ନୂଆଦିଲ୍ଲୀ: ଆମେରିକାରେ ପ୍ରକୃତିର ତାଣ୍ଡବ । ଭୀଷଣ ଝଡ଼ ତୋଫାନରେ ବେହାଲ ଦକ୍ଷିଣ ଓ ମଧ୍ୟ ପଶ୍ଚିମ ପ୍ରାନ୍ତ । ପ୍ରବଳ ବର୍ଷା ସାଙ୍ଗକୁ ପବନରେ ବତୀ ଗୁଲ୍ ହୋଇଛି । ଘର ଉପରୁ ଛପର ଉଡ଼ିଯାଇଥିବା ବେଳେ ବଡ଼ ବଡ଼ ଗଛ ଓ ବିଜୁଳି ଖୁଣ୍ଟ ଉପୁଡ଼ି ପଡ଼ିଛି । ଭୟଙ୍କର ବାତ୍ୟାରେ ୨ଜଣ ମୃତ୍ୟୁ ହୋଇଥିବା ବେଳେ ଅନେକ ଲୋକ ଆହତ ହୋଇଛନ୍ତି । ବର୍ଷା ପବନ ଯୋଗୁ ବିଜୁଳି ସରବରାହ ବନ୍ଦ ହୋଇଛି ।
ସୂଚନା ଅନୁଯାୟୀ, ଇଲିନୋଇସ୍, ଅରକଂସାସ୍, ଇଣ୍ଡିୟାନ, ମିସୋରୀ ଓ ମିସିସିପିର କିଛି ଅଞ୍ଚଳକୁ ବୁଧବାର ସଂଧ୍ୟାରେ ଭୀଷଣ ଝଡ଼ ତୋଫାନ ଆସିବା ନେଇ ସତର୍କତା ଜାରି କରିଥିବା ପାଣିପାଗ ବିଭାଗ । ସେହିପରି ଉତ୍ତର-ପୂର୍ବ ଅରକଂସାସରେ ଝଡ଼କୁ ନେଇ କିଛି ସମୟ ପାଇଁ ଜରୁରୀକାଳ ଘୋଷଣା କରାଯାଇଥିଲା ।
ଘନେଇଲା ବନ୍ୟା ଆଶଙ୍କା:
ପ୍ରବଳ ଝଡ଼ ତୋଫାନ ଯୋଗୁ ଇଲିନୋଇସ୍, ଅରକଂସାସ୍, ମିସୋରୀ, ମିସିସିପି ଓ ଟେନସିରେ ୯୦ ହଜରାରୁ ଅଧିକ ଘରେ ବିଦ୍ୟୁତ୍ ସରବରାହ ବିଚ୍ଛିନ୍ନ ହୋଇଛି । କେବଳ ଇଣ୍ଡିୟାନରେ ବୁଧବାର ୧.୮୨ ଲକ୍ଷ ଘରେ ବିଜୁଳି ନାହିଁ । ପ୍ରବଳ ବର୍ଷା ଲାଗି ରହିଥିବାରୁ ଆମେରିକାର ଦକ୍ଷିଣ ଓ ମଧ୍ୟ ପଶ୍ଚିମରେ ବନ୍ୟା ଆଶଙ୍କା ଦେଖାଦେଇଛି । କାରଣ ଝଡ଼ ତୋଫାନ ଭୀଷଣ ରୂପ ଧରି ପୂର୍ବ ଦିଗକୁ ବଢ଼ିବାରେ ଲାଗିଛି । ଆମେରିକୀୟ ପାଣିପାଗ ବିଭାଗର ସୂଚନା ମୁତାବକ, ଆସନ୍ତା ଶନିବାର ପର୍ଯ୍ୟନ୍ତ ବନ୍ୟା ବିପଦ ରହିବ । କାରଣ ଆସନ୍ତା ୪ ଦିନ ଭିତରେ ୩୦ ସେଣ୍ଟି ମିଟରରୁ ଅଧିକ ବର୍ଷା ହେବାର ସମ୍ଭାବନା ରହିଛି । ଟେକ୍ସାସରୁ ନେଇ ମିନେସୋଟା ଏବଂ ମେନ୍ ପର୍ଯ୍ୟନ୍ତ ଦେଶର ଏକ ବଡ଼ ଅଂଶ ଝଡ଼ ତୋଫାନର ସାମ୍ନା କରିପାରନ୍ତି ବୋଲି ପାଣିପାଗ ବିଭାଗ ପୂର୍ବାନୁମାନ କରିଛି ।
