ଫଟୋ ଉଠାଉଥିବା ବେଳେ ମଞ୍ଚରୁ ପଡିଗଲେ ଅଷ୍ଟ୍ରେଲିଆ ପ୍ରଧାନମନ୍ତ୍ରୀ, Watch Video

Published By : Prameya-News7 Bureau | April 03, 2025 IST

ନ୍ୟୁ ସାଉଥ ୱେଲସ୍ ୩।୪: ଅଷ୍ଟ୍ରେଲିୟା ପ୍ରଧାନମନ୍ତ୍ରୀ ଆନ୍ଥୋନୀ ଆଲବାନିଜ୍ ଗୁରୁବାର ନ୍ୟୁ ସାଉଥ ୱେଲସରେ ଏକ କାର୍ଯ୍ୟକ୍ରମ କାଳରେ ମଞ୍ଚରୁ ପଡିଯାଇଛନ୍ତି। ଏକ ଅଭିଯାନ କାର୍ଯ୍ୟକ୍ରମରେ ଘଟିଥିବା ଏହି ଘଟଣାର ଭିଡିଓ ଏବେ ଭାଇରାଲ ହେବାରେ ଲାଗିଛି। ଆଗାମୀ ମେ ମାସରେ ଅଷ୍ଟ୍ରେଲିଆ ସାଧାରଣ ନିର୍ବାଚନ। ଏଣୁ ଏବେ ନିର୍ବାଚନ ପ୍ରଚାର ଅଭିଯାନ ଆରମ୍ଭ ହୋଇଯାଇଥିବା ବେଳେ ଏକ କାର୍ଯ୍ୟାକ୍ରମକୁ ସମ୍ବୋଧିତ କରିବା ପରେ ପ୍ରଧାନମନ୍ତ୍ରୀ ଆଲବାନିଜ୍ ଫଟୋ ଉଠାଉଥିଲେ। 

ସୋସିଆଲ ମିଡିଆରେ ବ୍ୟାପକ ସେୟାର କରାଯାଉଥିବା ଭିଡିଓରେ ଆଲାବନିଜ୍ ଙ୍କୁ ମଞ୍ଚରେ ପଡିଯାଉଥିବାର ଦେଖାଯାଉଛି। ସେ ଅନ୍ୟପଟକୁ ଯିବା ପାଇଁ ପଛକୁ ଯିବାମାତ୍ରେ ପଡିଯାଇଛନ୍ତି। ଫଳରେ କାର୍ଯ୍ୟକ୍ରମରେ ଉପସ୍ଥିତ ଲୋକଙ୍କ ମଧ୍ୟରେ କିଛି ସମୟ ପାଇଁ ଚାଞ୍ଚଲ୍ୟ ଖେଳିଯାଇଥିଲା। ତେବେ ଆଲବାନିଜ୍ ନିଜକୁ ସମ୍ଭାଳିଥିଲେ ଓ ଦୁଇ ହାତ ହଲାଇ ଉପସ୍ଥିତ ଜନତାଙ୍କୁ ସେ ଠିକ୍ ଥିବା ସୂଚନା ଦେଇଥିଲେ। ରୟଟର୍ସ ଅନୁସାରେ ପରେ ଯେବେ ଅଷ୍ଟ୍ରେଲିୟା ବ୍ରଡକାଷ୍ଟିଂ କର୍ପୋରେସନ (ଏବିସି) ସହିତ ଏକ ରେଡିଓ ସାକ୍ଷାତକାରରେ ଏ ନେଇ ତାଙ୍କୁ ପ୍ରଶ୍ନ କରାଗଲା ସେ ଘଟଣାକୁ ଟାଳି ଯାଇଛନ୍ତି। 


ଆଲବାନିଜ କହିଛନ୍ତି ଯେ ମୁଁ ଗୋଟିଏ ପାଦ ପଛକୁ ଯାଇଥିଲି ହେଲେ ମୁଁ ମଞ୍ଚରୁ ତଳକୁ ଖସି ପଡିନଥିଲି, ମାତ୍ର ଗୋଟିଏ ପାଦ ତଳକୁ ପଡି ଯାଇଥିଲି। ହେଲେ ମୁଁ ଆଘାତ ପାଇ ନାହିଁ, ସେତେବେଳେ ବେଶ୍ ଖୁସି ଥିଲି। ଅଷ୍ଟ୍ରେଲିଆ ସାଧାରଣ ନିର୍ବାଚନ ମେ ୩ ତାରିଖରେ ହେବ। ଏଣୁ ସାରା ଦେଶରେ ଏବେ ନିର୍ବାଚନ ପ୍ରଚାର ଚାଲିଛି। ଏହିକ୍ରମରେ ପ୍ରଧାନମନ୍ତ୍ରୀ ଆଲବାନିଜ ଗୁରୁବାର ନ୍ୟୁ ସାଉଥ୍ ୱେଲସକୁ ପ୍ରଚାର କାର୍ଯ୍ୟକ୍ରମରେ ଯାଇଥିଲେ। 


ଏହି ନିର୍ବାଚନରେ ପିଟର ଡଟନଙ୍କ ନେତୃତ୍ୱାଧୀନ ଋଢିବାଦୀ ଲିବରାଲ ନ୍ୟାସନାଲ ବିପକ୍ଷ ସହିତ ଲେବରପାର୍ଟିକୁ ଜନମତ ସର୍ଭେକ୍ଷଣରେ ଟକ୍କର ଦେଉଛି। ଏଣୁ ଅଷ୍ଟ୍ରେଲିଆରେ ନିର୍ବାଚନକୁ ନେଇ ରାଜନୀତି ବେଶ୍ ଉଷ୍ମ ଥିବା ବେଳେ ଗୁରୁବାରର ଏହି ଘଟଣା ଏବେ ଚର୍ଚ୍ଚାର ବିଷୟ ପାଲଟିଛି।  

News7 Is Now On WhatsApp Join And Get Latest News Updates Delivered To You Via WhatsApp

Copyright © 2024 - Summa Real Media Private Limited. All Rights Reserved.