ନୂଆଦିଲ୍ଲୀ ୦୪/୦୪: ନୂଆଦିଲ୍ଲୀ,୩ା୪(ଏଜେନ୍ସି): ଭାରତ ସମେତ ୬୦ ରାଷ୍ଟ୍ରଙ୍କ ଉପରେ ଯେସାକୁ ତେସା ଶୁଳ୍କ ଘୋଷଣା କରିଛନ୍ତି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ । ଭାରତ ଉପରେ ୨୭% ଶୁଳ୍କ ଲଦିଛନ୍ତି ଟ୍ରମ୍ପ । ସେହିଭଳି ଚୀନ୍ ଉପରେ ୩୪%, ଭିଏତ୍ନାମ ଉପରେ ୪୬% ଏବଂ ବାଂଲାଦେଶ ଉପରେ ଲାଗିବ ୩୭% ଟିକସ । ଅନ୍ୟାନ୍ୟ ରାଷ୍ଟ୍ରଗୁଡ଼ିକ ଉପରେ ବି ତଗ୍ଡ଼ା ଶୁଳ୍କ ଘୋଷଣା କରିଛନ୍ତି ଟ୍ରମ୍ପ ।
୧୦%ର ମୂଳ ଶୁଳ୍କ ଏପ୍ରିଲ ୫ରୁ ଏବଂ ଯେସାକୁ ତେସା ଶୁଳ୍କ ଏପ୍ରିଲ ୯ରୁ ଲାଗୁ ହେବ । ତେବେ ଅର୍ଥନୀତିକ ବିଶାରଦମାନଙ୍କ ମତରେ ଟ୍ରମ୍ପଙ୍କ ଏହି ପଦକ୍ଷେପ ଆମେରିକା ପାଇଁ ଏକ ଆତ୍ମଘାତୀ ବୋମାରେ ପରିଣତ ହେବ । ଏହାର ପ୍ରଥମ ଚୋଟ ଆମେରିକା ଅର୍ଥନୀତିକୁ ବରବାଦ କରିବ । ଟ୍ରମ୍ପଙ୍କ ଏହି ଘୋଷଣାରେ ବିଶ୍ୱ ବଜାରରେ ସୃଷ୍ଟି ହୋଇଛି କମ୍ପନ । ନିବେଶକ ଥରହର । ଦିନକରେ ଆମେରିକା ବଜାର ଧୋଇଯାଇଛି ୨ ଟ୍ରିଲିୟନ ଡଲାର ବା ୧୭୦ ଲକ୍ଷ କୋଟି ଟଙ୍କା ।
ନାସ୍ଡାକ ୬% ଖସିବା ସହ ଆମେରିକା ଷ୍ଟକ ବଜାର କ୍ରାସ କରିଛି । ଡାଓଜୋନ୍ସ ୧୫୫୦ ପଏଣ୍ଟ ଖସିଛି । ମୋଟାମୋଟି ଭାବେ କହିବାକୁ ଗଲେ ଏହା ସର୍ବୋଚ୍ଚ ସ୍ତରରୁ ୧୦% ତଳକୁ ଧସିଆସିଛି । ଏସ୍ ଆଣ୍ଡ୍ ପି ୫୦୦ ପ୍ରାୟ ୪.୪% ଏବଂ ନାସ୍ଡାକ ୫.୫% ବା ୧୦୦୦ ପଏଣ୍ଟରୁ ଅଧିକ ଖସିଛି । ଆମେରିକା ସେୟାର ବଜାର ୨୦୨୨ର ମୁଦ୍ରାସ୍ଫୀତି ସଂକଟ ପରଠୁ ସବୁଠାରୁ ବଡ଼ ଧରଣ ପତନର ସାମ୍ନା କରିଛି । ଆପଲ୍ ଏବଂ ମାଇକ୍ରୋସଫ୍ଟ ଭଳି ବଡ଼ ବଡ଼ ଟେକ୍ନୋଲୋଜି କମ୍ପାନିଗୁଡ଼ିକର ଷ୍ଟକରେ ବିରାଟ ହ୍ରାସ ଘଟିଛି ।
