ନୂଆଦିଲ୍ଲୀ ୧।୧୧: ଆଗାମୀ ଦିଲ୍ଲୀ ବିଧାନସଭା ନିର୍ବାଚନ ପୂର୍ବରୁ ବିଜେପିକୁ ଜୋରଦାର ଝଟକା ଲାଗିଛି। ବିଜେପି ନେତା ବ୍ରହ୍ମ ସିଂହ ତମ୍ବର ଆମ ଆଦମୀ ପାର୍ଟି (ଆପ) ଜାତୀୟ ସଂଯୋଜକ ଅରବିନ୍ଦ କେଜରିୱାଲଙ୍କ ଉପସ୍ଥିତିରେ ଶୁକ୍ରବାର ଦଳରେ ଯୋଗ ଦେଇଛନ୍ତି। ବିଜେପିର ପୂର୍ବତନ ବିଧାୟକ ବ୍ରହ୍ମସିଂହ ତମ୍ବର ଦକ୍ଷିଣ ଦିଲ୍ଲୀ ଓ ଗ୍ରାମୀଣ ଦିଲ୍ଲୀରେ ବେଶ ପରିଚୟ ରହିଛି। ସେ ୩ ଥର ବିଧାୟକ ଓ ୩ ଥର କାଉନସିଲର ଭାବେ ନିର୍ବାଚିତ ହୋଇଛନ୍ତି।
ଆପରେ ସାମିଲ ହେବା ପରେ ସେ କହିଛନ୍ତି ଯେ ମୁଁ ଅରବିନ୍ଦ କେଜରିୱାଲଙ୍କ ଦ୍ୱାରା କରାଯାଇଥିବା କାମରେ ପ୍ରଭାବିତ ହୋଇ ଦଳରେ ଯୋଗ ଦେଇଛି। ସେ କହିଛନ୍ତି ଯେ ଭାରତୀୟ ଜନତା ପାର୍ଟି ସହ ମୋର ସମସ୍ତ ସମ୍ପର୍କ ଛିନ୍ନ କରି ଅରବିନ୍ଦ କେଜରିୱାଲଙ୍କ ସହିତ କାମ କରିବା ପାଇଁ ମନସ୍ତ କରିଛି। ଆଜି ତାଙ୍କରି ଉପସ୍ଥିତିରେ ମୋତେ ପାର୍ଟିରେ ସାମିଲ ହେବାର ସୌଭାଗ୍ୟ ମିଳିଛି। ସେହିପରି ତମ୍ବରଙ୍କ ପାର୍ଟିରେ ସାମିଲ କରି ଅରବିନ୍ଦ କେଜରିୱାଲ କହିଛନ୍ତି ଯେ ଆଜି ଦିନିଟି ବାସ୍ତବିକ ଏକ ଖୁସିର ଦିନ।
ସେ କହିଛନ୍ତି ଯେ ବ୍ରହ୍ମ ସିଂହ ତମ୍ବର ଦିଲ୍ଲୀ ରାଜନୀତିରେ ଜଣେ ବଡ ଚେହେରା। ସେ ବିଜେପିରୁ ୩ ଥର ବିଧାୟକ ନିର୍ବାଚିତ ହୋଇଛନ୍ତି। ଆଜି ସେ ଦିଲ୍ଲୀ ଓ ପଞ୍ଜାବ ଆପ ସରକାରଙ୍କ କାମରେ ପ୍ରଭାବିତ ହୋଇ ଦଳରେ ଯୋଗ ଦେଇଛନ୍ତି। ସେ ଆସିବା ପରେ ପାର୍ଟିକୁ ନୂଆ ଶକ୍ତି ମିଳିବ। କେବଳ ବ୍ରହ୍ମସିଂହ ତମ୍ବର ନୁହନ୍ତି ତାଙ୍କ ସହ ଦକ୍ଷିଣ ଦିଲ୍ଲୀ ଓ ଗ୍ରାମୀଣ ଦିଲ୍ଲୀର ଅନେକ ଲୋକ ବିଜେପି ଛାଡି ଆପରେ ସାମିଲ ହୋଇ ଯାଇଛନ୍ତି।
