ନୂଆଦିଲ୍ଲୀ ୦୩/୦୪:ରାଷ୍ଟ୍ରପତି ହେବା ପରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ନେବାରେ ଲାଗିଛନ୍ତି ଅନେକ ନିଷ୍ପତ୍ତି । ଯାହା ଅନେକ ଦେଶ ପାଇଁ ସୃଷ୍ଟି କରିଛି ସମସ୍ୟା । ଏପ୍ରିଲ ପହିଲାରୁ ଟ୍ରମ୍ପ ଭାରତ ସମତେ ଅନେକ ଦେଶ ଉପରେ ଲଗାଇଛନ୍ତି ଶୁଳ୍କ । ଭାରି ମାତ୍ରାରେ ଲାଗୁ ହୋଇଛି ଏହି ଟାରିଫ୍ । ଏହି ସମୟରେ, ଆଣ୍ଟାର୍କଟିକା ପାଖରେ ଥିବା ଅଷ୍ଟ୍ରେଲିଆର ଏକ ଦ୍ୱୀପ ଉପରେ ବି ଲାଗୁ କରାଯାଇଛି ୧୦ ପ୍ରତିଶତ ଶୁଳ୍କ । ଯେଉଁଠି କୌଣସି ମଣିଷ ବସବାସ କରନ୍ତିନି । ସେଠାରେ ଟ୍ରମ୍ପ ଲଗାଇଛନ୍ତି ଶୁଳ୍କ ।
ଅଷ୍ଟ୍ରେଲିଆ ସରକାରଙ୍କ ନିୟନ୍ତ୍ରଣରେ ଥିବା ହାର୍ଡ ଦ୍ୱୀପ ଏବଂ ମ୍ୟାକଡୋନାଲ୍ଡ ଦ୍ୱୀପକୁ ପୃଥିବୀର ସବୁଠାରୁ ନିର୍ଜନ ସ୍ଥାନ ମଧ୍ୟରୁ ଗୋଟିଏ ବୋଲି ବିବେଚନା କରାଯାଏ । ଏପରି ପରିସ୍ଥିତିରେ, ଟ୍ରମ୍ପ୍ ହାର୍ଡ ଆଇଲ୍ୟାଣ୍ଡ ଏବଂ ମ୍ୟାକଡୋନାଲ୍ଡ ଆଇଲ୍ୟାଣ୍ଡ ଉପରେ ଶୁଳ୍କ ଲଗାଇବା ପରେ ବର୍ଷିଛନ୍ତି ଅଷ୍ଟ୍ରେଲିଆର ପ୍ରଧାନମନ୍ତ୍ରୀ । ଆଣ୍ଟୋନି ଆଲବାନିଜ୍ ପ୍ରତିକ୍ରିୟା ରଖି କହିଛନ୍ତି ଯେ ଏହି ଗ୍ରହରେ କେହି ସୁରକ୍ଷିତ ନୁହଁନ୍ତି। ସେ କହିଛନ୍ତି ଯେ ଟ୍ରମ୍ପ ପ୍ରଶାସନର ଶୁଳ୍କ ପଛରେ କୌଣସି ଯୁକ୍ତି ନାହିଁ। ଏହା ଜଣେ ଭଲ ବନ୍ଧୁର ପରିଚୟ ନୁହେଁ ।
ଆଲବାନିଜ୍ ଏହା ମଧ୍ୟ କହିଥିଲେ ଯେ ଅଷ୍ଟ୍ରେଲିଆ ପ୍ରତିଶୋଧ ସ୍ୱରୂପ ଆମେରିକା ଉପରେ କୌଣସି ପାରସ୍ପରିକ ଶୁଳ୍କ ଲାଗୁ କରିବ ନାହିଁ । ସେ କହିଥିଲେ ଯେ ଆମେ ଏପରି ଅନ୍ଧ ଦୌଡ଼ରେ ସାମିଲ ହେବୁ ନି, ଯେଉଁଠି ସବୁ ଜିନିଷର ମୂଲ୍ୟ ଆକାଶଛୁଆଁ । ଧୀରେ ଧୀରେ ଅଭିବୃଦ୍ଧି ଏଠି ପାତାଳକୁ ଯାଉଛି । ପାଣିପାଗ ପରିସ୍ଥିତି ଉପରେ ନିର୍ଭର କରି ଅଷ୍ଟ୍ରେଲିଆର ଆଣ୍ଟାର୍କଟିକା କାର୍ଯ୍ୟକ୍ରମ ଅଧୀନରେ ପଶ୍ଚିମ ଅଷ୍ଟ୍ରେଲିଆର ଫ୍ରିମେଣ୍ଟଲରୁ ହାର୍ଡ ଦ୍ୱୀପରେ ପହଞ୍ଚିବାକୁ ପ୍ରାୟ ୧୦ ଦିନ ସମୟ ଲାଗେ। ଏଠାରେ ମଣିଷ ବାସ କରନ୍ତି ନାହିଁ । ଏହା ପେଙ୍ଗୁଇନ୍, ସିଲ୍ ଏବଂ ବିଭିନ୍ନ ପ୍ରଜାତିର ପକ୍ଷୀଙ୍କ ବାସସ୍ଥାନ।
କହିବାକୁ ଗଲେ ୨ ଏପ୍ରିଲରେ ହ୍ୱାଇଟ୍ ହାଉସର ରୋଜ୍ ଗାର୍ଡେନରେ ଗଣମାଧ୍ୟମକୁ ସମ୍ବୋଧିତ କରିବା ସମୟରେ ଟ୍ରମ୍ପ ୧୮୦ଟି ଦେଶ ଉପରେ ରିହାତି ପାରସ୍ପରିକ ଶୁଳ୍କ ଲାଗୁ କରିଥିଲେ। ଏହି ସମୟରେ ସେ କହିଥିଲେ ଯେ ଆମେ ଆମେରିକାକୁ ପୁଣି ସମୃଦ୍ଧ କରିବୁ। ଟ୍ରମ୍ପ ଭାରତ, ଚୀନ୍, ୟୁରୋପୀୟ ସଂଘ, ଜାପାନ, ତାଇୱାନ, ଦକ୍ଷିଣ କୋରିଆ, ବାଂଲାଦେଶ, ଶ୍ରୀଲଙ୍କା ଏବଂ ପାକିସ୍ତାନ ସମେତ ଅନେକ ଦେଶର ଚାର୍ଟ ଦେଖାଇ ସେମାନଙ୍କ ଉପରେ ଶୁଳ୍କ ଲାଗୁ କରିବାର ଘୋଷଣା କରିଥିଲେ।
