ମୁମ୍ଵାଇ ୦୨।୦୪; ମହାରାଷ୍ଟ୍ରରେ ଭୟଙ୍କର ସଡ଼କ ଦୁର୍ଘଟଣା। ବୁଲଢାଣାରେ ସକାଳ ପ୍ରାୟ ୫ଟାରେ ଯାତ୍ରୀବାହୀ ବସ୍ ଏବଂ ବୋଲେରୋ ମଧ୍ୟରେ ଧକ୍କା ହୋଇଥିଲା । ଏଥିରେ ୫ଜଣ ପ୍ରାଣ ହରାଇଥିବା ବେଳେ ୨୪ ରୁ ଅଧିକ ଲୋକ ଆହତ ହୋଇଥିବା ସୂଚନା ମିଳିଛି। ଘଟଣା ସମ୍ପର୍କରେ ସୂଚନା ମିଳିବା ମାତ୍ରେ ପୋଲିସ ଘଟଣାସ୍ଥଳରେ ତଦନ୍ତ ଆରମ୍ଭ କରିଛି। ଆହତମାନେ ଏବେ ସ୍ଥାନୀୟ ସରକାରୀ ଡାକ୍ତରଖାନାରେ ଚିକିତ୍ସିତ ହେଉଛନ୍ତି।
ଘଟଣା ପ୍ରାୟ ଭୋର ସମୟର। ପ୍ରତ୍ୟକ୍ଷଦର୍ଶୀଙ୍କ କହିବା ଅନୁସାରେ ,ଖାମଗାଓଁ-ଶେଗାଓଁ ରାଜପଥରେ ସକାଳୁ ସକାଳୁ ଏକ ଦ୍ରୁତଗାମୀ ବୋଲେରୋ ମହାରାଷ୍ଟ୍ର ରାଜ୍ୟ ସଡ଼କ ପରିବହନ ନିଗମର ବସ୍ ସହିତ ଧକ୍କା ଦେଇଥିଲା। କିଛି ସମୟ ମଧ୍ୟରେ ଆଉ ଏକ ଘରୋଇ ବସ୍ ଉଭୟ ଗାଡ଼ିକୁ ଧକ୍କା ଦେଇଥିଲା। ଦୁର୍ଘଟଣା ଏତେ ଭୟଙ୍କର ଥିଲା ଯେ ତିନୋଟି ଗାଡ଼ି ଭାଙ୍ଗି ଚୂରମାର ହୋଇ ଯାଇଥିଲା।
ସୂଚନା ମିଳିବା ମାତ୍ରେ ସ୍ଥାନୀୟ ପୋଲିସ ତୁରନ୍ତ ଘଟଣାସ୍ଥଳରେ ପହଞ୍ଚିଥିଲେ। ଆହତମାନଙ୍କୁ ଆମ୍ବୁଲାନ୍ସ ମାଧ୍ୟମରେ ନିକଟସ୍ଥ ହସ୍ପିଟାଲରେ ଭର୍ତ୍ତି କରାଯାଇଥିଲା। ପୋଲିସ ଦୁର୍ଘଟଣାର କାରଣ ଦ୍ରୁତ ଗତି ବୋଲି ଅନୁମାନ୍ କରୁଛି। ବର୍ତ୍ତମାନ, ଦୁର୍ଘଟଣାର ପ୍ରକୃତ କାରଣ ଜାଣିବା ପାଇଁ ଏହି ଘଟଣାର ତଦନ୍ତ ଚାଲିଛି। ଘଟଣାସ୍ଥଳରେ ବହୁ ସଂଖ୍ୟକ ପୋଲିସ ଫୋର୍ସ ଉପସ୍ଥିତ ଅଛନ୍ତି।
