ ଚୟନ କରାଯାଇଛି । ସେ କେବଳ ଜଟାୟୁ ଚରିତ୍ର ପାଇଁ ନିଜର ସ୍ୱର ଦେବେ ତାହା ନୁହେଁ, ବରଂ ଫିଲ୍ମର ସୂତ୍ରଧର ବା ନାରେଟର୍ ମଧ୍ୟ ହୋଇପାରନ୍ତି । ତାଙ୍କର ଜବରଦସ୍ତ ସ୍ୱର ଫିଲ୍ମର ଆରମ୍ଭକୁ ଆହୁରି ପ୍ରଭାବଶାଳୀ କରିବ ବୋଲି ନିର୍ମାତାମାନେ ଆଶା ରଖିଛନ୍ତି ।ଏହି ଫିଲ୍ମର ବଜେଟ୍ ପ୍ରାୟ ୪୦୦୦ କୋଟି ଟଙ୍କା ରହିଛି । ଏହି ଫିଲ୍ମଟି ଦୁଇଟି ଭାଗରେ ମୁକ୍ତିଲାଭ କରିବ । ପ୍ରଥମ ଭାଗ ୨୦୨୬ ଦୀପାବଳିରେ ଏବଂ ଦ୍ୱିତୀୟ ଭାଗ ୨୦୨୭ ଦୀପାବଳିରେ ରିଲିଜ୍ ହେବାର ଯୋଜନା ରହିଛି ।
