ନାପିଡ ୩।୪: ମିଆଁମାରରେ ଗତ ଶୁକ୍ରବାର ହୋଇଥିବା ୭.୭ ତୀବ୍ରତାର ବିନାଶକାରୀ ଭୂମିକମ୍ପ ପରେ ପରବର୍ତ୍ତି କମ୍ପନ(ଆଫ୍ଟରସକ୍) ଜାରି ରହିଛି। ଦେଶର ପାଣିପାଗ ବିଜ୍ଞାନ ଓ ଜଳ ବିଜ୍ଞାନ ବିଭାଗ ଅନୁସାରେ ଗୁରୁବାର ସକାଳ ପର୍ଯ୍ୟନ୍ତ ୨.୮ରୁ ଆରମ୍ଭ କରି ୭.୫ ତୀବ୍ରତାର ୬୬ଟି କମ୍ପନ ଅନୁଭୂତ ହେଲାଣି। ଏଥି ମଧ୍ୟରେ ରାଜ୍ୟ ପ୍ରଶାସନ ପରିଷଦ (ଏସଏସି) ଅଧ୍ୟକ୍ଷ ମିନ୍ ଆଙ୍ଗ ହ୍ଲାଇଂ କହିଛନ୍ତି ଯେ ମିଆଁମାର ସରକାର ଭୂମିକମ୍ପ ରିଲିଫ ଓ ପୁନର୍ବାସ ନିମନ୍ତେ ୨୩୮.୦୯ ମିଲିୟନ ଡଲାର ଆବଣ୍ଟିତ କରିବେ।
ସରକାରୀ ଦୈନିକ ‘ଦି ଗ୍ଲୋବାଲ ନ୍ୟୁଲାଇଟ ଅଫ ମିଆଁମାର’ ରିପୋର୍ଟ ଅନୁସାରେ ମିଆଁମାର ନେତା ଏହି ବୟାନ ମଙ୍ଗଳବାର ରାଜଧାନୀ ନାପିଡରେ ନଗଦ ଦାନ ସଂଗ୍ରହ ସମାରୋହରେ ଦେଇଥିଲେ। କାର୍ଯ୍ୟକ୍ରମରେ ଶୁଭଚିନ୍ତକ ୧୦୪.୪୪ ବିଲିୟନ କ୍ୟାଟ୍ (୪୯.୭୧ମିଲିୟନ ଡଲାର) ନଗଦ ଓ ୧୨.୪ ବିଲିୟନ କ୍ୟାଟର ଅଣ ନଗଦ ଦାନ କରିଛନ୍ତି। ଶୁକ୍ରବାର ମିଆଁମାରରେ ହୋଇଥିବା ବିନାଶକାରୀ ଭୂମିକମ୍ପ ପରେ ସାମରିକ ଶାସକ ମିନ୍ ଆଙ୍ଗ ହ୍ଲାଇଂ ଅନ୍ତର୍ଜାତୀୟ ସହାୟତା ନିବେଦନ କରିଛନ୍ତି।
ମିଆଁମାରରେ ଏବେ ୧୬ଟି ଦେଶର ଉଦ୍ଧାରକାରୀ ଦଳ, ଡାକ୍ତର ଓ ନର୍ସ ମାନବୀୟ ସହାୟତା ଓ ଡାକ୍ତରୀ ସହାୟତା ସହିତ ପହଞ୍ଚି ରିଲିଫ ଓ ଉଦ୍ଧାର କାର୍ଯ୍ୟ ପରିଚାଳନା କରୁଛନ୍ତି। ସ୍ଥାନୀୟ ଦୈନିକ ‘ମିଆଁମା ଏଲିନ’ ଅନୁସାରେ ହୋଇଥିବା ୧୮ଟି ଶକ୍ତିଶାଳୀ ଭୂମିକମ୍ପ ମଧ୍ୟରୁ ୭.୭ ତୀବ୍ରତାର ଭୂମିକମ୍ପ ଦ୍ୱିତୀୟ ସବୁଠୁ ଶକ୍ତିଶାଳୀ ଭୂମିକମ୍ପ ଥିଲା। ଏହା ପୂର୍ବରୁ ୧୯୧୨ ମସିହାରେ ଦେଶରେ ୮.୦ ତୀବ୍ରତାର ଭୂମିକମ୍ପ ହୋଇଥିଲା।
ରାଜ୍ୟ ପ୍ରଶାସନ ପରିଷଦ ସୂଚନା ଟିମ୍ ଅନୁସାରେ ଭୂମିକମ୍ପରେ ପ୍ରାଣ ହରାଇଥିବା ଲୋକଙ୍କ ସଂଖ୍ୟା ୩,୦୮୫କୁ ପହଞ୍ଚି ଯାଇଛି। ସେହିପରି ୪,୭୧୫ ଜଣ ଭୂମିକମ୍ପରେ ଆହତ ହୋଇଛନ୍ତି। ୩୪୧ ଜଣଙ୍କ ଏପର୍ଯ୍ୟନ୍ତ କୌଣସି ଖୋଜ ଖବର ମିଳୁ ନାହିଁ। ମିଆଁମାର ରେଡକ୍ରସ ସୋସାଇଟି ଅଧ୍ୟକ୍ଷ ମ୍ୟୋ ନ୍ୟୁଣ୍ଟ କହିଛନ୍ତି ଯେ ପ୍ରଭାବିତ ଅଞ୍ଚଳରେ ସୁରକ୍ଷା ସମ୍ପର୍କିତ ଚିନ୍ତା ପାଇଁ ଉଦ୍ଧାରକାରୀ ଦଳଙ୍କୁ ରିଲିଫ ବିତରଣ କରିବାରେ ସମସ୍ୟାର ସମ୍ମୁଖୀନ ହେବାକୁ ପଡୁଛି। ଭୂମିକମ୍ପ ପରେ ମିଆଁମାର ୧ ସପ୍ତାହ ଜାତୀୟ ଶୋକ ଘୋଷଣା କରିଛି। ମିଆଁମାରରେ ଏବେ ମିଳିତ ଜାତିସଂଘ, ଆମେରିକା, ଭାରତ, ୟୁରୋପୀୟ ସଂଘ ସମେତ ଅନ୍ୟ ଦେଶମାନେ ଓ ଅନ୍ତର୍ଜାତୀୟ ସଙ୍ଗଠନମାନେ ଭୂମିକମ୍ପ ପୀଡ଼ିତଙ୍କ ନିମନ୍ତେ ସହାୟତା ଓ ଉଦ୍ଧାରକାରୀ ଦଳ ପଠାଇଛନ୍ତି।