ଜାପାନର ନିକ୍କେଇ ୯ ମାସର ସର୍ବନିମ୍ନ ସ୍ତରକୁ ଖସିଯାଇଛି । ଏଥିରେ ପ୍ରାୟ ୪.୬%ର ହ୍ରାସ ଦେଖିବାକୁ ମିଳିଛି । ହଂକଂର ହ୍ୟାଙ୍ଗ୍ସେଙ୍ଗ୍ ସୂଚକାଙ୍କ ୧.୫୨% ସଂକୁଚିତ ହୋଇଛି । ଦୁର୍ବଳ ହୋଇଛି ଡଲାର । ତେବେ ଟ୍ରମ୍ପଙ୍କ ଟାରିଫ ଯୋଗୁ ଭାରତୀୟ ବଜାର ଉପରେ ସେତେଟା ପ୍ରଭାବ ପଡ଼ିନି । ସେନସେକ୍ସ ୩୨୨ ପଏଣ୍ଟ ହ୍ରାସ ହୋଇ ୭୬,୨୫୫ ସ୍ତରରେ ରହିଛି । ନିଫ୍ଟି ୮୨ ପଏଣ୍ଟ ଖସି ୨୩,୨୫୦ ପଏଣ୍ଟରେ ବନ୍ଦ ହୋଇଛି । ଟିସିଏସ୍ ଏବଂ ଏଚ୍ସିଏଲ୍ ଟେକ୍ ଶେୟାର ୪% ହ୍ରାସ ହୋଇଛି ।
ଅନ୍ୟପକ୍ଷରେ, ଅନିଶ୍ଚିତତା ମଧ୍ୟରେ ଭାରତରେ ସୁନା ଦର ୯୩,୦୦୦ ଟଙ୍କା ପାର୍ କରିଛି । ଅନ୍ୟାନ୍ୟ ରାଷ୍ଟ୍ରଗୁଡ଼ିକ ତୁଳନାରେ ଭାରତ ଉପରେ ଅପେକ୍ଷାକୃତ କମ୍ ଶୁଳ୍କ ଘୋଷଣା କରିଛନ୍ତି ରାଷ୍ଟ୍ରପତି ଟ୍ରମ୍ପ । ଏହା ଦେଶ ପାଇଁ ଏକ ସୁଯୋଗ । ବିଶେଷଜ୍ଞଙ୍କ ମତରେ, ଆମେରିକାର ଏହି ଶୁଳ୍କ ଯୋଗୁ ଭାରତକୁ କିଛିଟା କ୍ଷତି ସହିବାକୁ ପଡ଼ିବ । ଏହା ସତ୍ତେ୍ୱ କେତେକ କ୍ଷେତ୍ରରେ ଦେଶକୁ ଫାଇଦା ମଧ୍ୟ ମିଳିବ । ଏକ ରିପୋର୍ଟ ଅନୁସାରେ, ଶୁଳ୍କ ଲାଗୁ ହେବା ସତ୍ତେ୍ୱ ୪ଟି କ୍ଷେତ୍ରରେ ଭାରତ ଚୀନ୍କୁ ପଛରେ ପକାଇ ନମ୍ବର ୱାନ୍ ହୋଇପାରେ । ଟ୍ରମ୍ପଙ୍କ ଉଚ୍ଚ ଶୁଳ୍କ ଯୋଗୁ ଅନେକ ଏସୀୟ ରାଷ୍ଟ୍ର ପ୍ରଭାବିତ ହେବେ । ଏହାର ଫାଇଦା ଭାରତକୁ ମିଳିପାରେ ।
