ବଲାଙ୍ଗୀର ୫/୭: ୩ ହଜାର ଟଙ୍କାର ଜିନିଷ କିଣିବା ପରେ ଉପଭୋକ୍ତାଙ୍କୁ ଦେଲେନି କ୍ୟାରି ବ୍ୟାଗ । ମାଗିବାରୁ ଓଲଟି ସେ ବାବଦକୁ ୧୬ ଟଙ୍କା ଅତିରିକ୍ତ ଖର୍ଚ୍ଚ ଯୋଡିଲେ । ଏନେଇ ଉପଭୋକ୍ତା ବାରଣ କରିବାରୁ ପାଟିତୁଣ୍ଡ ଗାଳିଗୁଲଜ ଯାଏ କଥା ଗଲା । ବିଲ୍ ଧରି ଉପଭୋକ୍ତା ଜିଲ୍ଲା ଖାଉଟି ଅଦାଲତଙ୍କ ପାଖକୁ ଗଲା ପରେ ବିଶାଲ ମେଗା ମାର୍ଟକୁ ବଲାଙ୍ଗିର ଜିଲ୍ଲା ଖାଉଟି ଅଦାଲତ ୩୩ ହଜାର ଟଙ୍କା ଫାଇନ କରିଛନ୍ତି ।
ବଲାଙ୍ଗୀରର ସୂର୍ଯ୍ୟକାନ୍ତ ବାଗ ଗତବର୍ଷ ସେପ୍ଟେମ୍ବର ୨୬ରେ ବିଶାଳ ମେଗାମାର୍ଟ ଯାଇ ପ୍ରାୟ ୯ଖଣ୍ଡ ଡ୍ରେସ କିଣିଥିଲେ । ଡ୍ରେସ କିଣିବା ପରେ କ୍ୟାରି ବ୍ୟାଗ ମାଗଣାରେ ନ ଦେଇ ସେଥିପାଇଁ ଅତିରିକ୍ତ ୧୬ ଟଙ୍କା ନେଇଥିଲା ବିଶାଲ ମେଗା ମାର୍ଟ । ସୂର୍ଯ୍ୟକାନ୍ତ ଏହାକୁ ବାରଣ କରିବାରୁ ମାର୍ଟ ପରିଚାଳକ ଆସି ପାଟିତୁଣ୍ଡ କରିବା ସହ ସୁରକ୍ଷାକର୍ମୀଙ୍କୁ ଡାକି ଶୀଘ୍ର କାଉଣ୍ଟର ଖାଲି କରିବାକୁ କହିଥିଲେ । ଏହାପରେ ଖାଉଟି ଅଦାଲତର ଆଶ୍ରୟ ନେଇଥିଲେ ସୂର୍ଯ୍ୟକାନ୍ତ । ସବୁ ପ୍ରମାଣକୁ ଆଧାର କରି ବିଶାଳ ମେଗାମାର୍ଟକୁ ଫାଇନ ନିର୍ଦ୍ଦେଶ ଦେଇଛନ୍ତି ଅଦାଲତ ।