ଟ୍ରମ୍ପ ସରକାର କେତେକ ଏସୀୟ ଦେଶଗୁଡ଼ିକରୁ ଆସୁଥିବା ସାମଗ୍ରୀ ଉପରେ ଚଢ଼ା ଟିକସ ଲଗାଇଛନ୍ତି । ତେଣୁ ଉକ୍ତ ଦେଶଗୁଡ଼ିକରୁ ସାମଗ୍ରୀ କିଣିବା ମହଙ୍ଗା ହେବ । ଏହା ଭାରତ ପାଇଁ ବଡ଼ ସୁଯୋଗ । ଭାରତ ଉକ୍ତ ଦେଶଗୁଡ଼ିକର ସ୍ଥାନ ନେଇପାରିବ । ଏହି ସାମଗ୍ରୀଗୁଡ଼ିକୁ ପ୍ରସ୍ତୁତ କରି ଭାରତ ଅନ୍ୟ ଦେଶଗୁଡ଼ିକୁ ଏଗୁଡ଼ିକୁ ଶସ୍ତାରେ ବିକ୍ରି କରିପାରିବ । ଫଳରେ ଦେଶର ବାଣିଜ୍ୟ ବଢିବ । ଭାରତ ଉପରେ ୨୭% ଶୁଳ୍କ ଲାଗିଥିବାବେଳେ ଚୀନ୍ ଉପରେ ଲାଗିଛି ୩୪% ଶୁଳ୍କ । ଫଳରେ ପୂର୍ବରୁ ଚୀନ୍ରୁ ଯେଉଁ ଖେଳନା ୧୦୦ ଟଙ୍କାରେ ମିଳୁଥିଲା ତାହା ଏବେ ୧୨୦ ଟଙ୍କା ହୋଇଯିବ ।
ଏଭଳି ସ୍ଥିତିରେ ଯଦି ଭାରତ ଉକ୍ତ ଖେଳନାକୁ ୧୧୦ ଟଙ୍କାରେ ବିକ୍ରି କରେ ତେବେ ଲୋକେ ତାହାକୁ ଭାରତଠାରୁ କିଣିବେ । ଏହାଦ୍ୱାରା ଦେଶର ଅର୍ଥବ୍ୟବସ୍ଥା ବଳୁଆ ହେବ । ଭାରତର ପୋଷାକ କ୍ଷେତ୍ର ସବୁଠାରୁ ଅଧିକ ଲାଭରେ ରହିବ । ଚୀନ୍ ଏବଂ ବାଂଲାଦେଶରୁ ଆସୁଥିବା ପୋଷାକ ଉପରେ ଆମେରିକାର ଉଚ୍ଚ ଶୁଳ୍କ ଲାଗିବା ଦ୍ୱାରା ଭାରତୀୟ ଉତ୍ପାଦ ଶସ୍ତା ହେବ । ଭାରତରେ ପୂର୍ବରୁ ହିଁ ପୋଷାକ ଶିଳ୍ପରେ ବଡ଼ ବଡ଼ କମ୍ପାନି କାର୍ଯ୍ୟ କରୁଛନ୍ତି । ତେଣୁ ଆମେରିକାର ରିଟେଲରମାନେ ଅଧିକ ଶୁଳ୍କ ଥିବା ଦେଶଗୁଡ଼ିକରୁ ଦୂରେଇ ଭାରତଠାରୁ ପୋଷାକ କିଣିବେ ।
ଏହାବ୍ୟତୀତ ବିଶ୍ୱସ୍ତରୀୟ ବ୍ରାଣ୍ଡଗୁଡ଼ିକ ତଗ୍ଡ଼ା ଶୁଳ୍କରୁ ବଞ୍ଚିବା ପାଇଁ ବାଂଲାଦେଶ ଏବଂ ଚୀନ୍ରୁ ନିଜ ନିଜର ଉତ୍ପାଦନକୁ ଭାରତକୁ ସ୍ଥାନାନ୍ତର କରିପାରନ୍ତି । ଜିଟିଆର୍ଆଇର ଏକ ରିପୋର୍ଟ ଅନୁସାରେ, ଇଲେକ୍ଟ୍ରୋନିକ୍ସ କ୍ଷେତ୍ରରେ ବି ଭାରତ ଲାଭରେ ରହିପାରେ । ଭିଏତ୍ନାମ ଏବଂ ଥାଇଲାଣ୍ଡର ଇଲେକ୍ଟ୍ରୋନିକ୍ସ ଓ ଟେଲିକମ୍ ଉପକରଣରେ ଉଚ୍ଚ ଟିକସ ଲାଗିବା ଦ୍ୱାରା ଭାରତ ପାଖରେ ଏକ ଉତ୍ତମ ସମ୍ଭାବନା ରହିଛି । ସ୍ମାର୍ଟଫୋନ୍ ଏବଂ ଟେଲିକମ୍ ଉପକରଣ ପାଇଁ ପୂର୍ବରୁ ହିଁ ଭାରତର ଉତ୍ପାଦନ ସଂଯୁକ୍ତ ପ୍ରୋତ୍ସାହନ(ପିଏଲ୍ଆଇ) ଯୋଜନା ଆପଲ୍ ଏବଂ ସାମସଙ୍ଗ୍ ଭଳି କମ୍ପାନିଗୁଡ଼ିକୁ ନିବେଶ ଲାଗି ଆକର୍ଷିତ କରୁଛି ।
ଏହି କାରଣରୁ ଶୁଳ୍କ ଥିବା ସତ୍ତେ୍ୱ ଭାରତ ଇଲେକ୍ଟ୍ରୋନିକ୍ସ ଯୋଗାଣ ଶୃଙ୍ଖଳ ବିଶେଷ କରି ଆସେମ୍ବ୍ଲି ଏବଂ ଉପକରଣ ତିଆରିରେ ଆହୁରି ମଜଭୁତ ହେବ । ଭାରତରେ ତାଇୱାନ ଏବଂ ଦକ୍ଷିଣ କୋରିଆ ଭଳି ଆଧୁନିକ ସେମିକଣ୍ଡକ୍ଟର ପ୍ରସ୍ତୁତ କରିବାର କ୍ଷମତା ନାହିଁ । କିନ୍ତୁ ତାଇୱାନ ସାମଗ୍ରୀରେ ୩୨% ଶୁଳ୍କ ଲାଗୁ ହେବା ଦ୍ୱାରା କମ୍ପାନିଗୁଡ଼ିକ ସେମାନଙ୍କ ଯୋଗାଣ ଶୃଙ୍ଖଳକୁ ଭିନ୍ନ ଭିନ୍ନ ଦେଶକୁ ସ୍ଥାନାନ୍ତର କରିପାରନ୍ତି । ଏହା ଭାରତ ପାଇଁ ସୁଯୋଗ । ଦେଶରେ ପ୍ୟାକେଜିଂ, ଟେଷ୍ଟିଂ ଏବଂ ପୁରୁଣା ଚିପ୍ ପ୍ରସ୍ତୁତି ଭଳି କାର୍ଯ୍ୟ କରିବାର କ୍ଷମତା ରହିଛି । ଯଦି ମୂଳଦୁଆ ମଜଭୁତ କରାଯାଏ ଏବଂ ସରକାର ସହଯୋଗ ଜାରି ରଖନ୍ତି ତେବେ ଭାରତ ବି ଗ୍ଲୋବାଲ ଚିପ୍ ଇକୋସିଷ୍ଟମ୍ରେ ସାମିଲ ହୋଇପାରେ ।
ଆମେରିକାର ଶୁଳ୍କ ଦ୍ୱାରା ଚୀନ୍ ଏବଂ ଥାଇଲାଣ୍ଡ ଭଳି ସ୍ଥାନରୁ ଆସୁଥିବା ମେଶିନେରି, ଅଟୋ ଯନ୍ତ୍ରାଂଶ ଏବଂ ଖେଳନା ଉପରେ ପ୍ରଭାବ ପଡ଼ିବ । ଯଦି ଭାରତ ଠିକ୍ ଉପାୟରେ କାର୍ଯ୍ୟ କରେ ତେବେ ଏସବୁ କ୍ଷେତ୍ରରେ ସମ୍ଭାବନାଗୁଡ଼ିକର ଲାଭ ଉଠାଇପାରିବ । କିନ୍ତୁ ଏଥିପାଇଁ ବିଦେଶୀ ନିବେଶ ଟାଣିବାକୁ ପଡ଼ିବ, ଉତ୍ପାଦନ ବଢ଼ାଇବା ସହ ମାନ ବଜାୟ ରଖିବାକୁ ହେବ । ଟ୍ରମ୍ପଙ୍କ ଶୁଳ୍କ ବାଣ ସତ୍ତେ୍ୱ ଭାରତ ଆମେରିକାକୁ ଏହାର କୃଷି ରପ୍ତାନି ବଢ଼ାଇପାରେ ।
ଭାରତୀୟ ଉତ୍ପାଦଗୁଡ଼ିକ ଉପରେ ଟ୍ରମ୍ପ ପ୍ରଶାସନର ୨୭% ଶୁଳ୍କ ଦେଶର ପ୍ରମୁଖ କୃଷି ରପ୍ତାନି ଉପରେ ସୀମିତ ପ୍ରଭାବ ପକାଇବ ବୋଲି ଜଣାଶୁଣା କୃଷି ଅର୍ଥନୀତିଜ୍ଞ ଅଶୋକ ଗୁଲାଟି ପ୍ରକାଶ କରିଛନ୍ତି । ସେ କହିଛନ୍ତି ଯେ, ଅନ୍ୟାନ୍ୟ ପ୍ରତିଦ୍ୱନ୍ଦ୍ୱୀ ରାଷ୍ଟ୍ରଗୁଡ଼ିକ ଉପରେ ଭାରତ ତୁଳନାରେ ଅଧିକ ଶୁଳ୍କ ଲଗାଇଛି ଆମେରିକା । ଏଭଳି କ୍ଷେତ୍ରରେ ଦେଶରୁ ସାମୁଦ୍ରିକ ଖାଦ୍ୟ ଏବଂ ଚାଉଳ ରପ୍ତାନି ଉପରେ ପ୍ରଭାବ କମ୍ ରହିବ । ଭାରତ ଉପରେ ୨୭% ଶୁଳ୍କ ଲାଗୁ ହେବାକୁ ଥିବାବେଳେ ଚୀନ୍ ଉପରେ ୩୪% ଶୁଳ୍କ ଲଦିଛି ଆମେରିକା ।
ଏଭଳି ସ୍ଥିତିରେ ଭାରତୀୟ ରପ୍ତାନିକାରୀଙ୍କୁ ୭%ର ତୁଳନାତ୍ମକ ଫାଇଦା ମିଳିବ । ଭାରତୀୟ ରିଜର୍ଭ ବ୍ୟାଙ୍କ(ଆର୍ବିଆଇ)ର ପୂର୍ବତନ ଗଭର୍ଣ୍ଣର ରଘୁରାମ ରାଜନ ଟ୍ରମ୍ପ ପ୍ରଶାସନର ବାଣିଜ୍ୟ ନୀତିକୁ କଡ଼ା ସମାଲୋଚନା କରିଛନ୍ତି । ସେ କହିଛନ୍ତି ଏହା ଆମେରିକାର ‘ନିଜସ୍ୱ ଲକ୍ଷ୍ୟ’ । ଆମେରିକା ଅର୍ଥନୀତିକୁ ଏହା ସବୁଠାରୁ ଅଧିକ ପ୍ରଭାବିତ କରିବ । ଭାରତ ଉପରେ ପ୍ରଭାବ କମ୍ ରହିବ ।
ରାଜନ ଆହୁରି କହିଛନ୍ତି ଯେ, ଟ୍ରମ୍ପ ସରକାରଙ୍କ ଏହି ଶୁଳ୍କ ଚୋଟ ଯୋଗୁ ଆମେରିକୀୟ ଉପଭୋକ୍ତା ଦରବୃଦ୍ଧିର ସାମ୍ନା କରିବେ । ସେଠାରେ ଚାହିଦା ପ୍ରଭାବିତ ହେବ, ଯାହାଫଳରେ ଭାରତର ରପ୍ତାନି ଖସିବ । ଅନ୍ୟପକ୍ଷରେ, ଆମେରିକା ଅନ୍ୟ ଦେଶଗୁଡ଼ିକ ଉପରେ ଅଧିକ ଶୁଳ୍କ ଲାଗୁ କରିଥିବାରୁ ଭାରତ ଏତେ ମାତ୍ରାରେ ପ୍ରଭାବିତ ହେବ ନାହିଁ ।
